ខេត្តប៉ៃលិន ៖ អស់រយ:ពេលជាច្រើនថ្ងៃ ដែលមេឃបានបង្អុរភ្លៀងស្ទើរតែគ្មានពន្លឺ ហើយក៏បង្កទៅជាជំនន់ទឹកភ្លៀងលិចលង់ភូមិនានាជាច្រើន នៅក្នុងស្រុកសាលាក្រៅ និងខូចខាតដំណាំចម្ការប្រជាពលរដ្ឋរាប់សិបហិកតាផងដែរ ។
សង្កេតឃើញផលដំណាំពោតក្រហមរបស់ប្រជាពលរដ្ឋ ដែលត្រូវលិចលង់ដោយសារជំនន់ទឹកភ្លៀងនាពេលកន្លងមកបែបនេះ ពិសេសនៅក្នុងចំការខ្លះបានលិចលង់រហូតដល់ក្លាយទៅជារលួយ និងបានដុះបណ្តើរៗ ។ ទើបកាលពីថ្ងៃទី១៧ ខែតុលា ឆ្នាំ២០២០ ឯកឧត្តមនាយឧត្តមសេនីយ៍ អ៊ី ឈាន រដ្ឋលេខា ធិការក្រសួងការពារជាតិ និងជាប្រធានក្រុមការងារចុះជួយមូលដ្ឋានខេត្តប៉ៃលិន បានដឹកនាំមន្ត្រីរាជការ កងកម្លាំងប្រដាប់អាវុធ និងក្រុមយុវជនស.ស.យ.ក ខេត្ត ព្រមទាំងយុវជនកាកបាទក្រហមសាខាខេត្តប៉ៃលិន ចុះប្រមូលផលជូនពួកគាត់តែម្តង ។
ប្រភពព័ត៌មានបានឱ្យដឹងថា បន្ទាប់ពីឃើញប្រជាពលរដ្ឋជាច្រើនគ្រួសារ ជួបនឹងបញ្ហាប្រឈមលិចលង់ចម្ការដំណាំពោតក្រហមរបស់ខ្លួន ទើបឯកឧត្តម នាយឧត្តមសេនីយ៍ អ៊ឺ ឈាន រដ្ឋលេខាធិការក្រសួងការពារជាតិ និងដឹកនាំក្រុមការងារជាច្រើនស្ថាប័ន រួមមានកងកម្លាំងយោធា កងរាជអាវុធហត្ថខេត្ត កម្លាំងនគរបាល ចុះជួយប្រមូលភោគផលដំណាំពោតក្រហម ជូនប្រជាពលរដ្ឋរងគ្រោះ ដោយសារជំនន់ទឹកភ្លៀងនៅឃុំស្ទឹងត្រង់ ស្រុកសាលាក្រៅ ខេត្តប៉ៃលិន ។
ប្រភពបន្តទៀតថា ក្រុមការងារបាននាំគ្នាសស្រាក់សស្រាំ ជួយដោះស្រាយបញ្ហាជូនប្រជា ពលរដ្ឋដោយទឹកមុខញញឹម និងអំណរ ដោយមិនមានការត្អូញត្អែរពីភាពហត់នឿយនោះឡើយ ដោយអ្នកខ្លះកាច់ស្នៀតពោត អ្នកខ្លះលីសែង និងដឹកយកទៅទីទួល ដើម្បីដឹកតាមរថយន្តយកទៅលក់បន្ត ។ ប៉ុន្តែ ទោះបីជាយ៉ាងណា ក៏ដោយនៅតាមចម្ការមួយចំនួន ទទួលរងការខូចខាតអស់ច្រើន ដោយត្រូវទឹកហូរនាំធ្លាក់ចូលទៅតាមទឹកអូរអស់រលីង មិនអាចប្រមូលផលកើតនោះទេ ។
ចំណែកប្រជាពលរដ្ឋជាម្ចាស់ចម្ការ ក៍បានថ្លែងអំណរគុណចំពោះឯកឧត្តម អ៊ី ឈាន កងកម្លាំងទាំងបីប្រភេទ និងក្រុមការងារទាំងអស់ ដែលតែងតែជួយប្រមូលផលកសិផលជូនពួកគាត់ដែលរងគ្រោះលិចលង់ដោយទឹកជំនន់ ហើយក៏ខំប្រឹងប្រមូលផលទាំងភ្លៀងរលឹមថែមទៀត ។ ពួកគាត់ក៏សូមជួនពរឱ្យក្រុមការងារទទួលបាននូវជោគជ័យក្នុងភារកិច្ច ជាពិសេសបន្តជួយដល់ពលរដ្ឋនិងប្រទេសជាតិយើងឱ្យមានការរីកចម្រើនផងដែរ ៕
ចែករំលែកព័តមាននេះ