រាជធានីភ្នំពេញ ៖ ប្រិយមិត្តអ្នកនិយមបទចម្រៀង ជាពិសេសយុវវ័យប្រាកដជាបានស្គាល់អ្នកនិពន្ធទំនុកចម្រៀងដ៏ល្បីឈ្មោះ លោក សុខ ចាន់ផល យ៉ាងច្បាស់អំពីទឹកដៃតែងនិពន្ធ។ ក៏ប៉ុន្តែមហាជន និងអ្នកគាំទ្រស្នាដៃរបស់លោកហាក់ស្រងាកចិត្តសោកស្តាយជាពន់ពេក នៅពេលបានឃើញអ្នកនិពន្ធរូបនេះប្រកាសថារូបលោកអាចនឹងឈប់និពន្ធតទៅទៀត ។
លោក សុខ ចាន់ផល អ្នកនិពន្ធទំនុកចម្រៀង និងជាអ្នកនិពន្ធរឿងប្រលោមលោកដ៏មានប្រជាប្រិយភាពរូបនេះ បានប្រកាសលើហ្វេសប៊ុកយ៉ាងច្បាស់ៗថា « ខ្ញុំអាចនឹងឈប់សរសេរទំនុកច្រៀងជារៀងរហូត តែលោកអ្នកក៏នៅតែអាចស្ដាប់ឮបទចម្រៀងដែលខ្ញុំធ្លាប់សរសេរដដែល… ទេពកោសល្យរបស់ខ្ញុំ ខ្ញុំបានចាយវាអស់ហើយ ហើយខ្ញុំគ្រាន់តែសង្ឃឹមថា ខ្ញុំនឹងបានសម្រាកនៅក្នុងជីវិតចុងក្រោយនេះ» ។
យ៉ាងណាមិញ បន្ទាប់ពីឃើញសារមួយនេះរួចមក បានធ្វើអោយអ្នកគាំទ្រស្នាដៃរបស់ អ្នកនិពន្ធរឿង សង្សារ១៤ ថ្ងៃរូបនេះ បង្ហាញអារម្មណ៍សោកស្តាយយ៉ាងខ្លាំង និងមិននឹកស្មានថាលោក សុខ ចាន់ផល បែរជាសម្រេចចិត្តឈប់ការនិពន្ធភ្លាមៗបែបនេះ ហើយក៏មានការសំណូមពរពីអ្នកគាំទ្រស្នាដៃរបស់លោក អោយនៅបន្តសរសេរទំនុកច្រៀងបន្តទៀតផងដែរ ។
យ៉ាងណាមិញ ជុំវិញការប្រកាសថារូបលោកនឹងអាចឈប់តែងនិពន្ធបែបនេះក៏ដោយ តែអ្នកនិពន្ធរូបសង្ហារូបនេះ មិនបានបញ្ជាក់មូលហេតុនៅពីក្រោយការសម្រេចចិត្តលាឈប់ពីវិស័យតែងនិពន្ធនេះនៅឡើយទេ ។
គួរបញ្ចាក់ផងដែរថា លោក សុខ ចាន់ផល អាចជានិពន្ធដ៏មានប្រជាប្រិយភាពមួយរូប ដែលទទួលស្គាល់ពីអ្នកគាំទ្រជាច្រើនពីស្នាដៃរបស់លោក និងជាពិសេសបានផ្តល់ឧកាសអោយតារាចម្រៀងល្បីៗមួយចំនួន ទទួលបានប្រជាប្រិយភាពតាមរយៈការនិពន្ធរបស់លោកផងដែរ ៕
ចែករំលែកព័តមាននេះ