ខេត្តកំពង់ធំ ៖ បើតាមសេចក្តីរាយការណ៍បានឱ្យដឹងថា ក្មេងប្រុសម្នាក់បណ្តែតខ្លួនលេងនៅបង្ហៀរទឹក ក៏ស្រាប់តែត្រូវទឹកហូរគួចទៅបាត់ បណ្តាលឱ្យលង់បាត់បង់ជីវិតតែម្តង ចំណែកឯបុរសម្នាក់ទៀតស្រវឹងស្រាដើរធ្លាក់ទឹកអូរធ្វើឱ្យបាត់បង់ជីវិតផងដែរ ។ ហេតុការណ៍នេះបានកើតឡើងក្នុងករណី២ផ្សេងគ្នាក្នុងថ្ងៃតែមួយ រំលងខុសគ្នាត្រឹមតែ១ម៉ោងប៉ុណ្ណោះ គឺថ្ងៃទី១១ ខែតុលា ឆ្នាំ ២០២០ នេះ។
ហេតុការណ៍ទី១- បានកើតឡើងនៅម៉ោង១១និង៣០នាទីព្រឹក ថ្ងៃទី១១ ខែតុលា ឆ្នាំ២០២០ ដោយជនរងគ្រោះមានឈ្មោះ ទួក ទី ភេទប្រុស អាយុ១៣ឆ្នាំ រស់នៅភូមិតាំងក្រសៅ ឃុំតាំងក្រសៅ ស្រុកប្រាសាទសំបូរ ខេត្តកំពង់ធំ ។
ប្រភពបានឲ្យដឹងថា នៅមុនពេលកើតហេតុ កុមារារងគ្រោះ និងមិត្តភក្តិ ព្រមទាំងសាច់ញាតិបាននាំគ្នាទៅងូតទឹក និងហែលលេងកំសាន្តនៅចំណុចតំបន់អូរអណ្តែង ដែលជាកន្លែងបង្ហៀរទឹក ស្ថិតនៅខាងកើតភូមិតាំងក្រសៅ ចម្ងាយប្រហែល២០០០ម៉ែត្រពីភូមិបង្ហៀរទឹកទីនោះ ដែលមានកម្លាំងទឹកហូរខ្លាំងផងដែរ។
ប្រភពដដែលបន្តថា ខណៈពេលនោះពួកគេបានឃើញជនរងគ្រោះបណ្តែតខ្លួនលេងទឹកយ៉ាងសប្បាយរីករាយលើបង្ហៀរទឹកផ្នែកខាងលើខ្សែទឹកហូរខ្លាំង ខណៈដែលជនរងគ្រោះកំពុងតែលេងដោយខ្វះការប្រុងប្រយ័ត្នផងនោះ ជនរងគ្រោះក៏ត្រូវទឹកហូរគួចខ្លាំងនាំយកទៅផ្នែកខាងក្រោម បណ្តាលឲ្យលិចបាត់ទៅក្នុងទឹកតែម្តង។ ទំរាំតែសាច់ញាតិបងប្អូនប្រជាពលរដ្ឋ និងសមត្ថកិច្ចជួយអន្តរាគមន៍រកឃើញនោះ គឺជនរងគ្រោះបានបាត់បង់អាយុជីវិតបាត់ទៅហើយ ដោយបន្សល់នូវទុក្ខសោកសម្រាប់ក្រុមគ្រួសារ និងសាច់ញាតិប៉ុណ្ណោះ។
ចំណែកហេតុការណ៍ទី២- បានកើតឡើងកាលពីម៉ោង១០និង២០នាទីព្រឹក ថ្ងៃទី១១ ខែតុលា ឆ្នាំ២០២០ ស្ថិតនៅភូមិទំពេជ្រ ឃុំទ្រា ស្រុកស្ទោង សពជនរងគ្រោះឈ្មោះ ឃន ខេន ភេទប្រុស អាយុ៤៥ឆ្នាំ នៅភូមិ-ឃុំកើតហេតុខាងលើ។
ប្រភពដដែលបន្តថា មុនពេលកើតហេតុ គេបានឃើញបុរសម្នាក់ជាជនរងគ្រោះបានផឹកស្រាស្រវឹងជោកជាំទាំងព្រឹក ហើយក៏ដើរចេញពីកន្លែងផឹកស៊ីទៅ លុះដល់វេលាកើតហេតុខាងលើ ស្រាប់តែគេប្រទះឃើញជនរងគ្រោះនៅក្នុងទឹកអូរខាងក្រោយផ្ទះបានលង់ទឹកបាត់បង់ជីវិតទៅហើយ ។
ក្រោយពេលកើតហេតុ សពជនរងគ្រោះទាំង២នាក់ខាងលើ ត្រូវបានសាច់ញាតិនាំយកទៅធ្វើបុណ្យតាមប្រពៃណីរៀងៗខ្លួនផងដែរ ។
ចែករំលែកព័តមាននេះ