ខេត្តបាត់ដំបង ៖ យុវជនម្នាក់បានបាត់បង់ជីវិតខណៈពេលបញ្ជូនដល់មន្ទីរពេទ្យ ក្រោយពីជួបឧប្បតិហេតុគ្រោះចរាចរណ៍ដ៏រន្ទត់មួយរវាងម៉ូតូជាមួយនឹងម៉ូតូ កាលពីម៉ោង៦និង៣០នាទីល្ងាច ថ្ងៃទី១៥ ខែតុលា ឆ្នាំ២០២០ នៅលើកំណាត់ផ្លូវទៅកាន់ប្រសាទបាណន់ ត្រង់ចំណុចភូមិបត់សាលា ឃុំឈើទាល ស្រុកបាណន់ ខណៈភាគីម្ខាងទៀតរងរបួស២នាក់។
បើតាមសមត្ថកិច្ចបានឱ្យដឹងថា ជនរងគ្រោះដែលបាត់បង់ជីវិតខាងលើឈ្មោះ ម៉ឹង ពិសិដ្ឋភេទប្រុស អាយុ២៤ឆ្នាំ រស់នៅភូមិបាយដំរាំ ឃុំបាយដំរាំ ស្រុកបាណន់ ដំបូងឡើយយុវជនរូបនេះរបួសធ្ងន់តែ តែក្រោយមកក៏បានបាត់បង់ជីវិតក្រោយពេលដឹកដល់មន្ទីរពេទ្យ។ ដោយឡែកភាគីម្ខាងទៀតរបួសស្រាល២នាក់ គឺឈ្មោះ ឡេង ឈួន អាយុ៥២ឆ្នាំ និង ប្រពន្ធរបស់គាត់ឈ្មោះឌួង ម៉ាលី ដែលរស់នៅក្រុងបាត់ដំបង។
បើតាមសមត្ថកិច្ចបានប្រាប់ថា ភាគីទាំង២បានជួបគ្រោះថ្នាក់ ខណៈពេលធ្វើដំណើរផ្ទុយគ្នា ដោយសារភាគីដែលបាត់បង់ជីវិតបានជិះម៉ូតូឡើងវ៉ារថយន្ត តែមិនបានសម្រេច។
សមត្ថកិច្ចបានបញ្ជាក់ថា បើតាមការពិនិត្យបឋមនៅទីកន្លែងកើតហេតុ និងការបំភ្លឺនានាពីសាក្សីផងនោះ គឺឧប្បតិហេតុគ្រោះថ្នាក់ចរាចរណ៍នេះបានកើតឡើងដោយសារយុវជនរងគ្រោះឈ្មោះ ម៉ឹង ពិសិដ្ឋ ដែលជិះម៉ូតូខ្វះការប្រុងប្រយ័ត្ន និងបំពានច្បាប់ចរាចរណ៍។
បើតាមសាក្សីបានប្រាប់សមត្ថកិច្ចវិញថា យុវជនរូបនោះជិះម៉ូតូលឿង លុះដល់ចំណុចកើតហេតុ យុវជនរូបនេះបានព្យាយាមបន្ថែមល្បឿនឡើង ដើម្បីវ៉ាជែងរថយន្តមួយគ្រឿងទៀត តែឡើងមិនផុតក៏ជ្រុលទៅបុកម៉ូតូភាគីម្ខាងទៀតដែលជិះដោយ២នាក់ប្ដីប្រពន្ធ ទើបបណ្ដាលឱ្យគ្រោះថ្នាក់ខ្លួនឯងដល់ជីវិតបែបនេះ។
ទោះបីជាយ៉ាងណា មន្ត្រីជំនាញបាននាំយកមធ្យោបាយទៅរក្សាទុកនៅអធិការស្រុក ដើម្បីចាត់ការតាមនីតិវិធីច្បាប់ហើយ៕
ចែករំលែកព័តមាននេះ