រាជធានីភ្នំពេញ ៖ មិនសរសើរមិន បាននៅពេលបានឃើញប្អូនប្រុសយ៉ុន ដារ័ត្ន ដែលពីមុនគឺជាមនុស្សដើរលេងប៉ោឡែ ប្រើប្រាស់គ្រឿងញៀនដោយមិនខ្វល់ពីអ្វីទាំងអស់ហើយត្រូវគេស្អប់ខ្ពើមមិនចង់និយាយរកនោះមកទល់ពេលនេះគេបានប្រែក្លាយខ្លួនជាមនុស្សម្នាក់មានឈ្នោះល្បីល្បាញនៅក្នុងពិភពប្រដាល់ ថែមទាំងធ្លាប់ដណ្ដើមបានមេដាយពីការប្រកួតកីឡាស៊ីហ្គេមទៀតផង ។
ជួបអ្នកយកព័ត៌មានកោះសន្តិភាព យ៉ុន ដារ័ត្ន បានរៀបរាប់ពីប្រវត្តិរបស់ខ្លួនជូនប្រិយមិត្តអ្នកអានបានជ្រាបថា លោកមានស្រុកកំណើតនៅខណ្ឌដង្កោ រាជធានីភ្នំពេញ ដែលមកដល់ពេលនេះមានអាយុ២១ឆ្នាំហើយ។ លោកបានបញ្ចប់ការសិក្សានៅត្រឹមថ្នាក់ទី៧ប៉ុណ្ណោះ ដោយសារតែកាលណោះលោកត្រូវបានមិត្តភក្ដិអូសទាញឱ្យដើរលេងប៉ោឡែដូចក្មេងពាល ចោលផ្ទះសម្បែង ទាំងយប់ទាំងថ្ងៃ ហើយថែមទាំងលង់ខ្លួនប្រើប្រាស់គ្រឿងញៀនទៀតផង ធ្វើឱ្យឪពុក ម្ដាយ បងប្អូនមានការពិបាកចិត្តយ៉ាងខ្លាំង ។ ប៉ុន្តែក្រោយមកលោកភ្ញាក់ខ្លួនងាកមកហាត់កីឡាប្រដាល់ក្បាច់គុនបូរាណខ្មែរនៅក្នុងក្លិបតាឡីដំរីមានរិទ្ធ ក្នុងឆ្នាំ២០១៥ជាមួយលោកគ្រូម៉ាក់ សុខន ។
លោកបញ្ជាក់ថា ការលះបង់ចោលអំពើពាលា សេពគ្រឿងញៀន មកហាត់ប្រដាល់រហូតមកទល់សព្វថ្ងៃនេះអត់មានអ្នកអូសទាញទេគឺលោកបានសម្រេចចិត្តដោយខ្លួនឯង ដោយសារតែលោកឃើញសិស្សច្បងមួយចំនួនមានឈ្មោះល្បីគេរាប់រកច្រើន ក៏មានបំណងចង់ក្លាយជាកីឡាករប្រដាល់ល្បីឈ្មោះមួយរូបដូចសិស្សច្បងដែរ។
យ៉ុន ដារ័ត្ន បន្តថា កាលពីចូលហាត់ដំបូងគឺហាត់ប្រដាល់ក្បាច់ខ្មែរបូរាណ ប៉ុន្តែដោយសារតែខាងសហព័ន្ធកីឡាប្រដាល់សាកលមើលឃើញលោកមានកាយសម្បទាល្អ ព្រមជាមួយទេពកោសលវាយល្អផងនោះ ក្រោយមកក៏បានជ្រើសរើសលោកឱ្យចូលហ្វឹកហាត់ប្រដាល់សាកលតែម្ដង ។
ចូលដល់ឆ្នាំ២០១៩ លោកបានជាប់ឈ្មោះជាកីឡាករជម្រើសជាតិផ្នែកប្រដាល់សាកល ហើយត្រូវបានសហព័ន្ធបញ្ជូនឱ្យទៅប្រកួតកីឡាស៊ីហ្គេមលើកដំបូងនៅប្រទេសហ្វីលីពីននិងដណ្ដើមបានមេដាយសំរឹទ្ធ១គ្រឿងមកជូនជាតិធ្វើឱ្យក្រុមគ្រួសារ ឪពុកម្ដាយ បងប្អូន ប្រពន្ធកូន មានមោទនភាពយ៉ាងខ្លាំងចំពោះរូបលោក ។
គួរឱ្យដឹងផងដែរថា ម្ចាស់មេដាយស៊ីហ្គេមឆ្នាំ២០១៩នៅហ្វីលីពីនរូបនេះ មានបងប្អូន៥នាក់ គេជាកូនទី៣នៅក្នុងគ្រួសារ និងបានរៀបការនៅក្នុងឆ្នាំ២០១៨ មានកូនស្រី១អាយុជាង១ខួប ។
សព្វថ្ងៃក្នុងចំណោមបងប្អូនប្រុសស្រីទាំង៥នាក់ ក្រៅពីរូបលោកនៅមានបងប្រុសមួយរូបទៀតក៏បានចាប់យកអាជីពជាអ្នកប្រដាល់ដែរ គឺកីឡាករ យ៉ុន តារា កំពុងហ្វឹកហាត់នៅក្នុងក្លិបជាមួយគ្នា ។ យ៉ុន ដារ័ត្ន បានប្រាប់ឱ្យដឹងទៀតថា សព្វថ្ងៃលោកកំពុងតែស្ថិតនៅក្នុងការប្រមូលផ្ដុំក្រុមជម្រើសជាតិ ដោយស្នាក់នៅនិងហ្វឹកហាត់ក្នុងពហុកីឡដ្ឋានជាតិសម្រាប់ត្រៀមចេញទៅប្រកួតកីឡាស៊ីហ្គេមឆ្នាំ២០២១នៅប្រទេសវៀតណាម និងត្រៀមប្រកួតដណ្ដើមមេដាយស៊ីហ្គេមលើកទី៣២ឆ្នាំ២០២៣ដែលកម្ពុជាទទួលធ្វើជាម្ចាស់ផ្ទះ ។
ទោះបីជាលោកជាប់ហ្វឹកហាត់ប្រដាល់សាកលក៏ដោយក៏មានពេលខ្លះលោកអាចឆ្លៀតពេលឡើងសង្វៀនប្រកួតប្រដាល់ក្បាច់បូរាណខ្មែរម្ដងម្កាលដែរ ដោយទទួលប្រាក់តម្លៃខ្លួនប្រកួតជាមួយបរទេសម្ដងៗមិនក្រោម៣០០ដុល្លារនោះទេ។ក្រៅពីនេះលោកថែមទាំងធ្លាប់ឈានជើងទៅប្រកួតនៅប្រទេសថៃជាញឹកញាប់ទៀតផង។
យ៉ុន ដារ័ត្ន បានបញ្ជាក់ថា លោកនឹងចាប់យកអាជីពជាកីឡាករប្រដាល់នេះជារៀងរហូត និងមានការសប្បាយចិត្តទៀតផង ។ ទោះបីថ្ងៃខាងមុខលោកប្រកួតលែងកើត ក៏លោកនឹងងាកទៅបើកក្លិបធ្វើជាគ្រូបង្ហាត់ដែរ ដើម្បីប្រមែប្រមូលក្មេងជំនាន់ក្រោយមកហ្វឹកហាត់ធ្វើយ៉ាងណាឱ្យពួកគេចៀសឆ្ងាយពីគ្រឿងញៀន ៕
ចែករំលែកព័តមាននេះ