រាជធានីភ្នំពេញ ៖ ដោយសារជំនន់ទឹកភ្លៀងលើសពីកម្រិត ដែលធ្វើឲ្យតំបន់មួយចំនួនក្នុងរាជធានីភ្នំពេញ រងការជន់លិច ដែលធ្វើឲ្យអាជ្ញាធររាជធានីភ្នំពេញគ្រប់លំដាប់ថ្នាក់បាន និងកំពុងមមាញឹកញាប់ដៃញាប់ជើងក្នុងការបូមរំដោះទឹកចេញក្រៅក្រុង ដើម្បីកាត់បន្ថយការជន់លិចលំនៅដ្ឋានប្រជាពលរដ្ឋ។ ជាក់ស្តែងកាលពីយប់ថ្ងៃទី១១ ឈានចូលថ្ងៃទី១២ ខែតុលានេះ ទាំងលោក ប៉ា សុជាតិវង្ស ប្រធានក្រុមប្រឹក្សា និងលោក ឃួង ស្រេង អភិបាលរាជធានីភ្នំពេញអមដោយមន្ត្រីជំនាញ បានចុះទៅពិនិត្យ និងដឹកនាំមន្ត្រីជំនាញច្រកបាវដីខ្សាច់ទប់ទឹកដើម្បីសង្គ្រោះស្ថានីយការពារកុំឲ្យឆេះម៉ូទ័រ ព្រមទាំងចាត់មន្ត្រីគ្រប់ថ្នាក់គ្រប់ផ្នែកឲ្យចុះពិនិត្យតាមដាន និងជួយបូមទឹកនៅក្នុងភូមិសាស្ត្ររបស់ខ្លួន។
លោក ឃួង ស្រេង អភិបាលរាជធានីភ្នំពេញ បានអះអាងថា កម្រិតទឹកភ្លៀងកាលពីរសៀលថ្ងៃទី១២កន្លងមកនេះ ដល់ទៅជិត១៣០មីលីម៉ែត្រ ដែលមួយទសវត្សរ៍មិនទាន់ជួបម្តងនៅកម្រិតទឹកភ្លៀងធំបែបនេះ ដែលធ្វើឲ្យរាជធានីភ្នំពេញ មានការកកស្ទះទឹកនៅគ្រប់កន្លែង។ ប៉ុន្តែសម្រាប់ខណ្ឌ៤នៅក្នុងក្រុង គឺដូនពេញ ៧មករា បឹងកេងកង និងខណ្ឌចំការមន ត្រូវបានហូរអស់ក្រោយភ្លៀងប្រមានមួយម៉ោង ជាពិសេសតំបន់វត្តភ្នំ ព្រះបរមរាជវាំង និងតំបន់បឹងកេងកង។
លោកបន្តថា ដោយឡែកនៅតំបន់ផ្លូវលេខ២៣០កែងផ្លូវម៉ៅសេទុង ដោយសារទឹកជំនន់ខ្លាំង និងដោយសារព្រួយបារម្ភក្នុងការលិចម៉ូទ័របូមទឹករបស់ស្ថាននីយបូមទឹកបឹងទំពុនដែលអាចឆ្លងភ្លើងធ្វើឲ្យផ្ទុះម៉ាស៊ីនបូមទឹក ហេតុនេះហើយទើបសម្រេចបិទទ្វារទឹកចំនួន០៣កន្លែង គឺបិទទ្វារទឹក នៅប្រឡាយបារាំង នៅបឹងសាឡាង និងនៅមុខមន្ទីរពេទ្យរុស្ស៊ី ដើម្បីសង្គ្រោះម៉ាស៊ីននៅស្ថានីយបឹងទំពុននេះកុំឲ្យផ្ទុះអាចខាតពេលរាប់ខែ ពីព្រោះទឹកបានលិចស្ថានីយនេះតែម្តង ទើបទឹកនៅកកស្ទះតំបន់ខាងលើ ប៉ុន្តែដោយសារសង្គ្រោះម៉ាស៊ីននេះបាន និងដំណើរការបូមឲ្យស្រកហើយទើបបើកទ្វារទឹកទាំង៣នោះ ដើម្បីបូមបន្ត ទើបអាចរក្សាបានស្ថិរភាពទឹកក្នុងពេលនេះ។
លោក ឃួង ស្រេង បានបញ្ជាក់ថា បើមិនមានជំនន់ទឹកភ្លៀងខ្លាំងទៀតទេ នៅថ្ងៃទី១៣ តុលានេះ ស្ថានភាពទឹកនឹងស្រកអស់ដូចធម្មតាវិញ ខណៈដែលក្រុមការងារបាន និងកំពុងប្រតិបត្តិការក្នុងការបូមទឹកចេញនៅស្ថានីយបូមទឹកនានា។ លោក ឃួង ស្រេង បញ្ជាក់បែបនេះ ក្នុងពេលដែលលោក ដឹកនាំមន្ត្រីជំនាញ និងអាជ្ញាធរដែនដី ចុះពិនិត្យស្ថានភាពស្ថានីយបូមទឹកបឹងទំពុននាព្រឹកថ្ងៃទី១២ខែតុលានេះ។
លោក ឃួង ស្រេង បានលើកឡើងថា ក្នុងពេលនេះទឹកបានស្រកចុះមួយចំនួនធំហើយ ពិសេសនៅមុខម៉ុងឌីយ៉ាល់ ហើយវានឹងបន្តស្រកនៅតំបន់មួយចំនួនទៀត តែបើមានភ្លៀងខ្លាំងបែបនេះទៀត គឺយើងបានត្រៀមរួចរាល់ហើយ ទាំងបញ្ជាការដ្ឋានអង្គរក្សដែលមានម៉ាស៊ីនជួយអន្តរាគមន៍ ១០ទៅ២០គ្រឿង ដើម្បីស្ដារស្ថានភាពឲ្យមកដំណើរការជាធម្មតាវិញ។ លោក ឃួង ស្រេង បានអំពាវនាវឲ្យបងប្អូនប្រជាពលរដ្ឋទាំងអស់នៅក្នុងរាជធានីភ្នំពេញមេត្តាយោគយល់ដល់រដ្ឋបាលរាជធានីភ្នំពេញដោយសារការលិចលង់នេះ ដោយរដ្ឋបាលរាជធានីភ្នំពេញបានប្រឹងប្រែងខ្លាំងខ្លាំងណាស់ដើម្បីដោះស្រាយលើការលិចលង់លំនៅដ្ឋានប្រជាពលរដ្ឋដោយសារតែភ្លៀង ដែលបានអូសបន្លាយរយៈពេលយូរនេះ។
លោក ឃួង ស្រេង បានបញ្ជាក់ថា គ្រោះធម្មជាតិកាលពីយប់មិញនេះ គឺជាគ្រោះធម្មជាតិមួយដែលរាជធានីភ្នំពេញរបស់មិនដែលជួបប្រទះ ហើយនេះក៏ជាមេរៀនមួយដែលយើងត្រូវកត់ត្រាទុក ដើម្បីធ្វើកិច្ចការងាររបស់យើងឲ្យបានល្អប្រសើរថែមទៀតក្នុងការរំដោះទឹកចេញពីរាជធានីភ្នំពេញ។ លោកថា ឆ្នាំខាងមុខរាជធានីភ្នំពេញនឹងយកកម្រិតទឹកភ្លៀងនៅពេលនេះធ្វើជាឧទាហរណ៍ ដើម្បីរៀបចំ ម៉ាស៊ីនបូមទឹក ប្រឡាយ អាងស្តុកទឹកឱ្យមានស្ថិរភាពល្អប្រសើរទៅថ្ងៃអនាគត។
សូមបញ្ជាក់ផងថា ក្នុងប្រតិបត្តិការបូមរំដោះការលិចលង់ទឹកជំនន់នេះ អាជ្ញាធររាជធានីភ្នំពេញ បានបង្ខំចិត្តបិទទ្វារទឹកចំនួន៣ ដើម្បីកាត់បន្ថយទឹកងាយស្រួលបូមចេញ និងបង្ខំបិទកំណាត់ផ្លូវ៣៧១ត្រង់ ស្ថានីយបូមទឹកបឹងទំពុន ដើម្បី ប្រើម៉ូទ័របូមទឹកចល័តបន្ថែមកាលពីយប់ថ្ងៃទី១១ ខែតុលា ប៉ុន្តែសម្រាប់នៅថ្ងៃទី១២ តុលានេះ កំណាត់ផ្លូវត្រូវបានបើកឡើងវិញ ចំណែកស្ថានភាពនៅស្ថានីយក៏មានលក្ខណៈល្អប្រសើរឡើងវិញហើយដែរ គឺទឹកបានស្រកចុះជាបន្តបន្ទាប់៕ ដោយ ៖ ចន ណារិទ្ធ
ចែករំលែកព័តមាននេះ