រាជធានីភ្នំពេញ ៖ ការប្រកួតប្រដាល់របស់សង្វៀនប៉ុស្តិ៍លេខ៥បានបង្ហាញខ្លួនសាជាថ្មីក្រោយពេលបែកទស្សនិកជន១សប្តាហ៍។ទោះបីការប្រកួតធ្វើឡើងក្នុងលក្ខណៈបិទទ្វារនៅឡើយដោយសារខ្លាចកូវីដ-១៩ ក៏អ្នករៀបចំការប្រកួតប្រចាំស្ថាប័នទូរទស្សន៍មួយនេះ ប្រកាសថាមិនដាក់គូមាន់សម្លនាំឱ្យខូចកម្មវិធីនោះទេ ។ ជាក់ស្ដែងការប្រកួតពេលនោះឃើញថា ទាំងគូបើកឆាក និងគូដណ្តើមពានរង្វាន់មានសភាពកន្ត្រាក់អារម្មណ៍អ្នកទស្សនាតាមកញ្ចក់ទូរទស្សន៍ឱ្យលាន់មាត់សរសើរគ្រប់ៗគ្នា ។ នេះជាការប្រកួតក្នុងកម្មវិធីសែលកាតឆេមពានដែលបានរៀបចំឡើងកាលពីល្ងាចថ្ងៃ១០ តុលា ឆ្នាំ២០២០ នៅលើសង្វៀនប៉ុស្តីលេខ៥ ព្រែកកំពឹស។
គូបើកឆាកបង្គោលក្រហម ប៊ន ពន្លឹក មកពីក្លិបនាគរាជចតុម្មុខនៃក្រសួងមហាផ្ទៃ ប៉ះបង្គោលខៀវ ផុន សុខវិបុល មកពីក្លិបជ្រៃសែនជ័យខេត្តកំពង់ស្ពឺ ។ សកម្មភាពប្រកួតរបស់កីឡាករស្ទាវទាំង២រូបនេះ បានផ្ទុះការទាក់ទាញតាំងពីទឹកទី២តែម្តងក្រោយពេលមានការប្រកាសប្រាក់រង្វាន់លើកទឹកចិត្តនៅក្នុងទឹកទី២នោះជាពិសេសកីឡាករបង្គោលក្រហមហាក់បង្ហាញភាពស្វាហាប់ជាងមុន ។ នៅ៣ទឹកចុងក្រោយឃើញថា បង្គោលខៀវហាក់មានស្នៀតវាយលុកយ៉ាងសន្ឋាប់វិញ ធ្វើឱ្យបង្គោលក្រហមចង់ស្លេកមុខបាត់ជំហរម្តងម្កាល។
ក្រោមការចង្អុលបង្ហាញក្បាច់វាយពីក្រោមសង្វៀនឃើញថា ប៊ន ពន្លឹកចាប់បានចំណុចល្អៗ
រហូតវាយចូលគោលដៅវិញនៅទឹកទី៥ ។ ចុងក្រោយចប់ការប្រកួត ប៊ន ពន្លឹកឈ្នះ ផុន សុខវិបុលដោយពិន្ទុយ៉ាងប្រផិតប្រផើយ ព្រោះក្បាច់គុនមានប្រហាក់ប្រហែលគ្នា។
បង្គោលក្រហម ប៊ន ពន្លឹក បានអះអាងថា លោកប្រឹងប្រែងប្រដាល់មកទល់ពេលនេះ នៅមិនទាន់មានឱកាសឡើងប្រកួតក្នុងនាមគូឯក ឬ គូពិសេសនៅឡើយទេ ដោយឡើងប្រកួតគ្រប់លើកបានប្រកួតត្រឹមតែជាគូបើកឆាក ដែលលោកយល់ថាមិនសូវមានការចាប់អារម្មណ៍។
យ៉ាងណាមិញលោកថា សម្រាប់ការប្រកួតនៅប៉ុស្តិ៍លេខ៥មុននេះ គឺលោកត្រូវបានអ្នករៀបចំកម្មវិធី និងអ្នកសារព័ត៌មានចាប់អារម្មណ៍ ដោយលោកចាត់ទុកថា នេះគឺជំហានល្អមួយនៅក្នុងវិស័យប្រដាល់ ។ លោកថា ខ្លួនប្រឹងរាល់ថ្ងៃគឺមានឈ្មោះ ហើយបើអាចបានប្រកួតជាគូឯក ឬគូពិសេសនោះ គឺលោកកាន់តែសប្បាយចិត្តព្រោះជាអ្វីដែលលោកចង់បាន ។
លោកថា មិនតូចចិត្តទេ ដែលប្រកួតច្រើនប្រកួតមកហើយនៅតែគេឱ្យប្រកួតគូបើកឆាក ប៉ុន្តែក្នុងពេលដ៏ខ្លីពិតជាមានឱកាស ។ ក្នុងនោះលោកសង្ឃឹមថា ប៉ុស្តិ៍លេខ៥ នឹងមិនផ្អាកដំណើរការបិទទ្វារជាថ្មីម្ដងទៀតដែរ ដើម្បីឱ្យលោកឆាប់ចេញពីគូបើកឆាក ព្រោះប៉ុស្តិ៍លេខ៥ ស្គាល់ថ្វីដៃលោកស្រាប់។
លោក សេង កដិកា អ្នករៀបចំការប្រកួតប្រចាំប៉ុស្តិ៍លេខ៥ បានលើកឡើងថា ហេតុផលដែលលោកមិនទាន់ដាក់ ប៊ន ពន្លឹក ឱ្យក្លាយជាគូពិសេស គឺដោយសារតែសង្វៀនប្រដាល់ប៉ុស្តិ៍លេខ៥ ចង់ពង្រឹងគូបើកឆាកឱ្យនៅតែគូខ្លាំងសិន ដោយលោកប្រកាសថា ពេលខ្លះគូបើកឆាក គឺលោកដាក់កីឡាករល្អៗ និងដឹងពីសមត្ថភាពខ្លាំងជាងគូផ្សេងនោះផង ។ ក្នុងនោះលោកក៏ថានឹងពុះពារដំណើរការការប្រកួតរបស់ខ្លូនដោយមិនបិទចោលទៀតទេ បើទោះបីជានៅក្នុងកំឡុងពេលនេះ លោកសារភាពថា Sponsors មានការប៉ះពាល់ ហើយអ្នកចូលរួមឧបត្ថម្ភ
ក៏មានការកាត់បន្ថយចំណាយដែលធ្វើឱ្យការរៀបចំប្រដាល់របស់ខ្លួនពិបាកក្នុងការផ្ដល់តម្លៃមួយខ្ពស់ដល់កីឡាករតាមការចង់បាន ។ លោកលើកឡើងពីផលពិបាកថា ការរៀបចំប្រដាល់របស់ខ្លួនជាថ្មីទទួលបានកញ្ចប់ទាបជាងមុន និងមានការត្អូញត្អែរច្រើនពីអ្នកឧបត្ថម្ភកម្មវិធី និងថាធាតុពិតប៉ុស្តិ៍លេខ៥មិនអាចដំណើរការការប្រដាល់របស់ខ្លួនបានទៀតទេ តែស្ថាប័នរបស់លោកនៅតែពុះពារដើម្បីចូលរួមលើកស្ទួយវិស័យកីឡាប្រដាល់។
លោកថា កម្មវិធីដែលដំណើរការនៅក្នុងកំឡុងពេលនេះគឺជាបទពិសោធន៍មួយដ៏លំបាកតែក៏ធ្វើឱ្យក្រុមការងារទាំងមូលរឹងមាំផងដែរក្នុងអំឡុងពេលដែលមានជំងឺកូវីដផ្ទុះឡើងនេះ៕
ចែករំលែកព័តមាននេះ