រាជធានីភ្នំពេញ ៖ នៅទីបំផុត ភាគីថៃបានយល់ព្រមសុំទោសកម្ពុជា ចំពោះកំហុសខុសឆ្គងទៅលើការប្រើប្រាស់រូបភាពប្រាសាទអង្គរវត្ត នៅលើPosterនៅលើរឿងភាគមួយដែលត្រូវបានផលិតដោយទូរទស្សន៍ប៉ុស្តិ៍លេខ៣ថៃ បន្ទាប់ពីមានប្រតិកម្មយ៉ាងខ្លាំងពីប្រជាជនកម្ពុជា។
យោងតាមផេកហ្វេសប៊ុករបស់នាយកដ្ឋានភាពយន្តនៃក្រសួងវប្បធម៌និងវិចិត្រសិល្បះ បានបង្ហោះសារពាក់ព័ន្ធបញ្ហាខាងលើនៅថ្ងៃនេះថា នាយកដ្ឋានសិល្បភាពយន្ត និងផ្សព្វផ្សាយវប្បធម៌ នៃក្រសួងវប្បធម៌ និងវិចិត្រសិល្បៈ សូមជម្រាបជូនសាធារណជនទាំងអស់បានជ្រាបថា តាមរយ:ស្ថានទូតរាជាណាចក្រថៃប្រចាំនៅកម្ពុជា ស្ថានីយទូរទស្សន៍ប៉ុស្តិ៍លេខ៣ថៃ បានធ្វើការសុំអភ័យទោសចំពោះភាគីកម្ពុជា ក្នុងកំហុសនៃការប្រើប្រាស់រូបភាពប្រាសាទអង្គរវត្តលើ Poster ដោយពុំមានការអនុញ្ញាត។
ភាពយន្តភាគរឿងសន្យាស្នេហ៍ នេះ គឺសាច់រឿងពុំមានជាប់ទាក់ទងនឹងប្រាសាទអង្គរវត្តរបស់កម្ពុជាឡើយ ហើយទូរទស្សន៍ប៉ុស្តិ៍លេខ៣ថៃក៏បានលុបរូបប្រាសាទអង្គរវត្តចេញពីគ្រប់ការផ្សព្វផ្សាយទាំងអស់ក្នុងខ្សែភាពយន្តភាគរឿងនោះហើយ។
សេចក្តីដូចបានជម្រាបជូនខាងលើ សូមសាធារណជនមេត្តាជ្រាបជាព័ត៌មាន។
នាយកដ្ឋានភាពយន្ត និងផ្សព្វផ្សាយវប្បធម៌ នៃក្រសួងវប្បធម៌ និងវិចិត្រសិល្បៈ សូមថ្លែងអំណរគុណចំពោះជនរួមជាតិទាំងអស់ដែលតែងយកចិត្តទុកដាក់ស្រឡាញ់ ថែរក្សា និងការពារនូវវប្បធម៌ជាតិ ដែលជាភារកិច្ចរបស់កូនខ្មែរគ្រប់ៗរូប។
ជាការកត់សម្គាល់ មុនមានការសុំទោសពីភាគីថៃខាងលើនេះមហាជនខ្មែរ ជាពិសេសបណ្តាអ្នកលេងហ្វេសប៊ុកបានបញ្ចេញប្រតិកម្មយ៉ាងខ្លាំងចំពោះការប្រើប្រាស់ប្រាសាទអង្គរវត្តរបស់ខ្មែរនៅលើPoster ភាពយន្តភាគថៃមួយរឿង។ ពួកគេបានចាត់ទុកទង្វើមួយនេះថា មិនសាកសម និងខុសឆ្គង ត្បិតប្រាសាទអង្គរវត្តជារបស់ខ្មែរដែលពិភពលោកទទួលស្គាល់ ខណះពេលដែលថៃធ្វើបែបនេះនាំអោយបរទេសខ្លះមានភាន់ច្រឡំ។
ជាការកត់សម្គាល់បញ្ហាខាងលើនេះ ក៏មានអ្នកសិល្បះខ្មែរមួយចំនួនបានធ្វើការប្រតិកម្មផងដែរ ដោយពួកគេបានបង្ហោះសារបញ្ចេញមតិនៅលើបណ្តាញសង្គមរៀងៗខ្លួន។
តារាសម្តែងដែលកំពុងមានទីផ្សារខ្ពស់លោក អ៊ុន សិទ្ធា បានបង្ហោះសារថា ប្រាសាទខ្មែរ គឺមានតែមួយគ្មានពីរទេ ដូច្នេះក្នុងនាមខ្ញុំជាសិល្បះមួយរូបដែរ សូមធ្វើការមិនយល់ស្របសំរាប់ភាពយន្តភាគថៃ ដែលយករូបប្រាសាទអង្គរវត្តទៅផ្សព្វផ្សាយជាសាធារណៈ ដូចជាប្រាសាទប្រទេសខ្លួនឯងទៅវិញ ។ តែបេីសំរាប់សាសន៍ដទៃដូចជាអឺរ៉ុបរឺក៏ Holywood មកថតវាមិនជាអ្វី ផ្ទុយទៅវិញគឺមានតែជួយផ្សព្វផ្សាយអោយប្រទេស
ខ្មែរ ។
ភាពយន្តថៃឆ្លុះបញ្ចាំងបែបនេះធ្វេីអោយប្រទេសដទៃគេយល់ច្រឡំកាន់តែខ្លាំង ថាប្រាសាទខ្មែរជារបស់ថៃ រឺសៀម ។ ជាក់ស្តែងការឆ្លុះបញ្ចាំងពីវប្បធម៌អរិយធម៌ខ្មែរមិនសូវទូលំទូលាយដូចសាសន៍ដទៃផង វាអាចផ្តល់ផលប៉ះពាល់។
ចំណែកតារាសម្តែងវ័យក្មេងស្រស់ស្អាតកញ្ញា ណាត់ ទីយ៉ា ក៏បានបង្ហះសារស្រដៀងគ្នាដែរថា ប្រាសាទខ្មែរ គឺមានតែមួយគ្មានពីរទេ ដូច្នេះក្នុងនាមខ្ញុំជាសិល្បះមួយរូបដែរ សូមធ្វេីការមិនយល់ស្របសំរាប់ភាពយន្តភាគថៃ ដែលយករូបប្រាសាទអង្គរវត្តទៅផ្សព្វផ្សាយជាសាធារណៈ ដូចជាប្រាសាទប្រទេសខ្លួនឯងទៅវិញ ។
ការឆ្លុះបញ្ចាំងបែបនេះធ្វេីអោយប្រទេសដទៃគេយល់ច្រឡំកាន់តែខ្លាំង ថាប្រាសាទខ្មែរជារបស់ថៃ រឺសៀម ។ នាងបញ្ជាក់ថា ជាក់ស្តែងការឆ្លុះបញ្ចាំងពីវប្បធម៌អរិយធម៌ខ្មែរមិនសូវទូលំទូលាយដូចសាសន៍ដទៃផង វាអាចផ្តល់ផលប៉ះពាល់។
ក្នុងនាមជាកូនខ្មែរត្រូវតែជួយគ្នាការពារវប្បធម៌របស់ពួកយើង ៕
ចែករំលែកព័តមាននេះ