ខេត្តព្រៃវែង ៖ ផ្លូវកៅស៊ូលេខ៣១៣ គឺជាផ្លូវដ៏សំខាន់មួយដែលតភ្ជាប់ពីផ្លូវជាតិលេខ១ ត្រង់ចំណុចផ្សារកំពង់សឹង្ហ ចាក់មកជាប់និងផ្លូវជាតិលេខ១១ ត្រង់ចំណុចកែងស្នេហ៌ ដោយឆ្លងកាត់ស្រុកចំនួន២គឺស្រុកបាភ្នំ និងស្រុកពាមរក៌។ ប៉ុន្តែនៅព្រឹកថ្ងៃទី១៣ តុលានេះ អាជ្ញាធរខេត្តបានសំរេចបិទផ្លូវនេះជាបណ្តោះអាសន្នហើយ ដោយមិនអនុញ្ញាតអោយរថយន្តធំៗបើកឆ្លងកាត់នោះទេ ដោយសារតែកំណាត់ផ្លូវនេះ ត្រូវបានជំនន់ទឹកភ្លៀងហូរកាត់ខ្លាំង នៅចំណុខទំនប់បង្ហៀរបឹងស្នេហ៌ ក្នុងឃុំធាយ ស្រុកបាភ្នំ។
លោក ទេព ភារុណ អភិបាលស្រុកបាភ្នំ បានអោយដឹងថា ទំនប់បង្ហៀរបឹងស្នេហ៌នេះ ត្រូវបានទឹកហូរកាត់ច្រើនថ្ងៃហើយ ដោយសារតែជំនន់ទឹកភ្លៀង ប៉ុន្តែទឹកហូរកាត់តិចៗប៉ុណ្ណោះ គឺទើបតែរយៈពេល២ទៅ៣ថ្ងៃចុងក្រោយនេះ ភ្លៀងធ្លាក់ជ្រំរាល់ថ្ងៃ គួរផ្សំនិងទឹកហូរចាក់មកពីតាមវាលតាមព្រែកផ្សេងៗទៀត ធ្វើអោយកំពស់ទឹកកើនកាត់តែច្រើន និងហូរកាត់តាមទំនប់បង្ហៀរបឹងស្នេហ៌កាន់តែខ្លាំង ទើបអាជ្ញាធរខេត្តសំរេចបិទផ្លូវលេខ៣១៣នេះជាបណ្តោះអាសន្នតែម្តង ដើម្បីការពារកុំអោយអ្នកដំណើរជួបគ្រោះថ្នាក់ជាយថាហេតុ និងដើម្បីការពារផ្លូវកុំអោយខូចផងដែរ។
ទោះជាយ៉ាងណាក៏ដោយ លោកអភិបាលស្រុកបានបញ្ជាក់ថា ការបិទផ្លូវនេះគឺមិនបានបិទទាំងស្រុងនោះទេ គីបិទមិនអោយឆ្លងកាត់តែរថយន្តធំៗប៉ុណ្ណោះ ដោយតម្រូវអោយបើកវាងតាមផ្លូវផ្សេង គឺបើរថយន្តបើកមកពីផ្លូវជាតិលេខ១ ត្រូវវាងនៅចំណុចផ្លូវកែងតាសូរ ចាក់ទៅតាមឃុំទឹកថ្លា ឡើងទៅផ្លូវជាតិលេខ៨អាវិញ ចំណែករថយន្តធំៗដែលបើកមកពីក្រុងព្រៃវែង គឺត្រូវវាងទៅតាមទីប្រជុំជនអ្នកលឿង។ ដោយឡែកសំរាប់ម៉ូតូ រ៉ឺម៉ក និងក្រុមរថយន្តតូចៗ គឺនៅអនុញ្ញាតិអោយធ្វើចរាចរណ៌ឆ្លងកាត់ផ្លូវជាតិលេខ៣១៣នេះជាធម្មតា រហូតដល់មានការណែនាំថ្មី ពីមន្ត្រីជំនាញ និងអាជ្ញាធរខេត្ត នៅពេលខាងមុខ៕ (កែសម្រួលដោយ ៖ ធីតា)
ចែករំលែកព័តមាននេះ