ទោះជាមានការផ្ទុះជំងឺកូវីដ ១៩ ដែលបានបង្កនូវការចលាចលអស់រយៈពេលប៉ុន្មានខែដំបូងពិតមែនក្តី ភោជនីយដ្ឋានជាច្រើនក្នុងប្រទេសកម្ពុជាបានបន្តបើកដំណើរការជាធម្មតា ដែលបង្ហាញនូវសារៈសំខាន់នៃអាជីវកម្មទាំងនេះក្នុងជីវភាពរស់នៅប្រចាំថ្ងៃរបស់មនុស្ស។ ប្រសិនបើអ្នកជាម្ចាស់ភោជនីយដ្ឋានមួយរូបនោះ អ្នកអាចសាកល្បងគន្លឹះខាងក្រោមដើម្បីបង្កើនឱកាសជោគជ័យរបស់អ្នកក្នុងកំឡុងពេលជំនាន់កូវីដ ១៩ នេះ៖
១. ធានាថាភោជនីយដ្ឋានរបស់អ្នកមិនមានកូវីដ
មុនពេលមានការផ្ទុះជំងឺកូវីដ ១៩ កត្តាចម្បងសម្រាប់ភោជនីយដ្ឋាននីមួយៗគឺអនាម័យ។ គ្រាន់តែសក់មួយសសៃលើអាហារក៏អាចធ្វើឲ្យអ្នកបាត់បង់អតិថិជនមួយជារៀងរហូតដែរ។ ប៉ុន្តែបន្ទាប់ពីមានការផ្ទុះជំងឺកូវីដ ១៩មក គ្រាន់តែអនាម័យធម្មតាគឺមិនគ្រប់គ្រាន់ទេ។ អ្នកត្រូវតែរៀបចំកន្លែងអង្គុយឲ្យមានគម្លាតឆ្ងាយៗពីគ្នាព្រោះមនុស្សជាច្រើននៅតែព្យាយាមជៀសវាងមនុស្សដែលពួកគេមិនស្គាល់ដដែល។
លើសពីនេះទៅទៀត អ្នកត្រូវតែធានាថាតុ និងកៅអីត្រូវបានសម្អាតជាមួយនឹងអាល់កុលកម្ចាត់មេរោគជាប្រចាំ ហើយអ្នករត់តុ និងបុគ្គលិកផ្សេងៗក្នុងភោជនីយដ្ឋានត្រូវតែពាក់ម៉ាស់ផងដែរ។
២. កែសម្រួលផលិតផល ឬសេវាកម្មប្រសិនបើចាំបាច់
ប្រសិនបើអ្នកចង់ជោគជ័យក្នុងកំឡុងពេលនេះ អ្នកត្រូវតែមានគំនិតច្នៃប្រឌិតជាងមុន។ ឧទាហរណ៍ ភោជនីយដ្ឋានដែលធ្លាប់តែមានអតិថិជនអង្គុយទទួលទានអាហារក្នុងហាងជាច្រើនបានចាប់ផ្តើមផ្តល់សេវាកម្មដឹកជញ្ជូនដល់អតិថិជនតាមផ្ទះ។ ប្រសិនបើអ្នកកំពុងពិចារណាលើចំណុចនេះដែរ អ្នកអាចពិចារណាសហការជាមួយអាជីវកម្មដឹកជញ្ជូនដទៃទៀតបានដើម្បីកាត់បន្ថយការចំណាយ។
៣. យល់ចិត្តអតិថិជនរបស់អ្នក
កូវីដ ១៩ មិនត្រឹមតែប៉ះពាល់ដល់ភោជនីយដ្ឋាន និងសណ្ឋាគារទេ តែវាក៏ប៉ះពាលដល់ជីវភាពរស់នៅប្រចាំថ្ងៃរបស់មនុស្សដែរ។ មនុស្សមួយចំនួនថែមទាំងបានបាត់បង់ការងារ ឬមើលឃើញប្រាក់ចំណូលធ្លាក់ចុះព្រោះតែកូវីដ ១៩ ដែរ។ ក្នុងនាមជាអាជីវករ អ្នកត្រូវតែទទួលស្គាល់ចំណុចនេះ និងរកវិធីបង្ហាញទៅអតិថិជនអ្នកថាអ្នកពិតជាយល់ចិត្តរបស់ពួកគេពិតមែន។មានពេលខ្លះ គ្រាន់តែការសួរសុខទុក្ខ និងនិយាយសន្ទនាលេងក៏អាចធ្វើឲ្យមនុស្សម្នាក់មានអារម្មណ៍ធូស្រាលជាងមុនបានដែរ ៕
ចែករំលែកព័តមាននេះ