ខេត្តកំពង់ស្ពឺ ៖ បើតាមសេចក្តីរាយការណ៍បានឱ្យដឹងថា នៅស្រុកថ្ពង ព្រោះតែមានភ្លៀងធ្លាក់ជាប់ៗគ្នាជាហេតុធ្វើឱ្យកម្ពស់ទឹកកាន់តែកើនឡើង ក្លាយជាជំនន់ទឹកភ្លៀងបានបង្កឱ្យបាក់ទំនប់ស្ទាក់ទឹក (ភ្នំលេខ) បណ្តាលឲ្យផ្ទះប្រជាពលរដ្ឋចំនួន១៧ខ្នងរងផលប៉ះពាល់ ហើយអាជ្ញាធរ និងសមត្ថកិច្ចមូលដ្ឋានក៏បានចុះអន្តរាគមន៍ធ្វើការសង្គ្រោះផងដែរ។…
ខេត្តកំពង់ស្ពឺ ៖ បើតាមសេចក្តីរាយការណ៍បានឱ្យដឹងថា នៅស្រុកថ្ពង ព្រោះតែមានភ្លៀងធ្លាក់ជាប់ៗគ្នាជាហេតុធ្វើឱ្យកម្ពស់ទឹកកាន់តែកើនឡើង ក្លាយជាជំនន់ទឹកភ្លៀងបានបង្កឱ្យបាក់ទំនប់ស្ទាក់ទឹក (ភ្នំលេខ) បណ្តាលឲ្យផ្ទះប្រជាពលរដ្ឋចំនួន១៧ខ្នងរងផលប៉ះពាល់ ហើយអាជ្ញាធរ និងសមត្ថកិច្ចមូលដ្ឋានក៏បានចុះអន្តរាគមន៍ធ្វើការសង្គ្រោះផងដែរ។ ហេតុការណ៍បាក់ទំនប់នេះ កើតឡើងកាលពីម៉ោង១០និង១០នាទីព្រឹក ថ្ងៃទី១១ ខែតុលា ឆ្នាំ២០២០ នេះ ស្ថិតនៅក្នុងភូមិថ្នល់បំបែក ឃុំអមលាំង ស្រុកថ្ពង។
បើតាមលោកវរសេនីយ៍ឯក ហ៊ុន សុខហុន អធិការនគរបាលស្រុកថ្ពង បានឲ្យដឹងថា មុនកើតហេតុ ភ្លៀងបានបង្អុលធ្លាក់កាន់តែខ្លាំងបន្តបន្ទាប់រាល់ថ្ងៃបង្កជាជំនន់ទឹកភ្លៀង រហូតដល់បាក់ទំនប់ស្ទាក់ទឹកភ្នំលេខ បណ្តាលឲ្យផ្ទះប្រជាពលរដ្ឋចំនួន១៧គ្រួសាររងការប៉ះពាល់ ក្នុងនោះផ្ទះប្រជាពលរដ្ឋ៧គ្រួសារបានរងការប៉ះពាល់យ៉ាងខ្លាំង។ ហើយលោកក៏បានដឹកនាំកម្លាំងចុះអន្តរាគមន៍សង្គ្រោះពលរដ្ឋ ដែលរងនូវផលប៉ះពាល់ជំនន់ទឹកភ្លៀងអំពីការបាក់ទំនប់ស្ទាក់ទឹកភ្នំលេខ និងជម្លៀសពួកគាត់មកកាន់ទីទួលសុវត្ថិភាព។
លោកបន្តថា ការបាក់ទំនប់ទឹកខាងលើនេះ បណ្តាលឲ្យរលំផ្ទះតៀមចំនួនពីរខ្នង បាត់ម៉ូតូចំនួន២គ្រឿង និងគោយន្តចំនួន៣គ្រឿង ក្រោយមករកឃើញគោយន្ត១គ្រឿងវិញ ចំណែកសត្វគោមិនទាន់រកឃើញនោះទេ។
រហូតមកដល់នៅព្រលប់ថ្ងៃទី១១ ខែតុលានេះ លោក វ៉ី សំណាង ក៏បានដឹកនាំក្រុមការងារចុះពិនិត្យស្ថានភាពទឹកហូរកាត់ផ្លូវជាតិលេខ៤ ស្ថិតក្នុងឃុំអូរ ស្រុកភ្នំស្រួច ខេត្តកំពង់ស្ពឺ ចន្លោះគីឡូម៉ែត្រលេខ៦៨ និងលេខ៦៩ ដែលមានកម្ពស់២តឹក ដោយសារតែភ្លៀងធ្លាក់ជាប់គ្នាៗ បណ្តាលឱ្យកម្ពស់ទឹកកាន់តែកើនឡើង ។
លោកអភិបាលខេត្ត ក៏បញ្ជាក់ផងដែរថា ស្ថានភាពទឹកភ្លៀងនៅពេលនេះ គឺមិនមានសភាពធ្ងន់ធ្ងរនោះទេ ចំណែកចរាចរណ៍នៅតែដំណើរការធម្មតា ប៉ុន្តែទោះជាយ៉ាងនេះក្ដី អាជ្ញាធរមូលដ្ឋានទាំង៨ ក្រុង-ស្រុក ត្រូវយកចិត្តទុកដាក់តាមដាន និងត្រូវរាយការណ៍មកអាជ្ញាធរខេត្ត ដើម្បីត្រៀមវិធានការសង្គ្រោះប្រជាពលរដ្ឋបានទាន់ពេលវេលា ។ លោកបន្តថា ក្នុងនាមអាជ្ញាធរត្រូវតែគិតគូរ ចំពោះសេចក្តីសុខ និងសុវត្ថិភាពប្រជាពលរដ្ឋ ទោះស្ថិតក្នុងកាលៈទេសៈណាក៏ដោយ។
គួរបញ្ជាក់ថា រហូតមកដល់ព្រឹកថ្ងៃទី១២ ខែតុលា ឆ្នាំ២០២០នេះ ទឹកបានស្រកទៅវិញជាបណ្តើរៗហើយ តែមិនទាន់អាចឲ្យប្រជាពលរដ្ឋចូលទៅរស់នៅបានទេ គឺរង់ចាំរហូតដល់ទឹកស្រកអស់ ទើបឲ្យពួកគាត់ចូលទៅនៅវិញ។
សូមបញ្ជាក់ទៀតថា យោងតាមប្រភពពីមន្ទីរធនធានទឹក និងឧតុនិយមខខេត្តកំពង់ស្ពឺ បានឱ្យដឹងថា តំបន់ខ្លះនៃខេត្តកំពង់ស្ពឺ ចាប់ផ្តើមគំរាមកំហែងដោយជំនន់ទឹកភ្លៀង ហើយទឹកភ្លៀងមានធ្លាក់នៅគ្រប់ក្រុង-ស្រុកផងដែរ។
ចែករំលែកព័តមាននេះ