រាជធានីភ្នំពេញ ៖ ការប្រកួតបាល់ទាត់ដណ្ដើមពានរង្វាន់សម្តេចតេជោ ហ៊ុន សែន (Hun Sen Cup)មកដល់ពេលនេះបានឈានចូលដល់វគ្គពាក់កណ្ដាលផ្ដាច់ព្រ័ត្រហើយ បន្ទាប់ពីចំណាយពេលប្រកួតអស់ជាច្រើនខែ ខណៈនេះក៏មានក្រុមចំនួន ៤ ដែលមានកីឡាកររបស់ខ្លួននៅសល់ឱកាសប្រជែងស្បែកជើងមាស ប្រចាំឆ្នាំ ២០២០ នេះផងដែរ។
ក្រុមទាំង៤ដែលបានឡើងដល់វគ្គពាក់កណ្ដាលផ្ដាច់ព្រ័ត្រ រួមមាន ភ្នំពេញក្រោន,ណាហ្គាវើលដ៍, សមាគមកីឡាបាល់ទាត់ខេត្តព្រៃវែង និងវិសាខា ។ កីឡាករក្នុងក្រុមទាំង៤កំពុងស្ថិតនៅទីតាំងមួយដែលអាចមានលទ្ធភាពប្រជែងស្បែកជើងមាសពីកីឡាករ៣រូបផ្សេងទៀតដែលបច្ចុប្បន្នក្រុមរបស់កីឡាករទាំង៣បានជ្រុះចេញពីកម្មវិធីរួចទៅហើយ។
កីឡាករទាំងនោះរួមមាន៖ កីឡាករប្រាក់ ធីវ៉ា និងកីឡាករ លឹម ពិសុទ្ធ របស់ភ្នំពេញក្រោន (រកបានម្នាក់៣គ្រាប់)។ កីឡាករ វ៉ា សុខថន របស់ណាហ្គាវើលដ៍ (រកបាន២គ្រាប់)។ កីឡាករ វុធ តុលា របស់សមាគមកីឡាបាល់ទាត់ខេត្តព្រៃវែង(រកបាន៤គ្រាប់)។ កីឡាករ ស៊ិន កក្កដា កីឡាករ ស៊ិន សុផាណាត និងកីឡាករ ប៊ុនធឿន ប៊ុនណារ៉ុង របស់ក្លិបវិសាខា (រកបានម្នាក់៣គ្រាប់)។
ដោយឡែកកីឡាករ៣រូបដែលក្លិបរបស់ពួកគេបានធ្លាក់ចេញពីកម្មវិធីត្រឹមវគ្គ៨ក្រុមចុងក្រោយនោះរួមមាន កីឡាករ ជា ណាវីន (កងយោធពលខេមរភូមិន្ទ) ដែលកំពុងនាំមុខគេដោយរកបាន៥គ្រាប់ស្មើគ្នាជាមួយកីឡាករ សៀង ចន្ធា (បឹងកេត) និងកីឡាករ ម៉ាត់ នូរុណ (បឹងកេត) រកបាន៤គ្រាប់ ។
ករណីនេះ ប្រសិនបើកីឡាកររបស់ក្លិបទាំង៤ ដែលកំពុងកាន់គ្រាប់បាល់ក្នុងដៃរៀងខ្លួនដូចបានរៀបរាប់ខាងលើ មិនបន្តរកគ្រាប់បាល់បានទាំងនៅវគ្គពាក់កណ្ដាលផ្ដាច់ព្រ័ត្រ និងវគ្គផ្ដាច់ព្រ័ត្រនោះទេ កីឡាករ ជា ណាវីន របស់ក្រុមសមាគមកីឡាកងយោធពលខេមរភូមិន្ទ នឹងក្លាយជាម្ចាស់ស្បែកជើងមាស ពានរង្វាន់សម្តេចតេជោ ហ៊ុន សែន ឆ្នាំ២០២០ នេះតែម្ដង ហើយអាចឈានទៅបំបែកកំណត់ត្រាជាកីឡាករក្មេងជាងគេឈ្នះស្បែកជើងមាស ពានរង្វាន់សម្តេចតេជោ ហ៊ុន សែន ថែមទៀតផង។
សូមបញ្ជាក់ថា ការប្រកួតវគ្គពាក់កណ្ដាលផ្ដាច់ព្រ័ត្រពានរង្វាន់សម្តេចតេជោ ហ៊ុន សែន នឹងធ្វើឡើងនៅថ្ងៃទី២១ ខែតុលា សម្រាប់ជំនួបរវាងភ្នំពេញក្រោន ជាមួយណាហ្គាវើលដ៍ និងនៅថ្ងៃទី២២ ខែតុលា សម្រាប់ជំនួបរវាង ព្រៃវែង ជាមួយ វិសាខា លើទឹកដីកណ្ដាលពហុកីឡដ្ឋានជាតិ។
គួររំលឹកផងដែរថា ម្ចាស់ស្បែកជើងមាស ពានរង្វាន់សម្តេចតេជោ ហ៊ុន សែន កាលពីឆ្នាំ២០១៩ គឺបានទៅកីឡាករ វ៉ា សុខថន ដែលពេលនោះគេលេងឲ្យភ្នំពេញក្រោន បន្ទាប់ពីរកគ្រាប់បាល់បាន ១១គ្រាប់ ៕
ចែករំលែកព័តមាននេះ