ខេត្តកំពង់ធំ ៖ មានករណីស្ត្រីជាម្តាយម្នាក់បានបាត់បង់ជីវិត ចំណែកកូនប្រុសម្នាក់បានរងរបួសស្រាល ក្នុងហេតុការណ៍គ្រោះធម្មជាតិខ្យល់កន្ត្រាក់ បណ្តាលឲ្យរលំផ្ទះសង្កត់លើ កាលពីវេលាម៉ោង១២ថ្ងៃត្រង់ថ្ងៃទី១០ តុលា ឆ្នាំ២០២០ ស្ថិតនៅភូមិក្រសាំង ឃុំពពក ស្រុកស្ទោង ខេត្តកំពង់ធំ ។
លោកវរសេនីយ៍ទោ វ៉ន សុភ័ណ អធិការរងនគរបាលស្រុកស្ទោង បានប្រាប់ថា ជនរងគ្រោះជាម្តាយឈ្មោះ សួស សម្ផស្ស អាយុ២៧ឆ្នាំ ជាអ្នកសិល្បៈ មានស្រុកកំណើតនៅភូមិគោកក្រសាំង សង្កាត់ស្វាយដង្គំ ក្រុងសៀមរាប ខេត្តសៀមរាប (បានបាត់បង់ជីវិតដោយសាររលំផ្ទះសង្កត់ចំក្បាលនិងដងខ្លួន) មានប្តីឈ្មោះ ជា សុធា អាយុ៤០ឆ្នាំ មិនមានរងរបួសនោះទេ ចំណែកកូនប្រុសឈ្មោះ ហួត សុធាវិត អាយុ៤ឆ្នាំ (រងរបួសស្រាល) បច្ចុប្បន្នក្រុមគ្រួសារជនរងគ្រោះមកស្នាក់នៅបណ្តោះអាសន្នធ្វើចំការនៅភូមិឃុំខាងលើ ។
ក្រោយកើតហេតុ សពជនរងគ្រោះត្រូវបានប្រគល់ជូនសាច់ញាតិយកមកធ្វើបុណ្យតាមប្រពៃណី។
ដោយឡែក នៅថ្ងៃទី១០ តុលា ឆ្នាំ២០២០ ជំនន់ទឹកភ្លៀងបានជន់លិចផ្លូវក្នុងភូមិឃុំមួយចំនួនដូចជា ១-នៅភូមិទ្រៀល ភូមិរំចេក ឃុំទ្រៀល ស្រុកតាំងគោក ខេត្តកំពង់ធំ បណ្តាលឲ្យលិចផ្លូវ៧០% និងលិចបរិវេណក្រោមផ្ទះប្រជាពលរដ្ឋក្នុងភូមិនាងល្អ លិចផ្លូវប្រវែង៥០ម៉ែត្រ ។
២-ឃុំស្រឡៅ ក្នុងភូមិទោង លិចផ្លូវប្រវែង១០០ម៉ែត្រ ដាច់ផ្លូវទៅគោកត្របែកត្រង់ចំណុចលូជ្រោយផ្ទោល ។ ៣-ឃុំស្វាយភ្លើង ក្នុងភូមិខ្នាយទង លិចផ្លូវប្រវែង៥០ម៉ែត្រ ភូមិស្វាយភ្លើង លិចផ្លូវប្រវែង២០០ម៉ែត្រ និង៤-ឃុំច្រនាង ស្ថិតក្នុងភូមិអង្គរជា លិចបរិវេណផ្ទះប្រជាពលរដ្ឋចំនួន០២ខ្នង រដ្ឋបាលស្រុកបាននិងកំពុងដឹកនាំចុះសហការដោះស្រាយកាត់បន្ថយនូវហានិភ័យផ្សេងៗអប់រំ បញ្ហាអនាម័យ។
ករណីជំនន់ទឹកភ្លៀងបានលិចផ្លូវលំមួយចំនួនភូមិឃុំមួយចំនួនស្ថិតនៅស្រុកសន្ទុក ក្នុងនោះរួមមាន ១-ភូមិថ្មី ឃុំទីពោ លិចផ្លូវលំមួយខ្សែប្រវែង១២០ម៉ែត្រ ២-ភូមិ៧មករា ឃុំតាំងក្រសាំង លិចផ្លូវលំមួយខ្សែប្រវែង៥០ម៉ែត្រ ៣-ភូមិធម្មនាថឃុំតាំងក្រសាំងលិចផ្លូវលំមួយខ្សែប្រវែង៣០០ម៉ែត្រ ៤-ភូមិសង្គមថ្មីលិចផ្លូវលំមួយខ្សែប្រវែង១២០ម៉ែត្រនិងលិចបរិវេណផ្ទះ ៥–ភូមិត្រពាំងត្រុំ ឃុំទីពោ លិចបរិវេណផ្ទះចំនួន១៥ខ្នង ៕ (កែសម្រួលដោយ ៖ ធីតា)
ចែករំលែកព័តមាននេះ