រាជធានីភ្នំពេញ ៖ នៅលើសង្វៀនស៊ីអិនស៊ីថ្ងៃសៅរ៍ទី១៧ តុលា ខាងមុខនេះ កម្មវិធីប្រកួតប្រដាល់ដណ្ដើមប្រាក់លាននឹងវិលមកជួបទស្សនិកជនដែលនិយមទស្សនាកីឡាប្រដាល់ជាថ្មីទៀតហើយ ។ លើកនេះគណៈកម្មការរៀបចំការប្រកួតបានដាក់សុទ្ធតែគូខ្លាំងៗឱ្យប៉ះគ្នា ដើម្បីបំពេញបំណងអ្នកគាំទ្រវិស័យកីឡាប្រដាល់គុនខ្មែរដែលបានរង់ចាំអស់រយៈពេល១សប្ដាហ៍មកហើយ។
មន្ត្រីគ្រប់គ្រងចៅក្រម អាជ្ញាកណ្ដាល ប្រចាំសង្វៀនស៊ីអិនស៊ីបានឱ្យដឹងថា គូប្រកួតដណ្ដើមប្រាក់លាននៅក្នុងសប្ដាហ៍នេះមានដូចជា កីឡាករ ឈានហុង មកពីក្លិបខ្លារខិនមានរិទ្ធ ប្រកួតជាមួយកីឡាករ អេ ណារ័ត្ន មកពីក្លិបសាលវ័ន្តកីឡា និងកីឡាករលាភ រដ្ឋា មកពីក្លិបគោព្រៃគុនខ្មែរ ប្រកួតជាមួយកីឡាករ អេ ណារ័ត្ន មកពីសមាគមកីឡាប្រដាល់កងយោធពលខេមរភូមិន្ទ។
ឈៀន ហុង ធ្លាប់ធ្វើឱ្យទស្សនិកជនភាគច្រើនចាប់អារម្មណ៍យ៉ាងខ្លាំងអំពីបច្ចេកទេសប្រកួត
របស់គេនៅលើសង្វៀន ។ ជាពិសេសការប្រើស្នៀតកែងនិងជង្គង់របស់គេល្អខ្លាំងណាស់។ ទោះបីពេលនេះ គេរាងចាស់បន្តិចមែនតែកម្លាំងវិញនោះអាចប្រកួតបាន៥ទឹកពេញមិនចេះហត់នោះឡើយ ។ រវាងឈាន ហុង និងឡុង សំណាងធ្លាប់ប៉ះគ្នាចំនួន៤លើករួចមកហើយ ក្នុងនោះ
ឡុង សំណាង បានធ្វើឱ្យឈាន ហុង ចាញ់ពិន្ទុទាំងមិនអស់ចិត្តចំនួន៤លើកជាប់គ្នាតែម្ដង ។
ទោះបីជាជួបលទ្ធផលបែបនេះក្ដី ក៏ឈាន ហុង នៅតែចង់ឡើងសង្វៀនប្រកួតសងសឹកដដែល ។
លោក ឡុង សាលវ័ន្ត ដែលជាគ្រូបង្វឹករបស់កីឡាករ ឡុង សំណាង ប្រាប់ថា សិស្សរបស់លោកនឹងធ្វើឱ្យឈាន ហុង ជួបការបរាជ័យជាលើកទី៥មិនខាន ព្រោះអីឡុង សំណាង សព្វថ្ងៃក្រៅពីយ៉េន ឌី ណា គ្មានអ្នកណាអាចបង្ក្រាបគេបានឡើយ។ ពិសេសជាងនេះទៅទៀតនោះ ឡុង សំណាង ក៏មិនធ្វើឱ្យតំណែងជាម្ចាស់ប្រាក់លានធ្លាក់ទៅលើកណ្ដាប់ដៃឈាន ហុង បានដោយងាយនោះដែរ។
ចំណែកការប៉ះគ្នារវាងកីឡាករលាភ រដ្ឋា និងអេ ណារ័ត្ន វិញនោះពិបាកទាយទុកមុនខ្លាំងណាស់ថាអ្នកណាជាម្ចាស់ប្រាក់លាននោះ។
ម្យ៉ាងវិញទៀតគូនេះអត់ដែលប៉ះគ្នាពីមុនមកទេ។ប៉ុន្តែបើធ្វើការប្រៀបធៀបទៅលើថ្វីដៃប្រកួតវិញនោះគឺល្អម្យ៉ាងម្នាក់ ។ លាភ រដ្ឋា ល្អស្នៀតដៃនិងជង្គង់ ហើយកម្លាំងស៊ុហ្វរបស់គេក៏ខ្លាំងណាស់ដែរ អាចតស៊ូប្រកួតបាន៥ទឹកពេញដោយមិនលំបាក ។ ចំណែកអេ ណារ័ត្ន ជាអ្នកប្រដាល់ជើងថ្មីដែលទើបតែល្បីឈ្មោះប៉ុណ្ណោះទាំងស្នៀតកែងនិងជង្គង់ អាចប្រើការបាន គ្រាន់តែគេមានចិត្តឆេវឆាវបន្តិចប៉ុណ្ណោះ ។ ដូច្នេះបើចង់ដឹងកាន់តែច្បាស់ មានតែរង់ចាំមើលការប្រកួតជាក់ស្ដែងទាំងអស់គ្នាប៉ុណ្ណោះនៅថ្ងៃសៅរ៍ទី១៧ តុលា វេលាម៉ោង២រសៀលនៅលើសង្វៀនស៊ីអិនស៊ី៕
ចែករំលែកព័តមាននេះ