រាជធានីភ្នំពេញ ៖ កម្លាំងសមត្ថកិច្ចនៃស្នងការរាជធានីភ្នំពេញ បានឆ្មក់ចុះបង្ក្រាបទីតាំង ភោជនីយដ្ឋានយីហោ ៦៦ដឺក្រេ ពាក់ព័ន្ធនឹងការប្រើប្រាស់គ្រឿងញៀន និងឃាត់ខ្លួនប្រុសស្រីជាង៦០នាក់ ។
ប្រតិបត្តិការចុះបង្ក្រាបខាងលើនេះបានធ្វើឡើងកាលពីវេលាម៉ោង១រំលងអាធ្រាត្រឈានចូលថ្ងៃទី១២ ខែតុលា ឆ្នាំ២០២០ នៅភោជនីយដ្ឋានយីហោ (ហុកសិបប្រាំមួយ ដឺក្រេ ផាប់និងឡោញ) ស្ថិតនៅតាមបណ្ដោយផ្លូវ២០៥ កែង៣៨៤ សង្កាត់ទួលស្វាយព្រៃ២ ខណ្ឌបឹងកេងកង រាជធានីភ្នំពេញ ។
ប្រតិបត្តិការចុះបង្ក្រាបទីតាំងខាងលើនេះដឹកនាំដោយផ្ទាល់ពីលោកឧត្ដមសេនីយ៍ទោ ហួត ចាន់យ៉ារ៉ាន់ ស្នងការរងទទួលផែនគ្រឿងញៀន នៃស្នងការរាជធានីភ្នំពេញ និងលោកវរសេនីយ៍ឯក ប៊ុន សត្យា នាយការិយាល័យព្រហ្មទណ្ឌកំរិតស្រាលនៃស្នងការរាជធានីភ្នំពេញ បានដឹកនាំកម្លាំងអន្តរាគមន៍ពិសេស ចុះឡោមព័ទ្ធ និងធ្វើការឆែកឆេរ ទីតាំងខាងលើមាន៥បន្ទប់ ព្រមទាំងធ្វើការឃាត់ខ្លួន បានមនុស្សប្រុសស្រីជាជនជាតិខ្មែរ ព្រមទាំងជនជាតិបរទេសមានជនជាតិចិននិងវៀតណាមចំនួន៦៤នាក់ និងបានដកហូតវត្ថុតាំងមួយចំនួន សង្ស័យថាជាសាធាតុញៀនផងដែរ ។
គួរបញ្ជាក់ផងដែរថា ទីតាំងខាងលើជាក្លឹបកម្សាន្ត បានប្រែក្លាយទៅជាភោជនីយដ្ឋាន ប៉ុន្តែមានលួចលាក់ប្រើថ្នាំគ្រវី និងគ្រឿងញៀន ។
ក្រោយពេលកើតហេតុ ជនសង្ស័យរួមទាំងវត្ថុតាងជារថយន្តនិងម៉ូតូជាច្រើនគ្រឿង ត្រូវបានសមត្ថកិច្ចបញ្ជូនខ្លួនទៅស្នងការដ្ឋាននគរបាលជាតិរាជធានីភ្នំពេញ ដើម្បីសាកសួរនិងចាត់ការតាមនីតិវិធី ៕ (កែសម្រួលដោយ ៖ ធីតា)
ចែករំលែកព័តមាននេះ