រាជធានីភ្នំពេញ៖ នៅទីបំផុតការចុះហត្ថលេខាលើកិច្ចព្រមព្រៀងពាណិជ្ជកម្មសេរី (FTA) ទ្វេភាគីរវាងកម្ពុជា -ចិននឹងចាប់ផ្តើមជាផ្លូវការនៅថ្ងៃច័ន្ទ ទី ១២ ខែតុលា ឆ្នាំ២០២០ស្អែកនេះ បន្ទាប់ពីមានដំណើរទស្សនៈកិច្ចផ្លូវការរយៈពេល ២ ថ្ងៃនៅព្រះរាជាណាចក្រកម្ពុជារបស់លោក វ៉ាង យី ទីប្រឹក្សារដ្ឋនិងជារដ្ឋមន្ត្រីការបរទេសនៃសាធារណរដ្ឋប្រជាមានិតចិននៅ ថ្ងៃទី១១-១២ ខែតុលា ឆ្នាំ២០២០។
តាមប្រភពព័ត៌មានពីក្រសួងការបរទេសនិងសហប្រតិបត្តិការអន្តរជាតិបានឲ្យដឹងថា លោក វ៉ាង យី នឹងអញ្ជើញមកដល់ប្រទេសកម្ពុជានៅវេលាម៉ោង ៥ល្ងាច ទី ១១ ខែតុលានេះ ។ ក្នុងនោះផងដែរ សម្រាប់ដំណើរទស្សនៈកិច្ច ២ ថ្ងៃរបស់លោក វ៉ាង យី មកកាន់កម្ពុជានេះផងដែរនឹងមានពិធីចុះហត្ថលេខាលើកិច្ចព្រមព្រៀងពាណិជ្ជកម្ម សេរីកម្ពុជា-ចិន (FTA) និងឯកសារសំខាន់២ទៀតរួមមានលិខិតប្តូរសារស្តីពីសិក្សាសមិទ្ធិលទ្ធភាពគម្រោងអភិវឌ្ឍន៍ហេដ្ឋារចនាសម្ព័ន្ធប្រព័ន្ធលូ និងប្រព្រឹត្តិកម្មទឹកកខ្វក់នៅខេត្តព្រះសីហនុទាក់ទងនិងកិច្ចព្រមព្រៀងពាណិជ្ជកម្មសេរី(FTA)ទ្វេភាគីរវាងកម្ពុជា -ចិន បើតាមអ្នកស្រាវជ្រាវសេដ្ឋកិច្ចមើលឃើញថាវាជាការបើកច្រកសេដ្ឋកិច្ចថ្មីមួយទៀតរបស់កម្ពុជា ខណៈនាពេលកន្លងមកនាំចេញឆ្ពោះតែទៅលោកខាងលិច ។
លោកបណ្ឌិត គី សេរីវឌ្ឍន៍ អ្នកស្រាវជ្រាវសេដ្ឋកិច្ចនៃរាជបណ្ឌិត្យសភា មានប្រសាសន៍ឱ្យដឹងកាលពីថ្ងៃទី១១ តុលានេះថា កិច្ចព្រមព្រៀងពាណិជ្ជកម្មសេរីនេះបានឱ្យកម្ពុជាបានបើកច្រសេដ្ឋកិច្ចថ្មីមួយទៀត ដែលកាលពីមុនកម្ពុជាគឺជាប្រទេសផលិតហើយនាំទៅតែលោកខាងលិចនិងសហគមន៍អឺរ៉ុប។តែឥលូវនេះយើងមានប្រទេសខាងកើតមួយទៀត ស្របទៅនឹងទ្រឹស្តីថាកាណាយើងបង្កើតឱ្យទីផ្សារគ្រប់តំបន់នេះគឺជាចំណុចមួយល្អប្រសើរបំផុត សម្រាប់លើកអំណាចកំណត់ថ្លៃរបស់អ្នកផលិត។
លោកបណ្ឌិត បានសង្កត់ធ្ងន់ថា «នេះជាឱកាសថ្មីមួយសម្រាប់កម្ពុជា ហើយកម្ពុជាត្រូវចាប់យកឱកាសមួយនេះឱ្យបាន»។ បើតាមបណ្ឌិតសេដ្ឋកិច្ចរូបនេះថា FTA នេះជាឱកាសនៃការវិនិយោគ។ ចំណែកផលិតផលនៅក្នុងស្រុកយើងនេះ ខ្ញុំសង្កេតឃើញសហគ្រាសធុនធម្យមគាត់ចាប់ពង្រឹងផលិតកម្ម តែសម្រាប់កសិផលរបស់ប្រជាពលរដ្ឋមិនទាន់បានចូលនៅក្នុងវិស័យនេះ ដោយសារតែការផ្សាយរបស់រាជរដ្ឋាភិបាលលើការជួយជ្រោមជ្រែងរបស់រដ្ឋាភិបាលលើវិស័យកសិកម្មនេះឱ្យទៅជាភូមិមួយផលិតផលមួយនេះមិនទាន់បានល្អ ។ ការផ្តល់នូវបច្ចេកទេសចិញ្ចឹមសត្វក៏មិនទាន់បានល្អ ព្រោះក្នុងរយៈពេល៥ឆ្នាំដំបូងនេះកម្ពុជា ត្រូវតែនាំចេញផលិតផលធ្វើអំពីសាច់សត្វ តែបើយើងមិនទាន់បានរៀបចំខ្លួនចិញ្ចឹមសត្វទេ ពេលនោះយើងនឹងបាត់ឱកាស។
លោកបណ្ឌិត បានមានប្រសាសន៍បន្ថែមទៀតថា «ខ្ញុំគិតថា FTA នេះនឹងអាចចូលមកមុនគេនោះគឺអ្នកវិនិយោគចិននោះឯង។ ដោយសារតែចិនបានដឹងថាចិនខ្លួនឯងគេទទួលស្គាល់នូវផលិត ផលយ៉ាងដូចម្តេច ហើយនៅពេលវិនិយោគិនចិនមកផលិតនៅស្រុកខ្មែរហើយនាំចេញទៅប្រទេសចិនវិញ ប្រាកដជាមានភាពងាយស្រួលជាជាងវិនិយោគដទៃទៀត»។
លោកបណ្ឌិតសង្កត់ធ្ងន់ដូច្នេះថា «ខ្ញុំនូវតែជឿមុតមាំថាការចុះកិច្ចព្រមព្រៀងពាណិជ្ជកម្មសេរីទ្វេភាគីនេះមិនថាប្រទេសចិននោះទេ ប្រទេសណាក៏ដោយគឺបានជួយឱ្យសេដ្ឋកិច្ចមានកំណើន។បានន័យថាជួយជំរុញកំលាំងផលិតបង្កើតការងារធ្វើនៅក្នុងប្រទេស។ដូចនេះការចុះFTA ជាមួយចិននេះ វាជាឱកាសថ្មីមួយទៀតសម្រាប់ពង្រីកទីផ្សារផលិតកម្មរបស់យើង ដែលមិនពឹងតែលើទីផ្សារតែម្ខាង។ជាធម្មតាការផលិតពឹងតែមហាអំណាចតែម្ខាងគេនឹងអាចដាក់សម្ពាធមកលើប្រទេសតូចតាចនោះ អីចឹងហើយកម្ពុជាកាលណាគាត់ចាប់យកចិន បន្តិចទៀតនឹងទៅដូចជាការថ្លឹងជញ្ជីងនៃអំណាច»៕ (កែសម្រួលដោយ ៖ ធីតា)
ចែករំលែកព័តមាននេះ