រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ទំនប់សណ្តរស្ទឹងព្រែកត្នោតហក់ឡើងខ្លាំងនៅយប់ថ្ងៃទី១៣ ខែតុលា ឆ្នាំ២០២០ បាននិងកំពុងប្រឈមការបាក់ ដោយសារតែជំនន់ទឹកភ្លៀងនៅតាមស្ទឹងព្រែកត្នោត ធ្វើឲ្យប្រជាពលរដ្ឋរាប់រយគ្រួសារនៅតាមសង្កាត់មួយចំនួនរបស់ខណ្ឌដង្កោ នឹងរងផលប៉ះពាល់ធ្ងន់ធ្ងរ។…
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ទំនប់សណ្តរស្ទឹងព្រែកត្នោតហក់ឡើងខ្លាំងនៅយប់ថ្ងៃទី១៣ ខែតុលា ឆ្នាំ២០២០ បាននិងកំពុងប្រឈមការបាក់ ដោយសារតែជំនន់ទឹកភ្លៀងនៅតាមស្ទឹងព្រែកត្នោត ធ្វើឲ្យប្រជាពលរដ្ឋរាប់រយគ្រួសារនៅតាមសង្កាត់មួយចំនួនរបស់ខណ្ឌដង្កោ នឹងរងផលប៉ះពាល់ធ្ងន់ធ្ងរ។
សេចក្តីរាយការណ៍បន្តថា តាំងពីល្ងាចរហូតមកដល់យប់ថ្ងៃទី១៣ ខែតុលា ឆ្នាំ២០២០នេះ លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម ព្រមទាំងអភិបាលរាជធានីភ្នំពេញ លោក ឃួង ស្រេង បាននិងកំពុងដឹកនាំក្រុមការងារបចេ្ចកទេសក្រសួង និងអាជ្ញាធរមូលដ្ឋាន ធ្វើការអន្តរាគមន៍ទប់ជំនន់ទឹកស្ទឹងព្រែកត្នោត នៅភូមិសាស្ត្រភាគខាងលិចរាជធានីភ្នំពេញ ហើយជាការអំពាវនាវរបស់ក្រសួងធនធានទឹក និងឧតុនិយម សូមបងប្អូនប្រជាពលរដ្ឋរស់នៅតាមបណ្តោយសណ្តរទំនប់ និងផ្នែកខាងក្រោមមេត្តាប្រុងប្រយ័ត្ន និងត្រៀមលក្ខណៈ ដើម្បីបញ្ជៀសនូវគ្រោះថ្នាក់ជាយថាហេតុពីជំនន់ទឹកភ្លៀងសណ្តរស្ទឹងព្រែកត្នោតនេះ។
អភិបាលរាជធានីភ្នំពេញ លោក ឃួង ស្រេង បានដាក់បទបញ្ជាដល់គណៈបញ្ជាការឯកភាពខណ្ឌទាំង១៤ សហការជាមួយស្នងការដ្ឋាននគរបាលរាជធានីភ្នំពេញ និងទីបញ្ជាការដ្ឋានអាវុធហត្ថ ត្រៀមកម្លាំងដើម្បីជួយអន្តរាគមន៍ និងជម្លៀសប្រជាពលរដ្ឋទៅកាន់ទីទួលមានសុវត្ថិភាពនៅពេលដែលទំនប់សណ្តរស្ទឹងបានបាក់ធ្លាយ ។
ចំពោះការរងផលប៉ះពាល់ទឹកភ្លៀងជន់លិចដល់ផ្ទះសម្បែងប្រជាពលរដ្ឋក្នុងខណ្ឌដង្កោធ្ងន់ធ្ងរជាងគេ រួមមាន៤សង្កាត់ គឺសង្កាត់ទៀន សង្កាត់គងណយ សង្កាត់ស្ពានថ្ម និងសង្កាត់សាក់សំពៅ សរុបទាំងអស់ជាង៥០០គ្រួសារ ។
ដោយឡែកទឹកភ្លៀងជន់លិចផ្ទះប្រជាពលរដ្ឋចំនួន១០សង្កាត់ គិតត្រឹមល្ងាចថ្ងៃទី១៣ តុលានេះ គឺកម្ពស់ទឹកនៅទ្វារទំនប់អាងទឹក៧មករា ឡើងដល់កម្ពស់ ៨,៨០ ម៉ែត្រ ធៀបនឹងម្សិលមិញកើនឡើង ០,៤៥ម៉ែត្របន្ថែម បានលើសកម្ពស់ឲ្យប្រុងប្រយ័ត្ន ៧ម៉ែត្រ ធ្វើឲ្យកម្ពស់ទឹកក្នុងស្ទឹងជិតស្មើនឹងខ្នងទំនប់នៅតាមទំនាបទីតាំងមួយចំនួន ។
ពេលនេះក្រុមការងារបច្ចេកទេសក្រសួង កំពុងខិតខំជួសជុលបិទរូងនាគដែលបានលេចចេញជាបន្តបន្ទាប់ ដោយប្រើប្រាស់គ្រឿងចក្រកាយដីលើក និងបង្ហាប់ទំនប់ ព្រមទាំងច្រកបាវខ្សាច់ទប់លើកកម្ពស់ខ្នងទំនប់ និងជាការចូលរួមបន្ថែមរបស់ក្រសួងធនធានទឹក និងឧតុនិយម ។ ស្របពេលនោះ លោករដ្ឋមន្ត្រីក៏បានឧបត្ថម្ភសំបកបាវចំនួន៣០០០បាវដល់សង្កាត់ទាំង៣ ជូនលោកស្រី គឹម ញឹម អភិបាលខណ្ឌដង្កោ ដើម្បីចូលរួមទប់ស្កាត់លំហូរទឹកលើតួទំនប់ទៅផ្នែកខាងក្រោមបង្កការលិចលង់ដល់លំនៅឋានប្រជាពលរដ្ឋ ។
ទោះបីយ៉ាងណា អភិបាលរាជធានីភ្នំពេញ បានបញ្ជាក់ថា នៅពេលនេះរាជធានីភ្នំពេញ រួមនឹងកងកម្លាំងបញ្ជាការដ្ឋានអង្គរក្ស បានត្រៀមកម្លាំងជាស្រេច ដើម្បីជួយសង្គ្រោះ ប្រជាពលរដ្ឋ ក្នុងនោះមានអូប័រ ២០-៣០គ្រឿង ព្រមទាំងរថយន្តធុនធំសម្រាប់ដឹកនាំជញ្ជូនសម្ភារៈ និងជម្លៀសប្រជាពលរដ្ឋទៅកាន់ទីទួលសុវត្ថិភាព។
គួររំលឹកថា ៖ សូមប្រយ័ត្ន! ទឹកស្ទឹងព្រែកត្នោតហក់ឡើងដល់ចំណុចប្រកាសអាសន្នហើយ ។
ចែករំលែកព័តមាននេះ