រាជធានីភ្នំពេញ ៖ រថយន្តម៉ាកឡិចស៊ិស៥៧០មួយគ្រឿងរបស់លោកឧត្តមសេនីយ៍ឯក ម្នាក់ បានជួបគ្រោះថ្នាក់ចរាចរណ៍ត្រូវម៉ូតូមួយគ្រឿងបើកបុកពេញទំហឹង បណ្តាលអោយអ្នកបើកបរម៉ូតូបានរងរបួសធ្ងន់ ហើយរថយន្តស៊េរីទំនើបនោះបានបើកចេញពីកន្លែងកើតហេតុ ទាំងនាំគ្នាបិទស្លាកលេខទៅបាត់ ដោយសមត្ថកិច្ចពុំហ៊ានឃាត់ឡើយ ព្រោះជារថយន្តរបស់មេខ្លួន ។ ទន្ទឹមនឹងនោះ ក៏មានការរិះគន់ផងដែរ ទោះបីជាយ៉ាងណា ម្ចាស់ រថយន្តបានអោយកូនចៅនៅចាំដើម្បីដោះស្រាយសម្របសម្រួលជាមួយអ្នករងរបួស ។
ហេតុការណ៍គ្រោះថ្នាក់ខាងលើនេះបានកើតឡើងកាលពីវេលាម៉ោងប្រមាណ១១និង៥០នាទីថ្ងៃត្រង់ថ្ងៃទី១៦ ខែ តុលាឆ្នាំ ២០២០ នៅចំណុចផ្លូវលេខ៣៣១ កែងផ្លូវលេខ ៥៧៤ខាងលិច វិទ្យាល័យឥន្ទ្រទេវី សង្កាត់បឹងកក់ទី២ ខណ្ឌទួលគោក រាជធានីភ្នំពេញ។
រថយន្តមួយគ្រឿងដែលជួបគ្រោះថ្នាក់ខាងលើម៉ាកឡិចស៊ិស ៥៧០ ពណ៌ខ្មៅ ពាក់ស្លាកលេខ ភ្នំពេញ ២BK-៧៧៩៩ ដែលសមត្ថកិច្ចអះអាងថា ជារថយន្តរបស់លោកឧត្តមសេនីយ៍ឯកម្នាក់ ។ ចំណែកម៉ូតូពាក់ស្លាកលេខ ទ.៩៤៧៩ ភព១ បើកបរដោយបុរសម្នាក់ បានរងរបួសធ្ងន់ត្រូវបានរថយន្តបញ្ជូន ទៅសង្គ្រោះនៅគ្លីនិកឯកជន ។
តាមសាក្សីបានអោយដឹងថា មុនពេលកើតហេតុ គេឃើញបុរសរងរបួសម្នាក់ខាងលើបានជិះម៉ូតូមួយគ្រឿងតាមបណ្តោយផ្លូវលេខ ៥៧៤ ក្នុងទិសដៅពីកើតទៅលិច ដោយល្បឿនលឿន លុះពេលមកដល់ចំណុចផ្លូវកែង ក៍បានបុកចំកណ្តាលរថយន្តម៉ាកឡិចស៊ិស ៥៧០ដែលធ្វើដំណើរតាមផ្លូវលេខ ៣៣១ ក្នុងទិសដៅពីជើងទៅត្បូង។
តាមប្រភពព័ត៌មានខាងលើបានអោយដឹងទៀតថា គ្រោះថ្នាក់នោះបណ្តាលអោយអ្នកបើកបរម៉ូតូបានរងរបួសធ្ងន់បែកមុខ ហើយដេកស្តូកស្តឹងនៅលើដងផ្លូវ ។ ចំណែក រថយន្តរងការខូចខាតក្រពិតចំហៀងខាងឆ្វេង និងផ្ទុះពោងសុវត្តិភាព ។
បន្ទាប់ពីគ្រោះថ្នាក់ គេឃើញនគរបាលមូលដ្ឋានបានចុះទៅដល់កន្លែងកើតហេតុ ហើយអ្នកបើកបរបានហៅគ្នាមកចេញមុខសម្របសម្រួលជាមួយនគរបាលលមូលដ្ឋានដោយអោយរថយន្តចេញពីកន្លែងកើតបាត់ទៅ ។ ចំណកជនរងគ្រោះត្រូវរថយន្តដឹកបញ្ជូនទៅកាន់មន្ទីរពេទ្យ។
នៅកន្លែងកើតហេតុ គេឃើញភាគីខាងរថយន្ត ក៍បាននៅចាំទំនាក់ទំនង់ជាមួយបងប្អូនជនរងគ្រោះ ដើម្បីសម្របសម្រួលគ្នាផងដែរ ។ ម៉ូតូត្រូវបាននគរបាលយកទៅរក្សាទុក នៅអធិការដ្ឋានខណ្ឌទួលគោកដើម្បីទុកប្រគល់អោយម្ចាស់វិញ ៕ (កែសម្រួលដោយ ៖ ធីតា)
ចែករំលែកព័តមាននេះ