ខេត្តកំពង់ស្ពឺ ៖ ស្របពេលដែលអាជ្ញាធរ និងថ្នាក់ដឹកនាំកំពុងព្រួយបារម្ភអំពីគ្រោះទឹកជំនន់ ស្រាប់តែផ្ទះឈើមួយខ្នងទំហំ6គុណនឹង9ម៉ែត្រ ត្រូវបានភ្លើងឆាបឆេះខ្ទេចគ្មានសល់ ខណៈប្រពន្ធទៅធ្វើការរោងចក្រ រីឯប្តីរវល់ទៅមើលទឹកស្រែ ហើយការឆេះនេះនៅពុំទាន់ដឹងពីមូលហេតុនោះទេ តែតាមការអះអាងពីអ្នកភូមិដែលឃើញហេតុការណ៍បញ្ជាក់ថា ប្រហែលជាឆ្លងចរន្តអគ្គិសនី។
តាមប្រភពបានបញ្ជាក់ប្រាប់ថា ការឆាបឆេះនេះកើតឡើងកាលពីរសៀលថ្ងៃទី14 ខែតុលា ឆ្នាំ2020 នៅចំណុចភូមិដីក្រហម ឃុំព្រៃក្មេង ស្រុកភ្នំស្រួច ខេត្តកំពង់ស្ពឺ ចំណែគម្ចាស់ផ្ទះត្រូវបានស្គាល់ថា មានឈ្មោះ ថៃ សារិន អាយុ27ឆ្នាំ (ជាប្តី) ចំណែកប្រពន្ធឈ្មោះ រិន ឆាន្នី អាយុ26ឆ្នាំ និងមានកូន2នាក់នៅក្នុងបន្ទុកផងដែរ។
ប្រភពដដែលបានឱ្យដឹងថា មុនពេលកើតហេតុ គឺក្រុមគ្រួសារមិនបាននៅផ្ទះនោះទេ ខណៈប្រពន្ធទៅធ្វើការរោងចក្រ ចំណែកបុរសជាប្ដទៅមើលទឹកស្រែជាមួយកូនៗ លុះពេលត្រឡប់មកវិញ ក៏ស្រាប់តែឃើញភ្លើងឆាបឆេះផ្ទះយ៉ាងសន្ធោរសន្ធៅទៅហើយ។
ប្រភពដដែលបន្តទៀតថា ខណៈពេលភ្លើងកំពុងឆាបឆេះនោះ បុរសជាប្ដី និងអ្នកភូមិក៏បានស្វះស្វែងដងទឹកមកចាក់ពន្លត់ដែរ តែមិនអាចយកឈ្នះអំណាចភ្លើងបានឡើយ ហើយក៏បណ្ដាលឲ្យទ្រព្យសម្បត្តិលុយកាក់ជាច្រើនដែលទុកនៅលើផ្ទះ ត្រូវព្រះអគ្គីលេបត្របាក់ខ្ទេចគ្មានសល់ឡើយ។ ក្នុងហេតុការណ៍នេះដែរ បានបណ្ដាលឱ្យបុរសជាប្ដីរលាកភ្លើងយ៉ាងដំណំ ហើយត្រូវបានអ្នកភូមិបញ្ជូនទៅធ្វើការសង្គ្រោះបឋមនៅមណ្ឌលសុខភាពភ្នំស្រួច។
បើតាមអ្នកភូមិឃើញហេតុការណ៍បានបញ្ជាក់ថា មុនដំបូង គេបានឃើញមានផ្សែងហុយចេញពីផ្ទះកើតហេតុ លុះបន្តិចក្រោយមកស្រាប់តែចេញជាអណ្ដាតភ្លើងឆេះយ៉ាងសន្ធោរសន្ធៅតែម្ដង។ ហើយគ្រោះអគ្គិភ័យនេះ ត្រូវបានអ្នកភូមិ និងម្ចាស់ផ្ទះសន្និដ្ឋានថា អាចបណ្ដាលមកពីឆ្លងចរន្តអគ្គិសនី។
ពេលនេះ នៅមិនទាន់ដឹងពីទំហំនៃការខូចខាតទ្រព្យសម្បត្តិលុយកាក់របស់ម្ចាស់ផ្ទះរងគ្រោះនៅឡើយទេ ខណៈ សមត្ថកិច្ចមូលដ្ឋានបានត្រឹមតែធ្វើកំណត់ហេតុរាយការណ៍ជូនទៅថ្នាក់លើតែប៉ុណ្ណោះ៕
ចែករំលែកព័តមាននេះ