រាជធានីភ្នំពេញ ៖ អធិការនគរបាលខណ្ឌដង្កោបានឲ្យដឹងថា ជុំវិញរឿងរ៉ាវថាមានផ្ទះពលរដ្ឋរងគ្រោះដោយជំនន់ទឹកភ្លៀងត្រូវបានចោរគាស់លួចយកឥវ៉ាន់នោះ ជារឿងមិនពិតនោះទេ ព្រោះការពិតគឺមិនមែនជាករណីចោរគាស់ផ្ទះទេ គឺដោយសារម្ចាស់ផ្ទះគាត់ប្រញាប់ពេក ហើយមិនបានចាក់សោរតែប៉ុណ្ណោះ ។ ការបញ្ជាក់របស់លោកវរសេនីយ៍ឯក…
រាជធានីភ្នំពេញ ៖ អធិការនគរបាលខណ្ឌដង្កោបានឲ្យដឹងថា ជុំវិញរឿងរ៉ាវថាមានផ្ទះពលរដ្ឋរងគ្រោះដោយជំនន់ទឹកភ្លៀងត្រូវបានចោរគាស់លួចយកឥវ៉ាន់នោះ ជារឿងមិនពិតនោះទេ ព្រោះការពិតគឺមិនមែនជាករណីចោរគាស់ផ្ទះទេ គឺដោយសារម្ចាស់ផ្ទះគាត់ប្រញាប់ពេក ហើយមិនបានចាក់សោរតែប៉ុណ្ណោះ ។
ការបញ្ជាក់របស់លោកវរសេនីយ៍ឯក ជឹម ស៊ីថា អធិការនគរបាលខណ្ឌដង្កោ បានធ្វើឡើងបន្ទាប់ពីកាលពីពេលថ្មីៗកន្លងទៅនេះ សមត្ថកិច្ចល្បាតនៅតំបន់ជន់លិចដោយជំនន់ទឹកភ្លៀងនៅភាគខាងត្បូងរាជធានីភ្នំពេញ រួមមានតំបន់រង្វង់មូលគួរស្រូវ វត្តព្រះធាតុ បុរីពិភពថ្មីគួរស្រូវ និងទីតាំងសំខាន់ៗនៅភាគខាងត្បូងក្រុងថា មានករណីចោរគាស់ផ្ទះ ហើយអំពាវនាវឲ្យម្ចាស់ផ្ទះមកពិនិត្យ និងដាក់ពាក្យបណ្តឹង ។
ជាក់ស្តែងកាលពីថ្ងៃទី១៧ ខែតុលា កន្លងទៅ លោកវរសេនីយ៍ឯក ជឹម ស៊ីថា អធិការនគរបាលខណ្ឌដង្កោ ដឹកនាំកម្លាំងចុះដល់ផ្ទះប្រជាពលរដ្ឋដែលហ្វេសប៊ុកផេកមួយចំនួនបានចុះផ្សាយថា មានករណីគាស់ផ្ទះ ខណៈពេលនេះម្ចាស់ផ្ទះគាត់បានបញ្ជាក់យ៉ាងច្បាស់ថា «មិនមែនជាករណីគាស់ផ្ទះទេ គឺដោយសារគាត់ប្រញាប់ពេកមិនបានចាក់សោរផ្ទះ ហើយក៏មិនមានការបាត់បង់អ្វីដែរ» ។
ជាមួយគ្នានោះ ម្ចាស់ផ្ទះក៏បានថ្លែងអំណរគុណដល់សមត្ថកិច្ចទាំងអស់ដែលបានយកចិត្តទុក ដាក់ក្នុងការជួយសង្គ្រោះប្រជាពលរដ្ឋរងគ្រោះ ការពារសន្តិសុខសុវត្ថិភាព និងការពារទ្រព្យសម្បត្តិជូនប្រជាពលរដ្ឋ ។
សូមបញ្ជាក់ថា សេចក្តីបកស្រាយបំភ្លឺ និងបដិសេធរបស់ក្រុមការងារព័ត៌មាន និងប្រតិកម្មរហ័សនៃស្នងការដ្ឋាននគរបាលរាជធានីភ្នំពេញ ចំពោះករណីដែលមានផេកហ្វេសប៊ុកមួយចំនួនបានចុះផ្សាយថា មានករណីចោរគាស់ផ្ទះប្រជាពលរដ្ឋនៅបុរីពិភពថ្មីនៅយប់ថ្ងៃទី១៥ ខែតុលា ឆ្នាំ២០២០ តាមការបញ្ជាក់របស់លោកស្នងការ និងលោកអធិការខណ្ឌដង្កោ ដែលប្រចាំការនៅយប់ថ្ងៃទី១៥ ខែតុលា បានបញ្ជាក់ថា មិនមានករណីគាស់ផ្ទះប្រជាពលរដ្ឋណាមួយឡើយ ។
ជាមួយនោះ សមត្ថកិច្ចចម្រុះតែងតែចេញល្បាតជាប្រចាំ ដើម្បីជួយសង្គ្រោះ និងការពារ ទប់ស្កាត់ កុំឲ្យមានជនឆ្លៀតឱកាសមួយចំនួនតូច បន្លំចូលលួច ឬគាស់ផ្ទះលួចទ្រព្យសម្បត្តិប្រជាពលរដ្ឋ ។
សូមបញ្ជាក់ថា សម្តេចតេជោ ហ៊ុន សែន នាយករដ្ឋមន្ត្រីកម្ពុជា កាលពីពេលថ្មីៗកន្លងទៅនាឱកាសចុះពិនិត្យ និងជួបពលរដ្ឋរងគ្រោះដោយទឹកជំនន់ និងត្រូវបានជម្លៀសចេញពីផ្ទះ ក៏បានបញ្ជាឲ្យសមត្ថកិច្ចត្រូវចុះល្បាតការពារផ្ទះពលរដ្ឋដែលជន់លិច កុំឲ្យមានចោរកម្ម ឬករណីចោរគាស់ផ្ទះនោះទេ ។
គួររំលឹកថា ៖ ទឹកជំនន់ មានជនឆ្លៀតឱកាស ចូលគាស់ផ្ទះលួចទ្រព្យសម្បត្តិ ក្នុងបុរីមួយកន្លែង៕
ចែករំលែកព័តមាននេះ