ខេត្តព្រៃវែង ៖ ហេតុការណ៍នឹកស្មានមិនដល់មួយបានកើតឡើង និងធ្វើឲ្យភ្ញាក់ផ្អើលដល់ប្រជាពលរដ្ឋទាំងព្រឹកព្រលឹម ដោយសារតែបុរសម្នាក់បានចូលទៅលួចមាន់ក្នុងផ្ទះគេ ហើយក៏ត្រូវឆក់ខ្សែភ្លើង បណ្តាលឱ្យបាត់បង់ជីវិតយ៉ាងអាណោចអាធ័ម នៅក្បែរទ្រុងមាន់តែម្តង ។ ករណីនេះកើតឡើងកាលពីវេលាម៉ោងប្រមាណ១០យប់ថ្ងៃទី១១…
ខេត្តព្រៃវែង ៖ ហេតុការណ៍នឹកស្មានមិនដល់មួយបានកើតឡើង និងធ្វើឲ្យភ្ញាក់ផ្អើលដល់ប្រជាពលរដ្ឋទាំងព្រឹកព្រលឹម ដោយសារតែបុរសម្នាក់បានចូលទៅលួចមាន់ក្នុងផ្ទះគេ ហើយក៏ត្រូវឆក់ខ្សែភ្លើង បណ្តាលឱ្យបាត់បង់ជីវិតយ៉ាងអាណោចអាធ័ម នៅក្បែរទ្រុងមាន់តែម្តង ។
ករណីនេះកើតឡើងកាលពីវេលាម៉ោងប្រមាណ១០យប់ថ្ងៃទី១១ ខែតុលា ឆ្នាំ២០២០ និង
មានការភ្ញាក់ផ្អើលនាវេលាម៉ោងប្រមាណ៦ព្រឹក ថ្ងៃទី១២ ខែតុលា នៅចំណុចទ្រុងមាន់ក្នុងផ្ទះរបស់ឈ្មោះ មាស ទូច ភេទប្រុស អាយុ៥៦ឆ្នាំ ស្ថិតក្នុងភូមិទង់នាគ ឃុំស្តៅកោង ស្រុកបាភ្នំ ។
សមត្ថកិច្ចបានឲ្យដឹងថា បុរសដែលត្រូវខ្សែភ្លើងឆក់រូបនេះឈ្មោះ យឹម សំអាត អាយុ២៥ឆ្នាំ មានទីលំនៅក្នុងភូមិថ្មី ឃុំស្ដៅកោង មានចម្ងាយប្រមាណ៧គីឡូម៉ែត្រពីផ្ទះកើតហេតុ ។
ប្រភពព័ត៌មានពីម្ចាស់ផ្ទះកើតហេតុបានឲ្យដឹងថា ដោយសារតែមួយរយៈនេះនៅក្នុងភូមិស្រុករបស់គាត់ ឧស្សាហ៍បាត់មាន់បាត់ទាញឹកញាប់ពេក ទោះបីមាន់ទានៅក្នុងទ្រុងក្នុងផ្ទះមានរបងខ្ពស់ព័ទ្ធហើយក្តីក៏នៅតែបាត់ទៀត ហើយតាមរកចាប់ចោរមិនដែលបាន មិនដឹងថាចោរដែលលួចនោះជាសត្វ ឬជាមនុស្ស ។ ហេតុនេះហើយ ទើបគាត់ជ្រើសរើសវិធីដាក់បង្កៃខ្សែភ្លើងនៅក្នុងផ្ទះក្បែរទ្រុងមាន់ ដើម្បីការពារកុំឲ្យចោរចូលលួចបាន ។
លុះនៅយប់កើតហេតុនោះ ពេលអ្នកផ្ទះរបស់គាត់ដេកលង់លក់ទៅហើយ ស្រាប់តែលាន់ឮសំឡេងប្រកាច់ព្រូសប្រះនៅក្បែរទ្រុងមាន់ មួយសន្ទុះក៏ស្ងាត់សំឡេងឈឹង ។ ដោយមានការសង្ស័យពួកគាត់នាំគ្នាបើកភ្លើងបើកទ្វារចេញមកមើល ក៏ឃើញបុរសខាងលើបានបាត់បង់ជីវិតនៅក្បែរទ្រុងមាន់បាត់ទៅហើយ ទើបរាយការណ៍ប្រាប់សមត្ថកិច្ចទៅពិនិត្យ លុះព្រឹកព្រលឹមឡើងក៏មានការភ្ញាក់ផ្អើលដល់អ្នកស្រុក នាំគ្នាមកចោមរោមមើលតែម្តង ។
ដោយឡែក ខាងសមត្ថកិច្ចបានឲ្យដឹងថា ក្រោយពីពិនិត្យកន្លែងកើតហេតុ និងខ្លួនប្រាណសពបង្ហាញថា ពុំមានស្លាកស្នាមវាយដំអ្វីទេ គឺមានតែស្នាមឆេះខ្លោចនៅលើថ្លើមដៃខាងឆ្វេង ។
ដូច្នេះសមត្ថកិច្ចសន្និដ្ឋានថា បុរសរូបនេះបាត់បង់ជីវិតដោយសារខ្សែភ្លើងឆក់ ។
សមត្ថកិច្ចបានបញ្ជាក់ថា ក្រោយពីពិនិត្យរួច ក៏បានប្រគល់សពទៅឲ្យក្រុមគ្រួសារនាំយកទៅធ្វើបុណ្យតាមប្រពៃណី ។ ចំណែកម្ចាស់ផ្ទះត្រូវបានសមត្ថកិច្ចនាំទៅសាកសួរនៅប៉ុស្តិ៍នគរ
បាលឃុំស្តៅកោង ហើយជោគវាសនាទៅជាយ៉ាងណានោះ គឺស្រេចនៅលើអយ្យការអមសា
លាដំបូងខេត្តជាអ្នកចាត់ការបន្ត ៕
ចែករំលែកព័តមាននេះ