លោកអភិបាលខេត្តដឹកនាំកម្លាំងទប់ទឹកទំនប់ក្រវ៉ាត់ក្រុងប្រវែង១៥០ម៉ែត្រ(វីដេអូ)
- ស្វាយរៀង
ខេត្តស្វាយរៀង ៖ នៅថ្ងៃទី១៤ ខែតុលា ឆ្នាំ២០២០នេះ លោក ម៉ែន វិបុល អភិបាលខេត្ត និងជាមេបញ្ជាការឯកភាពខេត្ត…
ខេត្តស្វាយរៀង ៖ នៅថ្ងៃទី១៤ ខែតុលា ឆ្នាំ២០២០នេះ លោក ម៉ែន វិបុល អភិបាលខេត្ត និងជាមេបញ្ជាការឯកភាពខេត្ត បានដឹកនាំកម្លាំងមន្ត្រីរាជការកងកម្លាំងប្រដាប់អាវុធទាំង៣ប្រភេទមានចំនួនជាង៣០០នាក់ទៅទប់ទឹកទំនប់ក្រវ៉ាត់ក្រុងស្វាយរៀង ប្រវែង១៥០ម៉ែត្រ ចាប់ពីភូមិពោធិ៍តាហោ សង្កាត់ពោធិ៍តាហោ ដល់ភូមិតារាងបាល់ សង្កាត់គយត្របែក ក្រុងស្វាយរៀង ដែលកំពុងជន់លិចដោយសារតែជំនន់ទឹកភ្លៀង ដើម្បីកុំឲ្យហូរកាត់ថ្នល់ស្រុតខូច។
លោក ម៉ែន វិបុល មានប្រសាសន៍ថា នៅប៉ុន្មានថ្ងៃចុងក្រោយនេះ មានភ្លៀងធ្លាក់ខ្លាំងធ្វើឲ្យមានជំនន់ទឹកភ្លៀងជន់លិចផលដំណាំរបស់ប្រជាពលរដ្ឋនៅស្រុកចន្ទ្រា៦៧ហិកតា។នៅសង្កាត់ស្វាយរៀងក្រុងស្វាយរៀង ប៉ះពាល់លំនៅឋានប្រជាពលរដ្ឋ២៨គ្រួសារ។ ហើយមកដល់ថ្ងៃទី១៤ តុលានេះ ជំនន់ទឹកភ្លៀងជន់លិចអាងទន្លេវ៉ៃគោ និងលិចទ្វាបង្ហៀទឹកស្ពានពោធិ៍តាហោហើយ។
នៅចំណុចស្ថានីយជលសាស្ត្រទន្លេវ៉ៃគោវិញ មានកម្ពស់ទឹក៣,១៤ម៉ែត្រនៅថ្ងៃទី១៤តុលានេះ គឺពុំទាន់ដល់ចំណុចប្រកាសអាសន្ននៅឡើយទេ។ ក៏ប៉ុន្តែអាជ្ញាធរខេត្តបានត្រៀមកម្លាំងសមត្ថកិច្ចដោយហ្វឹកហាត់ត្រៀមចុះអន្តរាគមន៍សង្គ្រោះប្រជាពលរដ្ឋពេលមានគ្រោះថ្នាក់ដោយយថាហេតុនៃគ្រោះធម្មជាតិជំនន់ទឹកភ្លៀនេះ និងបានត្រៀមស្បៀងសង្គ្រោះ និងបានចែកជូនប្រជាពលរដ្ឋរងគ្រោះចំនួន២៨គ្រួសារ ដែលរងគ្រោះលិចលំនៅឋានក្នុងក្រុងស្វាយរៀង នាព្រឹកថ្ងៃទី១៤ តុលានេះ។
លោក សុខ សុទ្ធាវុធ បានឲ្យដឹងថា ក្រុមការងារមន្ទីរកសិកម្មរុក្ខាប្រមាញ់ និងនេសាទ និងអាជ្ញាធរស្រុកចន្ទ្រា បានចុះពិនិត្យជាក់ស្ដែងដំណាំស្រូវដែលរងផលប៉ះពាល់ដោយគ្រោះធម្មជាតិជំនន់ទឹកភ្លៀងនៅឃុំចន្ទ្រា ស្រុកចន្ទ្រា ដោយផ្អែកលើរបាយការណ៍របស់លោកមេឃុំចន្ទ្រា និងដោយសារភ្លៀងធ្លាក់ជាបន្តបន្ទាប់ មានការបើកទ្វារទឹកមកពីខាងលើ មានអាងទឹកដូនទយ អាងទឹកធ្លកកំបុត និងអាងទឹកស្វាយយា បណ្ដាលឲ្យលិចខូចស្រូវប្រជាពលរដ្ឋ។
លោកបានបន្តថា ដោយផ្អែកតាមការពិនិត្យជាក់ស្តែងផ្ទៃដីសរុបពីរភូមិមានចំនួន ៦៧ហិកតា ប៉ះពាល់ ៣៥ហិកតា ខូចខាតសរុប ៣២ហិកតាស្មើនឹង២៦គ្រួសារ។ ក្នុងនោះភូមិសែន ផ្ទៃដីសរុប៣៥ហិកតា ប៉ះពាល់សរុប២៥ហិកតា ខូចខាតទាំងស្រុង១០ហិកតា ស្មើ១០គ្រួសារ, ភូមិចន្ទ្រា ផ្ទៃដីសរុប៣២ហិកតា ប៉ះពាល់១០ហិកតា ខូចខាតទាំងស្រុង២២ហិកតា ស្មើ១៦គ្រួសារ ផ្ទៃដីដែលប៉ះពាល់ និងខូចខាតមានទីតាំងតាមមាត់អូរ និងបឹង។
លោកបានបន្តថា ក្នុងនាមមន្ទីរកសិកម្ម រុក្ខាប្រមាញ់ និងនេសាទខេត្ត តែងតែជំរុញឲ្យកសិករយកចិត្តទុកដាក់ស្ដាប់តាមការណែនាំរបស់ការិយាល័យកសិកម្មស្រុកដូចជា មន្ទីរកសិកម្មខេត្ត និងការព្យាករណ៍ឧតុនិយមមុនសម្រេចចិត្តធ្វើការដាំដុះ និងជ្រើសពូជដែលធន់ និងការរាំងស្ងួត ទឹកជំនន់ និងត្រៀមពូជសម្រាប់ធ្វើការដាំដុះស្ដារឡើងវិញនៅពេលទឹកស្រក។
ចំណែកលោក ណុប ទូច អនុប្រធានមន្ទីរធនធានទឹក និងឧតុនិយមខេត្តស្វាយរៀង បានឲ្យដឹងថា ចំពោះជំនន់ទឹកភ្លៀងនៅខេត្តស្វាយរៀង មិនទាន់ប៉ះពាល់ធ្ងន់ធ្ងរនោះទេ ឥឡូវលោកកំពុងតែចុះពិនិត្យមើលស្ថានភាពជំនន់ទឹកភ្លៀងនៅស្រុកចន្ទ្រា ខេត្តស្វាយរៀង៕
ចែករំលែកព័តមាននេះ