ខេត្តត្បូងឃ្មុំ ៖ គ្រោះធម្មជាតិពីមួយឆ្នាំទៅមួយឆ្នាំបានធ្វើឱ្យមានការប្រែប្រួលដូចជា វត្តរកាធំ ស្ថិតក្នុងភូមិរកាធំ ឃុំជារោទ៍ទី១ ស្រុកត្បូងឃ្មុំ ត្រូវបានបាក់ច្រាំងអស់ទាំងកុដិថ្ម ដីបរិវេណបណ្ដោយប្រមាណជាង ២០០ម៉ែត្រ បាក់អស់នៅសល់តែប្រមាណ៥០ម៉ែត្រប៉ុណ្ណោះ។ ហើយសាលាឆទានសង់ពីឈើត្រូវបានរុញរំកិលមកកៀក និងរបងវត្តខាងមុខទៅហើយ។ ស្ត្រីចំណាស់ នៅ ស្រ៊ន់ អាយុ៦៦ឆ្នាំ ជាពុទ្ធបរិស័ទចំណុះជើងវត្តបានរៀបរាប់ឲ្យដឹងនៅព្រឹកថ្ងៃទី៩ តុលា ២០២០ថា ចាប់តាំងពីពេលដែលបានក៏កើតវត្តរកាធំនេះ មកនៅពេលដែលដឹងក្តីគឺបានឃើញសំណង់ព្រះវិហារបានក៏កើតឡើងជាបណ្ដើរៗ។
និងដោយឆ្លងកាត់ព្រះចៅអធិការវត្ត ជាច្រើនជំនាន់មកហើយច្រើនទន្លេមេគង្គ ក៏មិនដែលបាក់ទើបតែមកដល់ពេលនេះ ធម្មជាតិមានការប្រែប្រួលហើយច្រាំងបានបាក់រាល់ឆ្នាំ ក្នុងនោះមានកុដិថ្ម ត្រូវបានបាក់ចូលទៅក្នុងទឹកទន្លេ។ លោកយាយ ពេជ្រ ស៊ន់ អាយុ៧០ឆ្នាំ គណកម្មការវត្តរកាធំ មានប្រសាសន៍ឲ្យដឹងដែរថា នៅក្នុងរដូវប្រាំងឆ្នាំ២០២០ ដោយមានការយកចិត្តទុកដាក់ពីសំណាក់អាជ្ញាធរខេត្ត បានសហការជាមួយនឹងស្ថាប័នក្រសួងធនធានទឹក បានរៀបចំបាវខ្សាច់ទប់នៅមាត់ច្រាំងទន្លេក្រោយវត្តជាច្រើនម៉ែត្រ ដើម្បីទប់ស្កាត់ការពារកុំឲ្យបាក់ស្រុតដីវត្តបន្ថែមទៀត។ លោកយាយពេជ្រ ស៊ន់ គណៈកម្មការវត្តមានប្រសាសន៍បន្តថា ពិតជាសំណាងនៅក្នុងរដូវវស្សាឆ្នាំ២០២០ ទឹកទន្លេមិនបានឡើងមកជន់លិចក្នុងបរិវេណវត្ត ក៏ប៉ុន្តែជះឥទ្ធិពលមិនល្អដល់ប្រជាកសិកររស់នៅតាមដងទន្លេ ដែលបង្កបង្កើនផលដាំដុះដំណាំផ្សេងៗ និងត្រូវជួបបញ្ហាសត្វល្អិត។
ដោយសារតែមើលឃើញការលំបាកទឹកទន្លេឡើងមកលិចបរិវេណវត្តស្ទើររាល់ឆ្នាំ និងដីច្រាំងបានបាក់ គ្រាន់តែបណ្ដោយដីវត្តជាង២០០ម៉ែត្របាក់អស់នៅសល់ប្រមាណ៥០ ម៉ែត្រគឺបានបាក់ដល់រោងដាក់ទូកងហើយ។ កន្លងមកមានចំនួន៥ ត្រូវបានបាក់ធ្លាក់ចូលទៅក្នុងទន្លេ ចាប់តាំងពីក្រោយឆ្នាំ១៩៧៩ មកដល់បច្ចុប្បន្ននេះព្រះចៅអធិការវត្តមានចំនួន១៣អង្គ រួមទាំងព្រះតេជគុណ គា សុគន្ធ ដែលគ្រប់គ្រងវត្តរាល់ថ្ងៃ។ ដោយមានការឯកភាពពីពុទ្ធបរិស័ទចំណុះជើងវត្តជិតឆ្ងាយរួមទាំងគណៈកម្មការវត្ត ក៏បានទិញដីមួយកន្លែងទំហំជិត ៣ហិចតា ស្ថិតនៅភូមិទួលកែវ មានចម្ងាយប្រមាណជាង៦គីឡូម៉ែត្រពីវត្តរកការធំ សព្វថ្ងៃដោយចំណាយបច្ច័យប្រមាណ២ម៉ឺនដុល្លារ។
ដោយព្រះចៅអធិការវត្ត បានចាក់ដីក្នុងបរិវេណវត្តដែលត្រូវសាងសង់ថ្មីនោះអស់ដីចំនួនជាង៤០០ រថយន្ត ហើយនៅឆ្ងាយពីច្រាំងទន្លេ មិនព្រួយរឿងបាក់ច្រាំងបន្តទៀតនោះទេ។ ហើយនៅខែវិច្ឆិកាខាងមុខព្រះចៅអធិការវត្ត និងនិមន្តទៅសាងសង់សាឡុំ នៅកន្លែងថ្មីដើម្បីឲ្យពុទ្ធបរិស័ទ នៅតំបន់នោះមានឱកាសអញ្ជើញមកវត្តដើម្បីសុំសីល ឬក៏ចូលបច្ច័យដើម្បីកសាងសមិទ្ធិផលផ្សេងៗ។ ក្នុងនាមគណៈកម្មការអាចារ្យវត្តសូមពុទ្ធបរិស័ទចំណុះជើងវត្តទាំងនៅទីចិត្តទីឆ្ងាយទាំងក្នុង និងក្រៅប្រទេស មានសទ្ធាជ្រះថ្លាសូមចូលបុណ្យបច្ច័យតាមសទ្ធារៀងៗខ្លួនក្នុងការកសាងសមិទ្ធិផលក្នុងទីអារាម។
ហើយនៅវត្តរកាធំ ដោយមានការស្នើសុំពីសំណាក់ប្រជាពលរដ្ឋនៅតំបន់នេះ ដោយឲ្យរក្សានៅដដែលប្រសិនបើច្រាំងទន្លេមិនបាក់បន្តទៀត ដោយនិមន្តព្រះសង្ឃថ្មីមកឲ្យគង់នៅវត្តនេះ ដើម្បីងាយស្រួលប្រជាពលរដ្ឋនាំគ្នាមកវត្តសុំសីលពិសេសគឺចាស់ៗដែលពិបាកក្នុងការធ្វើដំណើរទៅវត្ត ដែលស្ថិតនៅឆ្ងាយ។ លោក ហាក់ ហុន ប្រធានមន្ទីរធម្មការ និងសាសនាខេត្តត្បូងឃ្មុំបានឲ្យដឹងនៅរសៀលថ្ងៃទី៩ តុលាថា ចំពោះស្រុកដែលនៅជាប់នឹងដងទន្លេមេគង្គ គឺមានតែប្រវត្តិរកាធំមួយប៉ុណ្ណោះ ដែលប្រឈមនឹងការរស់នៅលើដោយសារតែគ្រោះធម្មជាតិបាក់ច្រាំងក្រៅពីនេះមិនមាននោះទេ៕ ដោយ ៖ យ៉ាន់ ចាន់ថេត
ចែករំលែកព័តមាននេះ