ខេត្តបន្ទាយមានជ័យ ៖ បើតាមសេចក្តីរាយការណ៍បានឱ្យដឹងថា ស្ត្រីម្នាក់ត្រូវបានគេប្រទះឃើញបាត់បង់ជីវិតដោយយកខ្សែអង្រឹងបញ្ចប់ជីវិតខ្លួនឯងមិនដឹងពីមូលហេតុ លុះទាល់តែអ្នកស្រុកធាក់ទម្លាយទ្វារបន្ទប់ទឹក ទើបដឹង និងបង្កឱ្យមានភ្ញាក់ផ្អើលតែម្តង កាលពីរសៀលថ្ងៃទី១៤ ខែតុលា ឆ្នាំ២០២០ ស្ថិតនៅភូមិចាន់គិរី សង្កាត់ និងក្រុងប៉ោយប៉ែត។
សេចក្តីរាយការណ៍បន្តថា ជនរងគ្រោះខាងលើឈ្មោះ សុច ផល្លា អាយុ៣៤ឆ្នាំ មុខរបរជាអ្នកលក់ផ្លែឈើ មានទីលំនៅក្នុងភូមិ-សង្កាត់កើតហេតុ។ ជនរងគ្រោះត្រូវគេឃើញដោយយកខ្សែអង្រឹងចងទៅនឹងដំបូលបន្ទប់ទឹក រួចចងភ្ជាប់នឹង.ករបស់ជនរងគ្រោះ ហើយជើងរបស់ជនរងគ្រោះដល់ឥដ្ឋការ៉ូ។
បើតាមស្ត្រីឈ្មោះ ភួង សីហា អាយុ៤៧ឆ្នាំ ជាអ្នកជិតខាងគ្រួសារងគ្រោះប្រាប់សមត្ថកិច្ចថា ដំបូងគ្មានអ្នកណាដឹងថាជនរងគ្រោះបាត់បង់ជីវិតនោះទេ។ ស្ត្រីរូបបន្តថា លុះមុនពេលផ្អើលឆោឡោនោះ កូនស្រីរបស់ជនរងគ្រោះម្នាក់ក្នុងចំណោម៤នាក់បានទៅប្រាប់ថា នាងចង់បត់ជើង តែទ្វារបន្ទប់ទឹកជាប់បើកមិនចេញ ក៏មកសុំឲ្យទៅជួយមើល។
ស្ត្រីដដែលបន្តថា លុះពេលគាត់ទៅដល់ចំណុចកើតហេតុ ក៏ធាក់ទ្វារបន្ទប់ទឹករបើក ទើបឃើញហេតុការណ៍នេះ និងភ្ញាក់ផ្អើលរត់ទាំងអស់គ្នាតែម្តង។
ចំណែកបុរសឈ្មោះ មឿង ធឿន អាយុ៤០ឆ្នាំ ត្រូវជាប្តីរបស់ជនរងគ្រោះនិយាយថា គ្រួសាររបស់គាត់មិនដែលមានទំនាស់អ្វីនឹងគ្នាទេ ហើយសព្វមួយដង ប្រពន្ធគាត់ក្រោយពេលធ្វើបាយម្ហូបឲ្យកូនៗរួច តែងតែទៅជួយលក់ដូរជាមួយ ប៉ុន្តែថ្ងៃនេះមិនឃើញទៅកន្លែងលក់ដូរសោះ ស្រាប់តែទទួលព័ត៌មានពីកូនៗតាមទូរស័ព្ទថា «ម៉ាក់បញ្ចប់ជីវិតខ្លួនឯងបាត់ហើយ» ទើបគាត់ដឹង។
ទោះជាយ៉ាងណា ពេលនេះនគរបាលប៉ុស្តិ៍រដ្ឋបាល និងអាជ្ញាធរបានចុះដល់កន្លែងកើតហេតុ និងកំពុងសាកសួរគ្រួសាសព ដើម្បីឈានទៅធ្វើការត្រួតពិនិត្យ និងធ្វើកោសលវិច្ច័យ៕
ចែករំលែកព័តមាននេះ