រាជធានីភ្នំពេញ ៖ ប៉ូលិសស្នងការនគរបាលរាជធានីភ្នំពេញ កាលពីថ្ងៃសៅរ៍កន្លងទៅ បានប្រតិកម្ម និងចេញមុខបដិសេធលើការចោទប្រកាន់មួយថា សមត្ថកិច្ចប៉ូលិសបានបង្ខំពលរដ្ឋឲ្យទិញបំពង់ពន្លត់អគ្គិភ័យ ។
សេចក្តីបកស្រាយបំភ្លឺ និងបដិសេធរបស់ការិយាល័យបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានធ្វើឡើង ក្រោយពីមានការផ្សព្វផ្សាយ និងចែកចាយតៗគ្នា កាលពីថ្ងៃទី១៦ ខែតុលា ឆ្នាំ២០២០ កន្លងទៅ នៅទីតាំងស្ថិតនៅភូមិទ្រា សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ដែលបានចុះផ្សាយថា កម្លាំងនគរបាលការិយាល័យនគរបាលបង្ការពន្លត់អគ្គិភ័យ និងសង្គ្រោះនៃស្នងការដ្ឋាននគរបាលរាជធានីភ្នំពេញ បានចុះបង្ខំឲ្យប្រជាពលរដ្ឋទិញបំពង់ពន្លត់អគ្គិភ័យ ។
សមត្ថកិច្ចបានបញ្ជាក់ថា «ការិយាល័យនគរបាលបង្ការពន្លត់អគ្គិភ័យ និងសង្គ្រោះ សូមធ្វើការបដិសេធទាំងស្រុងចំពោះការចុះផ្សាយខាងលើ» ។ ប្រភពដដែលបន្តថា ជាក់ស្តែងកាលពីថ្ងៃទី១៥ ខែតុលា ឆ្នាំ២០២០ កម្លាំងការិយាល័យពិតជាបានអនុវត្តតាមគោលការណ៍ចុះផ្សព្វផ្សាយអប់រំណែនាំដល់ប្រជាពលរដ្ឋ និងបណ្តាអាជីវកម្មងាយរងគ្រោះ ឲ្យបង្កើនការប្រុងប្រយ័ត្នខ្ពស់ចំពោះមូលហេតុ ដែលអាចបង្កឲ្យមានគ្រោះអគ្គិភ័យ និងអប់រំណែនាំអំពីវិធីវិធានការនៃការពន្លត់បឋម ដោយប្រើប្រាស់បំពង់ពន្លត់អគ្គិភ័យ នៅពេលដែលមានហេតុការណ៍អគ្គិភ័យកើតឡើង ដើម្បីចៀសវាងការរាលដាលបង្កមហន្តរាយធ្ងន់ធ្ងរ ។
ការចុះណែនាំនេះ ដោយពុំមានការបង្ខិតបង្ខំឲ្យប្រជាពលរដ្ឋទិញបំពង់ពន្លត់អគ្គិភ័យដូចដែលផេកមួយចំនួនចុះផ្សាយនោះទេ ជាក់ស្តែងសមត្ថកិច្ចគ្រាន់តែត្រួតពិនិត្យ និងពន្យល់ឲ្យមានការយកចិត្តទុកដាក់ប្តូរថ្មីចំពោះបំពង់អគ្គិភ័យណាដែលហួសកាលបរិច្ឆេទប្រើប្រាស់ ។
ជុំវិញបញ្ហានេះផងដែរ មានពលរដ្ឋមួយចំនួនបានលើកឡើងថា ជាទូទៅសមត្ថកិច្ច ពេលចុះផ្សព្វផ្សាយអប់រំណែនាំដល់ប្រជាពលរដ្ឋតាមលំនៅឋាន ឬនិងបណ្តាអាជីវកម្មងាយរងគ្រោះ ឲ្យបង្កើនការប្រុងប្រយ័ត្នខ្ពស់ចំពោះមូលហេតុ ដែលអាចបង្កឲ្យមានគ្រោះអគ្គិភ័យ និងអប់រំណែនាំអំពីវិធីវិធានការនៃការពន្លត់បឋមដោយប្រើប្រាស់បំពង់ពន្លត់អគ្គិភ័យ នៅពេលដែលមានហេតុការណ៍អគ្គិភ័យកើតឡើង ដើម្បីចៀសវាងការរាលដាលបង្កមហន្តរាយធ្ងន់ធ្ងរ គឺមិនបង្ខំឲ្យពលរដ្ឋទិញបំពង់ពន្លត់អគ្គិភ័យនោះទេ ។
អ្នកស្រី ជុំ ស៊ីនាង ពលរដ្ឋមួយរូបនៅខណ្ឌមានជ័យ បានឲ្យដឹងថា «កន្លងមកពេលកូនខ្ញុំមិននៅផ្ទះ មានសមត្ថកិច្ចចុះមកពន្យលអំពីសារៈសំខាន់នៃការមានបំពង់ពន្លត់អគ្គិភ័យ ថាគួរតែមាននៅផ្ទះ ព្រោះអាចជួយដល់ ហេតុការណ៍អគ្គិភ័យកើតឡើង កុំឲ្យរីករាលដាលខ្លាំង។ ពេលនោះខ្ញុំប្រាប់ថា កូនមិននៅផ្ទះ អត់ទាន់ទិញបាន ប៉ូលិសមិនបានបង្ខំថា ត្រូវតែទិញនោះទេ តែគាត់ផ្តាំផ្ញើថា គួរតែមានយ៉ាងហោចណាស់ មានបំពង់ពន្លត់អគ្គិភ័យនៅផ្ទះមួយបំពង់ដែរ » ៕
ចែករំលែកព័តមាននេះ