ខេត្តឧត្តរមានជ័យ ៖ ទឹកភ្លៀងដែលបានធ្លាក់មកបន្តបន្ទាប់ធ្វើឲ្យកម្រិតបរិមាណ ៣៩ មម នាព្រឹកថៃ្ងទី១៧ ខែតុលា ឆ្នាំ២០២០ ទឹកដែលបានហូរមកពីស្រុកថ្មពួក ខេត្តបន្ទាយមានជ័យ បានបង្កឲ្យមានការជន់លិចនៅតំបន់មួយចំនួនក្នុងភូមិសាស្ត្រស្រុកបន្ទាយធំពិល ។ នេះបើតាមក្រសួងធនធានទឹក និងឧតុនិយមបានផ្សាយមុននេះបន្តិច។
សូមបញ្ជាក់ ៖ នាល្ងាចថ្ងៃទី១៦ ខែតុលានេះ ក្រសួងធនធានទឹក និងឧតុនិយម បានចេញសេចក្តីប្រកាសព័ត៌មានមួយ ស្តីពីស្ថានភាពអាកាសធាតុមកដល់ពេលនេះ ប្រពន្ធសម្ពាធទាបដែលអូសបន្លាយលើកម្ពុជា កាន់តែបង្កើនឥទ្ធិពលជាលំដាប់ ។
ចំណែកវិសម្ពាធ ដែលបានកើតនៅលើសមុទ្រចិនខាងត្បូង ដែលក្រសួងបានជូនដំណឹងថា វាក្លាយទៅជាព្យុះទី១៧ កាលពីថ្ងៃទី១៥ ខែតុលា ឆ្នាំ២០២០នោះ ពេលនេះវាស្ថិតនៅត្រឹមកម្រិតជាវិសម្ពាធដដែល ដោយមានល្បឿនខ្យល់ អតិបរមា ១៥ម៉ែត្រ ក្នុងមួយវិនាទី ដែលទាបជាងល្បឿនរបស់ព្យុះ (Tropical Storm) តែ២ម៉ែត្រ ក្នុងមួយវិនាទី តែប៉ុណ្ណោះ ។ វិសម្ពាធនេះ នឹងធ្វើដំណើរឆ្ពោះចូលមកលើភាគកណ្តាលប្រទេសវៀតណាម នៅថ្ងៃ១៧ ខែតុលា ឆ្នាំ២០២០ ។
ស្ថានភាពបែបនេះ នឹងធ្វើឲ្យភ្លៀងនៅតែបន្តធ្លាក់ច្រើន ពិសេសចាប់ពីថ្ងៃទី១៧ ដល់ថ្ងៃទី២១ ខែតុលា ឆ្នាំ២០២០ នៅតាមបណ្តាខេត្តភាគពាយ័ព្យ បណ្តាខេត្តនៅភូមិសាស្ត្រជាប់ក្បែរជួរភ្នំដងរែក ខ្ពង់រាបភាគឦសាន និងតំបន់ជួរភ្នំក្រវាញ នឹងអាចមានភ្លៀងធ្លាក់ខ្លាំងជាប់បន្ត ។ ចំណែកនៅតំបន់មាត់សមុទ្រ នឹងអាចមានភ្លៀងធ្លាក់ច្រើន និងនៅលើផ្ទៃសមុទ្រ មានភ្លៀងលាយឡំខ្យល់បក់បោក និងរលកសមុទ្រខ្ពស់ៗ ៕
ចែករំលែកព័តមាននេះ