ខេត្តបន្ទាយមានជ័យ ៖ បន្ទាប់ពីជំនន់ទឹកភ្លៀងបានធ្វើឲ្យអូរព្រំដែនកម្ពុជា-ថៃ ហក់ឡើងជាបន្តបន្ទាប់ បណ្តាលឱ្យលិចលំនៅដ្ឋានអ្នកភូមិជាប់ៗព្រំដែន ជាហេតុធ្វើឱ្យពលរដ្ឋជិត៤០០គ្រួសារនៅក្រុងប៉ោយប៉ែត ត្រូវបានអាជ្ញាធរខេត្ត និងក្រុងប៉ោយប៉ែត ដឹកនាំកម្លាំងចម្រុះចុះទៅជម្លៀសពលរដ្ឋទៅរកទីទួលសុវត្ថិភាព។ ទីទួលសុវត្ថិភាពចំនួន៤កន្លែងខាងលើរួមមាន…
ខេត្តបន្ទាយមានជ័យ ៖ បន្ទាប់ពីជំនន់ទឹកភ្លៀងបានធ្វើឲ្យអូរព្រំដែនកម្ពុជា-ថៃ ហក់ឡើងជាបន្តបន្ទាប់ បណ្តាលឱ្យលិចលំនៅដ្ឋានអ្នកភូមិជាប់ៗព្រំដែន ជាហេតុធ្វើឱ្យពលរដ្ឋជិត៤០០គ្រួសារនៅក្រុងប៉ោយប៉ែត ត្រូវបានអាជ្ញាធរខេត្ត និងក្រុងប៉ោយប៉ែត ដឹកនាំកម្លាំងចម្រុះចុះទៅជម្លៀសពលរដ្ឋទៅរកទីទួលសុវត្ថិភាព។
ទីទួលសុវត្ថិភាពចំនួន៤កន្លែងខាងលើរួមមាន ៖ ប៉ុស្តិ៍អូរជ្រៅ នៃនគរបាលការពារព្រំដែនគោកលេខ៨៩១, ស្ថានីយរថភ្លើង, សាលាកូរ៉េ និងបូរី KN ដែលគេឃើញពលរដ្ឋរងគ្រោះជន់លិចដោយសារតែជំនន់ទឹកភ្លៀងបានស្នាក់នៅបណ្តោះអាសន្នយ៉ាងត្រៀបត្រា ដោយសារតែភ្លៀងនៅតែបន្តធ្លាក់ទឹកអូរព្រំដែន បានហក់ឡើងគួរឲ្យព្រួយបារម្ភ។
ជាមួយគ្នានេះ លំនៅដ្ឋានពលរដ្ឋភាគច្រើនតាមភូមិជាប់ៗអូរព្រំដែនក៏រងការលិចលង់ រួមទាំងផលដំណាំ សូម្បីតែប៉ុស្តិ៍នគរបាលព្រំដែនគោកមួយចំនួនក៏រងការជន់លិចដូចគ្នា។
បើតាមលោក គាត ហ៊ុល អភិបាលនៃគណៈអភិបាលក្រុងប៉ោយប៉ែត បានប្រាប់ឱ្យថា ទឹកអូរព្រំដែននៅបន្តហក់ឡើងនៅឡើយ ហើយគិតត្រឹមថ្ងៃទី១៨ ខែតុលានេះ មានពលរដ្ឋជិត៤០០គ្រួសារដែលរស់នៅខាងត្បូងផ្លូវជាតិលេខ៥ ជាពិសេសអ្នកភូមិជាប់ៗអូរព្រំដែនត្រូវបានជម្លៀសរកទីទួលសុវត្ថិភាព។
លោកបញ្ជាក់ថា ទឹកដែលហក់ឡើងក្នុងអូរព្រំដែននេះ ជាជំនន់ទឹកភ្លៀងក្នុងស្រុក និងខ្លះជាជំនន់ទឹកភ្លៀងហូរទាំងស្រុងពីដីថៃ តែមិនមែនទឹកដែលបើកពីអាងនៅទឹកដីថៃនោះទេ។
គួរបញ្ជាក់ថា នៅព្រឹកថ្ងៃទី១៨ ខែតុលា ឆ្នាំ២០២០នេះ ពលរដ្ឋ២៦៦គ្រួសាររស់នៅភូមិសុខសាន្ត សង្កាត់និមិត្ត ដែលជាអ្នករងផលប៉ះពាល់ដោយជំនន់ទឹកភ្លៀងបានទទួលអំណោយពីក្រុមយុវជនស្ម័គ្រចិត្តនៅរាជធានីភ្នំពេញ តាមរយៈលោកឧត្តមសេនីយ៍ត្រី សិទ្ធ ឡោះ ស្នងការនគរបាលខេត្ត។ អំណោយទាំងនេះ គឺ១គ្រួសារៗទទួលបានអង្ករ១០គីឡូក្រាម, មី១កេសតូច ក្នុងនោះសមត្ថកិច្ចចម្រុះជាង៦០នាក់ក៏ទទួលថវិការពីសប្បុរសជនផងដែរ៕
ចែករំលែកព័តមាននេះ