ព្រោះតែការធ្វើដំណើរទាំងក្នុង និងឆ្លងប្រទេសត្រូវបានរឹតបន្តឹងព្រោះតែកូវីដ ១៩ ការប្រកបការងាររបស់មនុស្សជាច្រើនក៏មានលក្ខណៈខុសប្លែកពីមុនច្រើនផងដែរ។ មនុស្សកាន់តែច្រើនបានចាប់ផ្តើមធ្វើការពីចម្ងាយ ហើយវាកាន់តែមានការលំបាកសម្រាប់អ្នកដែលទើបតែចូលធ្វើការដំបូង។
សម្រាប់អ្នកដែលទើបតែចាប់ផ្តើមការងារដែលតម្រូវឲ្យអ្នកធ្វើការពីចម្ងាយ អ្នកគួរតែដើរតាមជំហានខាងក្រោមនេះប្រសិនបើអ្នកចង់មានឱកាសជោគជ័យខ្ពស់៖
១. ប្តូរកន្លែងធ្វើការ
លោកដេន ប្លេក (Dan Black) ដែលជាអ្នកជ្រើសរើសបុគ្គលិកប្រចាំក្រុមហ៊ុនប្រឹក្សាយោបល់ EY បានប្រាប់មកថា ពេលដែលចាប់ផ្តើមការងារថ្មី អ្នកគួរតែផ្លាស់ប្តូរបរិស្ថានធ្វើការរបស់អ្នកពេលដែលអ្នកធ្វើការពីផ្ទះ។ អ្នកអាចរៀបចំតុធ្វើការថ្មី ឬប្តូរបន្ទប់ធ្វើការទៅបន្ទប់ថ្មីមួយទៀត។ ការធ្វើដូច្នេះជួយឲ្យខួរក្បាលរបស់អ្នកគិតថាអ្នកកំពុងតែចាប់ផ្តើមអ្វីថ្មីដែលជំរុញទឹកចិត្តអ្នកឲ្យមានចិត្តចង់ធ្វើការជាងមុន។
២. និយាយជាមួយអ្នកគ្រប់គ្រងរបស់អ្នក
បន្ទាប់ពីចូលធ្វើការបានប៉ុន្មានថ្ងៃហើយ អ្នកគួរតែនិយាយជាមួយអ្នកគ្រប់គ្រងរបស់អ្នកដើម្បីដឹងពីអ្វីដែលពួកគេចង់មើលឃើញពីអ្នក។ អ្នកអាចសួរពីអ្វីដែលពួកគេចង់មើលឃើញអ្នកសម្រេចក្នុងរយៈពេល ៦ខែខាងមុខ ឬ១ឆ្នាំខាងមុខជាដើម។ ឬសួរពីអ្វីដែលពួកគេឲ្យតម្លៃជាងគេក្នុងការងារជាដើម។
ការធ្វើដូច្នេះមិនត្រឹមតែជួយឲ្យអ្នកយល់ដឹងពីស្ថាប័នការងាររបស់អ្នកកាន់តែច្បាស់ទេ តែអាចជួយឲ្យអ្នកយល់ដឹងពីគោលដៅ និងអ្វីដែលអ្នកអាចធ្វើដើម្បីជួយឲ្យស្ថាប័នការងារអ្នកសម្រេចគោលដៅទាំងនោះបានថែមទៀត។
៣. កំណត់ស្តង់ដារក្នុងការទំនាក់ទំនង
ពេលដែលអ្នកធ្វើការពីចម្ងាយ ការរៀនទំនាក់ទំនងគ្នាតាមប្រព័ន្ធឌីជីថលកាន់តែមានសារៈសំខាន់ដែរ។ នេះជាហេតុដែលអ្នកត្រូវតែសួរសមាជិកក្នុងក្រុមរបស់អ្នកឲ្យបានច្បាស់ថា តើមធ្យោបាយមួយណាជាមធ្យោបាយដែលល្អជាងគេសម្រាប់ទំនាក់ទំនងជាមួយពួកគេ? វាអាចជាអ៊ីមែល ការនិយាយផ្ទាល់មុខ ឬការឆាតតាម Facebook ជាដើម។ អ្នកអាចពិភាក្សាគ្នា និងចរចាដើម្បីរកមធ្យោបាយល្អបំផុតសម្រាប់ឲ្យមនុស្សទាំងអស់ទំនាក់ទំនងជាមួយគ្នាដោយរលូន។
ប្រសិនបើអ្នកគិតថាអ្នកត្រូវការពេលយូរដើម្បីសម្របខ្លួនទៅនឹងបរិស្ថានការងារថ្មីនេះ អ្នកត្រូវដឹងថាវាមិនមែនជាបញ្ហាទេ ជាពិសេសក្នុងពេលដែលសេដ្ឋកិច្ច និងសង្គមកំពុងប្រឈមមុខនឹងភាពមិនប្រាកដប្រជាព្រោះតែកូវីដ ១៩។ ប្រសិនបើអ្នកមានសំណួរ អ្នកគួរតែចំណាយពេលក្នុងការសួរស្ថាប័នការងាររបស់អ្នកឲ្យបានច្រើន និងទុកពេលឲ្យអ្នកសម្របខ្លួន ៕
ចែករំលែកព័តមាននេះ