លោកមហាសេដ្ឋីជេហ្វ បេសូស (Jeff Bezos) ដែលជាស្ថាបនិករបស់ក្រុមហ៊ុន Amazon និងជាបុរសដែលមានជាងគេលើលោក បានចាប់ផ្តើមក្រុមហ៊ុនដែលធំជាងគេលើលោកនេះពីកន្លែងថតរថយន្តនៅផ្ទះរបស់លោកក្នុងឆ្នាំ ១៩៩៤។ បច្ចុប្បន្ននេះ…
លោកមហាសេដ្ឋីជេហ្វ បេសូស (Jeff Bezos) ដែលជាស្ថាបនិករបស់ក្រុមហ៊ុន Amazon និងជាបុរសដែលមានជាងគេលើលោក បានចាប់ផ្តើមក្រុមហ៊ុនដែលធំជាងគេលើលោកនេះពីកន្លែងថតរថយន្តនៅផ្ទះរបស់លោកក្នុងឆ្នាំ ១៩៩៤។ បច្ចុប្បន្ននេះ Amazon បានក្លាយជាហាងដែលមានលក់អ្វីៗសព្វគ្រប់បែបយ៉ាង។
Amazon បានចាប់ផ្តើមជាក្រុមហ៊ុនលក់សៀវភៅ មុននឹងពង្រីកទៅលក់ CD និង DVD នៅឆ្នាំ ១៩៩៧។ ពេលនោះលោកបេសូសបានផ្ញើអ៊ីមែលទៅកាន់អតិថិជនចំនួន ១ ពាន់នាក់ចោល និងសួរទៅពួកគេថា «ក្រៅពីអ្វីដែលពួកយើងលក់ក្នុងថ្ងៃនេះ តើអ្នកចង់មើលឃើញមានការលក់អ្វីទៀត?» ។ ជាក់ស្តែង មនុស្សដែលបានឆ្លើយតបគឺគ្រាន់តែប្រាប់ពីអ្វីដែលពួកគេមើលឃើញភ្លាមៗប៉ុណ្ណោះ។
ពេលនោះលោកបេសូសបែរជាគិតថា លោកអាចលក់អ្វីក៏បានដែរ ដែលជាហេតុធ្វើឲ្យ Amazon ពង្រីកទៅលក់គ្រឿងអេឡិចត្រូណិច ប្រដាប់ប្រដារក្មេងលេង និងផលិតផលជាច្រើនទៀត ។ នៅឆ្នាំ ១៩៩៩ លោកបេសូសបានចែករំលែកចក្ខុវិស័យដែលលោកមានសម្រាប់ Amazon ថា លោកចង់ធ្វើឲ្យ Amazon ក្លាយជាក្រុមហ៊ុនដែលផ្តោតសំខាន់លើអតិថិជនជាងគេលើពិភពលោក និងជាកន្លែងដែលអតិថិជនអាចរក និងប្រទះឃើញអ្វីទាំងអស់ដែលពួកគេចង់ទិញអនឡាញ។
លោកបានសរសេរថា «ពួកយើងនឹងស្តាប់អតិថិជន បង្កើតអ្វីថ្មីៗសម្រាប់ពួកគេ និងផ្តល់នូវហាងដែលមានលក្ខណៈផ្ទាល់ខ្លួនសម្រាប់អតិថិជនម្នាក់ៗ ខណៈដែលខិតខំប្រឹងប្រែងធ្វើឲ្យពួកគេជឿទុកចិត្តពួកយើងកាន់តែខ្លាំងឡើង។»
ខាងក្រោមគឺជាមេរៀនដែលអាជីវករដទៃអាចរៀនពីលោកបេសូសបាន៖
១. គំនិតសាមញ្ញៗក៏អាចជាគំនិតល្អដែរ
អ្នកមិនចាំបាច់គិតឃើញគំនិតដែលស្មុគស្មាញដើម្បីបង្កើតបានអ្វីដែលថ្មីនិងជោគជ័យទេ។ លោកបេសូសបានបង្ហាញឲ្យឃើញថា គំនិតសាមញ្ញៗ ដូចហាងលក់សៀវភៅអនឡាញ ក៏អាចត្រូវបានពង្រីកឲ្យក្លាយទៅជាអ្វីមួយដែលខុសពីមុនទាំងស្រុងដែរ។
២. ទទួលស្គាល់ថាអ្នកមិនអាចជៀសវាងការបរាជ័យបានទេ
លោកបេសូសធ្លាប់បាននិយាយក្នុងបទសម្ភាសន៍មួយកាលពីឆ្នាំ ២០១៤ ថា ការបរាជ័យរបស់លោកជាច្រើនបានធ្វើឲ្យលោកខាតបង់អស់រាប់ប៊ីលានដុល្លារ។ ប៉ុន្តែលោកបានបន្តថា «ការងារមួយរបស់ខ្ញុំគឺការជំរុញមនុស្សឲ្យមានភាពក្លាហាន។ វាពិតជាពិបាកណាស់។ ជាក់ស្តែង ការពិសោធន៍ងាយបរាជ័យណាស់។»
៣. និយាយជាមួយមនុស្សដែលមកពីក្រុមខុសពីអ្នក
ទោះជាមនុស្សមានលក្ខណៈដូចគ្នាច្រើនពិតមែនក្តី ពួកយើងមានតម្រូវការខុសៗគ្នា។ ការស្តាប់ពីទម្រូវការទាំងនោះអាចជួយធ្វើឲ្យអ្នកកាន់តែឆ្លាតវៃ និងធ្វើការសម្រេចចិត្តបានកាន់តែលឿនជាងមុនដែរ។ ពេលដែលព្យាយាមពង្រីក Amazon លោកបេសូសមិនបានគិតតែម្នាក់ឯង ឬសួរតែបុគ្គលិករបស់លោកទេ។ តែលោកបានសួរទៅកាន់អតិថិជនលោកដោយផ្ទាល់។
៤. ដើរមួយៗ
គ្មាននរណាម្នាក់ដែលអាចក្លាយជាអ្នកមានក្នុងមួយរំពេចភ្នែកទេ។ Amazon បានចំណាយអស់ ២៦ ឆ្នាំដើម្បីមានថ្ងៃនេះ ហើយក្រុមហ៊ុននេះបន្តព្យាយាមអភិវឌ្ឍន៍ និងបង្កើតអ្វីថ្មីៗមិនថាជោគជ័យឬបរាជ័យទេ។ លោកបេសូសក៏បានទទួលស្គាល់ដែរថា អ្វីៗត្រូវការពេលវេលា ហើយមនុស្សមិនមានផ្លូវកាត់ទេ ៕
ចែករំលែកព័តមាននេះ