រាជធានីភ្នំពេញ ៖ នៅពាក់កណ្ដាលខែតុលាឆ្នាំ ២០២០នេះកម្ពុជាបានរងផលប៉ះពាល់ធ្ងន់ធ្ងរពីគ្រោះទឹកជំនន់ ដែលធ្វើអោយលិចលង់ដល់ផ្ទះសម្បែង អាជីវកម្មដីធ្លីជាច្រើនទីតាំង និងបុរីជាច្រើនបានជន់លិចដោយជំនន់ទឹកភ្លៀង ជាពិសេសគឺនៅតំបន់ភាគខាងត្បូងរាជធានីភ្នំពេញ រួមមានតំបន់រង្វង់មូលគួរស្រូវ វត្តព្រះធាតុ…
រាជធានីភ្នំពេញ ៖ នៅពាក់កណ្ដាលខែតុលាឆ្នាំ ២០២០នេះកម្ពុជាបានរងផលប៉ះពាល់ធ្ងន់ធ្ងរពីគ្រោះទឹកជំនន់ ដែលធ្វើអោយលិចលង់ដល់ផ្ទះសម្បែង អាជីវកម្មដីធ្លីជាច្រើនទីតាំង និងបុរីជាច្រើនបានជន់លិចដោយជំនន់ទឹកភ្លៀង ជាពិសេសគឺនៅតំបន់ភាគខាងត្បូងរាជធានីភ្នំពេញ រួមមានតំបន់រង្វង់មូលគួរស្រូវ វត្តព្រះធាតុ បុរីពិភពថ្មីគួរស្រូវ និង ទីតាំងសំខាន់ៗនៅភាគខាងត្បូងក្រុង កំពុងរងផលប៉ះពាល់ធ្ងន់ធ្ងរឈានដល់ជម្លៀសពលរដ្ឋចេញពីផ្ទះទៅកាន់ទីទួលមានសុវត្ថិភាព ។
ជុំវិញបញ្ហាដែលលំនៅឋាននិងផ្ទះអាជីវកម្មកំពុងជន់លិចដោយជំនន់ទឹកភ្លៀងប៉ុន្មានថ្ងៃចុងក្រោយនេះ បានធ្វើឲ្យមានការជជែកដេញដោលពីសំណាក់ពលរដ្ឋ ក្នុងការពិចារណាថាតើតំបន់ណាដែលពួកគាត់គួរតែទិញលំនៅឋានសម្រាប់រស់នៅនិងធ្វើអាជីវកម្មនាពេលអនាគត បន្ទាប់ពីបទពិសោធន៍លិចលង់ដោយជំនន់ទឹកភ្លៀងក្នុងឆ្នាំ ២០២០ នេះ។ ហើយខ្លះក៏លើកឡើងថា នៅពេលណាទឹកជំនន់ស្រកនោះតម្លៃអលនទ្រព្យនៅតំបន់លិចលង់ដោយជំនន់ទឹកភ្លៀង ដូចជាបុរីពិភពថ្មីផ្សារត្រពាំងថ្លឹងនៅផ្លូវវេងស្រេង និងតំបន់គួរស្រូវ អាចជួបបញ្ហា ។
ពាក់ព័ន្ធនឹងករណីនេះ អ្នកជំនាញអចលនទ្រព្យនៅកម្ពុជា លោក ច្រឹក សុខនីម ដែលជាប្រធានសមាគមអ្នកវាយតម្លៃនិងភ្នាក់ងារអចលនវត្ថុកម្ពុជា បានអោយដឹងថាទឹកជំនន់វានឹងមិនធ្វើអោយប៉ះពាល់ដល់វិស័យអចលនវត្ថុទាំងទីផ្សារនិងតម្លៃនោះទេ ។
អ្នកជំនាញអលចទ្រព្យរូបនេះបានពោលអះអាងយ៉ាងដូច្នេះថា « បញ្ហាទឹកជំនន់នេះ វាគ្រាន់តែហេតុការណ៍រយៈពេលខ្លីប៉ុណ្ណោះ ហើយមិនយូរទៀតទេ ទឹកនឹងស្រកចុះវិញ ពេលនោះសកម្មភាពអាជីវកម្ម និងសកម្មភាពអចលនទ្រព្យនានានឹងវិលទៅរកភាពដើមវិញ » ។ លោកបានបន្តថា វាមិនទាន់អាចឈានដល់ថ្នាក់ធ្វើអោយវិស័យអចលនទ្រព្យរងផលប៉ះពាល់ដោយសារតែទឹកជំនន់នោះទេ ហើយអ្នកវិនិយោគលើវិស័យអចលនទ្រព្យគេគិតទៅលើសក្ដានុពលទីតាំងនិងអំណោយផលល្អសម្រាប់ការវិនិយោគរបស់ពួកគេ ។
លោក ច្រឹក សុខនីម បាននិយាយបន្ថែមថា បើថ្វីត្បិតតែផ្ទះពលរដ្ឋមួយចំនួនបានរងផលជន់លិចដោយជំនន់ទឹកភ្លៀងក្ដី តែវាក៏មិនធ្វើតម្លៃផ្ទះធ្លាក់ចុះនោះទេ ផ្ទុយទៅវិញវានឹងធ្វើអោយតម្លៃផ្ទះឡើងថ្លៃក្រោយទឹកស្រក ក្នុងនោះផ្ទះតម្លៃ៤ម៉ឹនដុល្លារអាចនឹងឡើងដល់៧ម៉ឺនដុល្លារអាមេរិក ដូច្នេះសរុបទៅវានឹងមិនប៉ះពាល់អ្វីនោះទេ ទៅលើអចលនទ្រព្យនិងដីធ្លី ។
ជាការកត់សម្គាល់គ្រោះទឹកជំនន់ នៅរាជធានីភ្នំពេញបានធ្វើអោយលិចផ្ទះនិងបុរីទើបអភិវឌ្ឍន៍ថ្មីប៉ែកខាងត្បូង ក្នុងនោះគេឃើញតំបន់សំខាន់មួយចំនួន និងបុរីធំៗមួយចំនួនក៏មានការលិចលង់ដោយសារតែទឹកជំនន់នេះ ដូចជាទីតាំងរង្វង់មូលគួរស្រូវ, បុរីពិភពថ្មីគួរស្រូវ, បុរីវីអាយភី, ផ្សារព្រែកជ្រៃ, វត្តព្រះធាតុ សង្កាត់ស្ពានថ្ម, និង បុរីធំៗស្ទើរទាំងអស់ផ្សេងទៀតដូចជា បុរីរតនៈភ្នំពេញ, បុរី The ML Villa, បុរី អ៊ុយ ហុង, ក្រុមហ៊ុនថ្នាំពណ៌ជាតិ Can Paint, និង បុរីឡាផាម នៅក្នុងតំបន់នោះត្រូវលិច ត្រូវបានលិចលង់ ។
ដោយឡែកអ្នកនាំពាក្យសាលារាជធានីភ្នំពេញ លោក ម៉េត មាសភក្ដី បានឲ្យដឹងថាលោកមិនអាចឆ្លើយបំភ្លឺអំពីផលប៉ះពាល់នាពេលនេះបានទេ ដោយសារលោកកំពុងជាប់រវល់សង្គ្រោះពលរដ្ឋ ។
ប៉ុន្តែបើយោងតាមគណៈកម្មការគ្រប់គ្រងគ្រោះមហន្តរាយ បានអោយដឹងគិតត្រឹមថ្ងៃទី១៧ តុលា ២០២០នេះ ផលប៉ះពាល់លើផ្ទះប្រជាពលរដ្ឋសរុបទូទាំងប្រទេសជាង៥៩ពាន់ខ្នង ប្រជាជនជាង៦ម៉ឺន១ពាន់គ្រួសារស្មើនឹងប្រមាណជាង២៤ម៉ឺន៥ពាន់នាក់ បានរងផលប៉ះពាល់និងជម្លៀសពលរដ្ឋជិត៨ពាន់គ្រួសារ ស្មើនឹងជាង២ម៉ឺន៦ពាន់នាក់ ទៅលើខេត្ត រាជធានីចំនួន១៩ទូទាំងប្រទេស ។
ពាក់ព័ន្ធនឹងបញ្ហាជំនន់ទឹកភ្លៀងវាយលុយនៅខ្មែរនាឆ្នាំ២០២០ នេះដែរ ក្រុមអ្នករកស៊ីដីឡូត៏ បាននិយាយថា ទឹកជំនន់បានរាំងស្ទះដល់ការលក់របស់ខ្លួនមួយកម្រិតផងដែរ ដោយសារតែទឺកលិចផ្លូវសំខាន់ៗមិនអាចអោយពួកគេទៅដល់ទីតាំងដីឡូតិ៍ និងមិនអាចនាំភ្ញៀវទៅមើលទីតាំងដីឡូតិ៍ បាន ធ្វើអោយសកម្មភាពនៃការលក់មានការថមថយផងដែរ ។
ប្រជាពលរដ្ឋកម្ពុជាក៏ដូចជារដ្ឋាភិបាលក្នុងឆ្នាំ២០២០នេះហាក់ទទួលរងឥទ្ធិពលបីផ្ទួនៗ ទៅលើសេដ្ឋកិច្ច ក្នុងនោះតាំងពីដើមឆ្នាំ ២០២០ កម្ពុជានិងពិភពលោកបានជួបប្រទះនឹងជំងឺកូវីដ-១៩ ដោយមិនទាន់សាបរលាបផង ស្រាប់តែសហគមន៍អឺរ៉ុបបានសម្រេចដកផ្នែកខ្លះនៃប្រព័ន្ធអនុគ្រោះពន្ធគ្រប់មុខទំនិញលើកលែងតែសព្វាវុធ (EBA) ផ្នែកខ្លះ២០ភាគរយ ។ ហើយថ្មីៗនេះ កម្ពុជាក៏បានទទួលរងគ្រោះទឹកជំនន់ធ្វើអោយខូចខាតទ្រព្យសម្បត្តិពលរដ្ឋ ខូចខាតហេដ្ឋារចនាសម្ព័ន្ធ និងមិនទាន់អាចវាយតម្លៃបាននៅឡើយនៅពេលនេះទៅលើទំហំនៃការខូចខាតដោយសារតែជំនន់ទឹកភ្លៀង ដោយសារតែស្ថានភាពទឹកជំនន់មិនទាន់បានស្រាកស្រាន្តនៅឡើយ ។
សូមបញ្ជាក់ផងដែរថា អ្នកជំនាញអះអាងថា ក៏ដូចជាសម្តេចតេជោ ហ៊ុន សែន បានមានប្រសាសន៍ថា ការជន់លិចដោយជំនន់ទឹកភ្លៀងនាពេលនេះ គឺមិនមែនដោយសារតែតែការលុបបឹង លុបប្រឡាយ នោះទេ តែវាបណ្តាលមកពីមានភ្លៀងខុសប្រក្រតីធ្លាក់ជាប់ៗគ្នាក្នុងឆ្នាំនេះ ស្របពេលដែលទំនប់ចម្ការតែគីរីរម្យក៏ត្រូវបាក់ បណ្ដាលស្ទឹងព្រែកត្នោតដែលនៅក្បែរនោះ ជះឥទ្ធិពលលើខ័ណ្ឌដង្កោ។
អ្នកជំនាញបន្តថា ការបម្រែបម្រួលនៃអាកាសធាតុលើពិភពលោក ដែលភ្លៀងធ្លាក់ខ្លាំងជាប់ៗគ្នា លើសពី៤០មីលីម៉ែត្រក្នុងមួយម៉ោង គឺជាហេតុផលនាំអោយមានជំនន់ទឹកភ្លៀង ដោយក្នុងឆ្នាំនេះ មិនមែនតែភ្នំពេញទេ សូម្បី នៅទីក្រុងសេអ៊ូល បាងកក ហូជីមិញ សឹង្ហបុរី ម៉ានីល…ក៏រងការជន់លិចធ្ងន់ធ្ងរផងដែរ គឺខ្លាំងជាងនៅកម្ពុជាទៅទៀត ៕
ចែករំលែកព័តមាននេះ