(បន្ទាយមានជ័យ)៖ ឯកឧត្តម ទេសរដ្ឋមន្ត្រី គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ ក្នុងនាមជាសេនាធិការរបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា នៅថ្ងៃទី១៧ ខែតុលា ឆ្នាំ២០២០នេះ បានបន្តដំណើរចុះទៅកាន់ខេត្តបន្ទាយមាន ជ័យទៀតហើយ ដើម្បីពិនិត្យស្ថានភាពជន់លិច និងជួយ សង្គ្រោះប្រជាពលរដ្ឋ។
ឯកឧត្តម ទេសរដ្ឋមន្ត្រី គន់ គីម និងលោក អ៊ុំ រាត្រី ក៏ដូចជាឯកឧត្តម ហ៊ុន ម៉ានី បានអញ្ជើញសួរសុខទុក្ខប្រជាពលរដ្ឋ ដែលជម្លៀសមកកាន់ទីទួលសុវត្ថិភាព ហើយក៏បានអញ្ជើញទៅកាន់ខ្នងផ្ទះប្រជាពលរដ្ឋផងដែរ។ ក្រៅតែពីការសាកសួរសុខទុក្ខឯកឧត្តម ទេសរដ្ឋមន្ត្រី គន់ គីម ក៏បាននាំយកអំណោយជាស្បៀងអាហាររបស់គណៈកម្មាធិការជាតិគ្រប់គ្រងគ្រោះមហន្តរាយមួយចំនួនជូនប្រជាពលរដ្ឋផងដែរ។
ឯកឧត្តម គន់ គីម បានមាន ប្រសាសន៍ប្រាប់ប្រជាពលរដ្ឋរងការជន់លិចទាំងអ្នកជម្លៀសមកទីទួលសុវត្ថិភាព និងនៅតាមខ្នងផ្ទះថា សម្តេចតេជោនាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត តាមដានជាប់ជានិច្ចចំពោះការលំបាករបស់ប្រជាពលរដ្ឋកើតពីជំនន់ទឹកភ្លៀងនេះ។ ឯកឧត្តម ទេសរដ្ឋមន្ត្រីបន្តថា «សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត លោកនឹករលឹកដល់បងប្អូនជាប់ជានិច្ច ហើយលោកបានផ្តាំផ្ញើ និងណែនាំដាច់ណាត់ឱ្យពួកយើងខ្ញុំនេះ យកចិត្តទុកដាក់ចំពោះបងប្អូនធ្វើយ៉ាងណាមិនឱ្យបងប្អូនរងគ្រោះថ្នាក់ដល់អាយុជីវិតពីទឹកជំនន់នេះ»។
ឯកឧត្តម ទេសរដ្ឋមន្ត្រី គន់ គីម បានថ្លែងទៅកាន់ប្រជាពលរដ្ឋរងគ្រោះទៀតថា ទុក្ខលំបាករបស់ប្រជាពលរដ្ឋ ក៏ជាទុក្ខរបស់សម្តេចតេជោនាយករដ្ឋមន្ត្រី និងរាជរដ្ឋាភិបាលទាំងមូលផងដែរ។ «សម្តេចតេជោ និងសម្តេចកិត្តិព្រឹទ្ធបណ្ឌិត លោកតែងតែខ្វល់ខ្វាយជាប់ជានិច្ចពីទុក្ខលំបាករបស់បងប្អូន។ សេចក្តីទុក្ខលំបាករបស់បងប្អូន ក៏ជាទុក្ខលំបាករបស់សម្តេចទាំងទ្វេ រួមនិងរាជរដ្ឋាភិបាលយើងដែរ។ សម្តេចទាំងទ្វេ រួមនិងរាជរដ្ឋាភិបាលនឹងប្រឹងប្រែងឱ្យអស់លទ្ធភាពជួយដោះស្រាយទុក្ខលំបាករបស់បងប្អូន។ តែពេលនេះយើងត្រូវរួមគ្នារក្សាជីវិតឱ្យបានពីគ្រោះមហន្តរាយដ៏ធំធេងនាពេលនេះ»។
ក្នុងដំណើរចុះសាកសួរសុខទុក្ខប្រជាពលរដ្ឋរងការជន់លិចនៅស្រុកមង្គលបុរី និងក្រុងសេរីសោភណនេះ ឯកឧត្តម ទេសរដ្ឋមន្ត្រី គន់ គីម ក៏បានណែនាំដល់កម្លាំងសង្គ្រោះ និងអាជ្ញាធរពាក់ព័ន្ធទាំងអស់ ត្រូវបន្តប្រតិបត្តិការដោយយកចិត្តទុកដាក់ជួយសង្គ្រោះប្រជាពល រដ្ឋ និងសោះស្រាយបញ្ហាប្រឈមទាំងឡាយរបស់ពួកគាត់ ។ ឯកឧត្តមទេសរដ្ឋមន្ត្រី គន់ គីម ក៏បានណែនាំដល់អាជ្ញាធរឱ្យចិត្តទុកដាក់បន្ថែមទៅលើសុខភាពរបស់ប្រជាពលរដ្ឋ ត្រៀមថ្នាំសង្កូវ ដាក់ពង្រាយក្រុមគ្រូពេទ្យ និងណែនាំពួកគាត់ឱ្យយកចិត្តទុកដាក់ថែទាំងសុខភាពកុំឱ្យកើតជំងឺតម្កាត់ផ្សេងៗទៀត។
ជួសមុខសម្តេចតេជោនាយករដ្ឋមន្ត្រី, ទេសរដ្ឋមន្ត្រី គន់ គីម ក៏បានថ្លែងអំណរគុណដល់អាជ្ញាធរខេត្តបន្ទាយមានជ័យ និងកម្លាំងសង្គ្រោះទាំងអស់ ដែលបានចេញប្រតិបត្តិការប្រកបដោយស្មារតីទទួលខុស ត្រូវដើម្បីសង្គ្រោះប្រជាពលរដ្ឋពីទឹកជំនន់ និងជួយឱ្យផុតគ្រោះថ្នាក់ដល់អាយុជីវិត។
សូមបញ្ជាក់ថា ខេត្តបន្ទាយមានជ័យ ក៏ជាខេត្តមួយដែលរងការជន់លិចខ្លាំងក្លាផងដែរពីជំនន់ទឹកភ្លៀង។ រហូតដល់ថ្ងៃទី១៧ ខែតុលា ឆ្នាំ២០២០នេះ ជំនន់ទឹកភ្លៀងក្នុងខេត្តបន្ទាយមានជ័យមិនទាន់ថមថយនៅឡើយនោះទេ។ របាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ បានឱ្យដឹងថា ទឹកជំនន់បានធ្វើឱ្យប៉ះពាល់ឃុំ/សង្កាត់ ចំនួន៣៥ ក្នុងស្រុកចំនួន៩ ប៉ះពាល់ប្រជាពលរដ្ឋជាង ៧ពាន់គ្រួសារ៕
ចែករំលែកព័តមាននេះ