រាជធានីភ្នំពេញ ៖ មហាវិថីសម្តេច ហ៊ុន សែន ដែលមហាជនទូទៅច្រើនតែហៅថា «ផ្លូវ៦០ម៉ែត្រ»នោះ កាលពីសប្តាហ៍កន្លងមកនេះ ក្រសួងសាធារណៈការ និងដឹកជញ្ជូន…
រាជធានីភ្នំពេញ ៖ មហាវិថីសម្តេច ហ៊ុន សែន ដែលមហាជនទូទៅច្រើនតែហៅថា «ផ្លូវ៦០ម៉ែត្រ»នោះ កាលពីសប្តាហ៍កន្លងមកនេះ ក្រសួងសាធារណៈការ និងដឹកជញ្ជូន បានប្រកាសកំណត់ល្បឿនត្រឹម៤០គីឡូម៉ែត្រ ក្នុងមួយម៉ោង សម្រាប់អ្នកធ្វើដំណើរនៅលើមហាវិថីដ៏ធំមួយនេះ ដោយយល់ឃើញថា កន្លងមកមានគ្រោះថ្នាក់កើតឡើងញឹកញាប់ពេក ដោយសារបើកលឿននៅលើផ្លូវមួយនេះ ។
ថ្វីបើ ការប្រកាសកំណត់ល្បឿន និងដាំស្លាកសញ្ញាតាមដងផ្លូវ៦០ម៉ែត្រ ធ្វើឡើងដោយក្រសួងសាធារណៈការ និងដឹកជញ្ជូនក្តី ប៉ុន្តែនៅពេលចាប់ផាកពិន័យនោះ គឺជាសមត្ថកិច្ចរបស់មន្ត្រីនគរបាលចរាចរណ៍ ។
ពាក់ព័ន្ធនឹងប្រកាសកំណត់ល្បឿនត្រឹម៤០គីឡូម៉ែត្រ លើកំណាត់ផ្លូវ៦០ម៉ែត្រនេះ នៅលើបណ្ដាញសង្គមហ្វេសប៊ុកក្នុងប្រទេសកម្ពុជា បានលើកឡើងថា «របររកស៊ីលោកប៉ូលិសខ្លាំងមែន ។ សួរមតិមហាជនទៅ លោកអ្នកដេកនឹកកំណត់ច្បាប់ ។ មានមនុស្សប៉ុន្មាននាក់ ដែលគាំទ្រ ល្បឿន 30/40 របស់អស់លោក ? មិនមែនសម័យ៧៩ ជិះរទេះគោទេណា អស់លោក ? បើមុខសាលារៀនវាមិនអីទេ ! ហើយខ្ញុំនិយាយនេះ កុំចោតថាបក្សប្រឆាំង ខ្ញុំមើលឃើញអស់លោកប៉ូលិសធំវិញ ចេញដំណើរ ឡានបើកផ្ដាច់ព្រលឹង ម៉េចមិនគោរពអាល្បឿនដែលដាក់ឲ្យរាស្ត្រ 30/40 ផងទៅ» នេះជាសំណេររបស់លោកជំទាវ ហ៊ុន ស៊ីណាត គឺជាប្អូនស្រីសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជណាចក្រកម្ពុជា ។
ដោយឡែកលោក ផែង វណ្ណះ បានលើកឡើងនៅលើហ្វេសប៊ុកផេកផ្ទាល់ខ្លួននាថ្ងៃទី០៩ តុលានេះថា «ផ្លូវ៦០ម៉ែត្រ អោយបើកតែ ៤០គីឡូម៉ែត្រ ក្នុង១ម៉ោង ដឹងតែមានគេជេរទៀតហើយ ! ផ្លូវចេញពីរាជធានី មិនមែនក្នុងរាជធានីទេ តើអស់លោកណា ជាអ្នកផ្ដួចផ្ដើមគំនិតដាក់ស្លាកកំណត់ល្បឿននេះ ? មានដែលបើកភ្នែក បើកត្រចៀក ស្ដាប់មហាជនខ្លះទេ ?» ។
សូមជម្រាបថា មន្ទីរសាធារណការរាជធានីភ្នំពេញ បានបញ្ជាក់លើទំព័រហ្វេសប៊ុករបស់ខ្លួន កាលពីថ្ងៃទី០៦ ខែតុលា ឆ្នាំ២០២០ យ៉ាងដូច្នេះថា ៖«ដោយប្រឈមបញ្ហាគ្រោះថ្នាក់ចរាចរណ៍ កើតមានជាញឹកញាប់ដោយការបើកបរលឿន លើដងមហាវិថី សម្តេចអគ្គមហាសេនាបតីតេជោ ហ៊ុន សែន ចាប់ពីផ្លូវលេខ ២៧១ ដល់ផ្លូវជាតិលេខ ២ ចាប់ពីពេលនេះតទៅ មហាវិថីនេះ ត្រូវបានកំណត់ល្បឿនយានយន្តបើកបរមិនអោយលើស ៤០គ.មក្នុង១ម៉ោង» ៕
ចែករំលែកព័តមាននេះ