រាជធានីភ្នំពេញ ៖ បុរសជាគ្រូពេទ្យធ្មេញមួយរូបដែលបង្កឲ្យមានការជជែកវែកញែកពេញបណ្តាញសង្គមថាបានបើកឡានបុក និងថយក្រោយកិនជនរងគ្រោះ បណ្តាលឲ្យបាត់បង់ជីវិតអ្នកជិះម៉ូតូម្នាក់និងរងរបួសម្នាក់ទៀតនោះ ត្រូវបានបញ្ជួនទៅតុលាការក្រុងភ្នំពេញ កាលពីរសៀលថ្ងៃទី ១៧ ខែតុលា ឆ្នាំ២០២០…
រាជធានីភ្នំពេញ ៖ បុរសជាគ្រូពេទ្យធ្មេញមួយរូបដែលបង្កឲ្យមានការជជែកវែកញែកពេញបណ្តាញសង្គមថាបានបើកឡានបុក និងថយក្រោយកិនជនរងគ្រោះ បណ្តាលឲ្យបាត់បង់ជីវិតអ្នកជិះម៉ូតូម្នាក់និងរងរបួសម្នាក់ទៀតនោះ ត្រូវបានបញ្ជួនទៅតុលាការក្រុងភ្នំពេញ កាលពីរសៀលថ្ងៃទី ១៧ ខែតុលា ឆ្នាំ២០២០ ។
ក៏ប៉ុន្តែប្រភពពីតុលាការបានឲ្យដឹងថាដោយសារតែភ្លៀងខ្លាំងពេលកាលពីថ្ងៃសៅរ៍នោះ ក៏បានបញ្ជួនជនបង្កទៅស្នងការនគរបាលវិញ ហើយក៏មិនទាន់បានឃើញថាបញ្ជួនទៅតុលាការការក្រុងភ្នំពេញទេនៅព្រឹកថ្ងៃអាទិត្យទី ១៨ ខែតុលានេះ ។
យ៉ាងណាមិញ ស្នងការនគរបាលរាជធានីភ្នំពេញ បានឲ្យដឹងថា ជនបង្កដែលបើករថយន្តបុកម៉ូតូបណ្តាលឲ្យបុរសម្នាក់បាត់បង់ជីវិត និងម្នាក់ទៀតរបួសធ្ងន់ ត្រូវបានសមត្ថកិច្ចការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ បញ្ជូនទៅសាលាដំបូងរាជធានីភ្នំពេញ នៅវេលាម៉ោង ១៣:៣០នាទីរសៀល ។
សូមរម្លឹកថា កាលពីថ្ងៃទី១៥ ខែតុលា ឆ្នាំ២០២០ វេលាម៉ោង២៣និង៣០នាទីយប់ នៅចំណុច ផ្លូវ១៧៣ ប្រសព្វផ្លូវ៣២៨ ស្ថិតក្នុងសង្កាត់ទួលស្វាយព្រៃទី១ ខណ្ឌបឹងកេងកង មានករណីគ្រោះថ្នាក់ចរាចរណ៍មួយកើតឡើង រវាងរថយន្តម៉ាក Lexus NX 200T ពណ៌ខ្មៅ ពាក់ផ្លាកលេខភ្នំពេញ 2BH-8494 ជាមួយម៉ូតូម៉ាក Honda C125 ពណ៍ខ្មៅ ពាក់ផ្លាកលេខ កណ្តាល 1AI-3848 ។
រថយន្ត Lexus 200T បានបើកបរតាមបណ្តោយផ្លូវ១៧៣ ទិសដៅពីជើងទៅត្បូង ដល់កន្លែងកើតបានបុកម៉ូតូពីក្រោយ រួចបើកថយកិនបន្ថែមទៀត បណ្តាលឲ្យអ្នកបើកម៉ូតូបាត់បង់ជីវិតនៅកន្លែងកើតហេតុ និង អ្នករួមដំណើរម៉ូតូ របួសធ្ងន់ ។
អ្នកបើកបររថយន្តបង្កមានឈ្មោះ យ៉ាន់ណា លីណា ភេទប្រុស អាយុ ៣០ឆ្នាំ ជនជាតិខ្មែរ មុខរបរពេទ្យធ្មេញ (ឃាត់ខ្លួនបណ្តោះអាសន្ន ) ស្នាក់នៅផ្ទះលេខ៥អឹម ក្រុមទី៤ ភូមិព្រៃព្រីងខាងត្បូងទី១ សង្កាត់ចោមចៅទី២ ខណ្ឌពោធិ៍សែនជ័យ ។
ភាភីម៉ូតូជាជនរងគ្រោះបើកបរដោយឈ្មោះ ខុន តុង ភេទប្រុស អាយុ១៩ឆ្នាំ មុខរបរកម្មករសំណង់ ស្នាក់នៅផ្លូវបេតុង ភូមិ០១ សង្កាត់ស្ទឹងមានជ័យ១ ខណ្ឌមានជ័យ (បាត់បង់ជីវិត) និងអ្នករួមដំណើរឈ្មោះ ពៅ ម៉ត់ ភេទប្រុស អាយុ ១៧ឆ្នាំ មុខរបររត់កង់បី ស្នាក់នៅភូមិស្រះកែវ សង្កាត់ក្រាំងស្វាយ ស្រុកព្រះស្តេច ខេត្តព្រៃវែង ( របួសធ្ងន់ ) ៕ (កែសម្រួលដោយ ៖ ធីតា)
ចែករំលែកព័តមាននេះ