រាជធានីភ្នំពេញ ៖ យោងតាមការបញ្ជាក់ពីប្រធានសមាគមធនាគារនៅកម្ពុជាបានអោយដឹងថា ដោយសារតែ មានចំណាត់ការរបស់រាជរដ្ឋាភិបាលលើការជួយវិស័យឯកជន បានជួយអោយវិស័យធនាគារនៅកម្ពុជាកាត់បន្ថយនូវផលប៉ះពាល់មួយចំនួនផងដែរនេះ ។ លោកបណ្ឌិត អ៊ិន ចាន់នីប្រធានសមាគមធនាគារនៅកម្ពុជាបានលើកឡើងថា…
រាជធានីភ្នំពេញ ៖ យោងតាមការបញ្ជាក់ពីប្រធានសមាគមធនាគារនៅកម្ពុជាបានអោយដឹងថា ដោយសារតែ មានចំណាត់ការរបស់រាជរដ្ឋាភិបាលលើការជួយវិស័យឯកជន បានជួយអោយវិស័យធនាគារនៅកម្ពុជាកាត់បន្ថយនូវផលប៉ះពាល់មួយចំនួនផងដែរនេះ ។
លោកបណ្ឌិត អ៊ិន ចាន់នីប្រធានសមាគមធនាគារនៅកម្ពុជាបានលើកឡើងថា គ្រប់វិស័យទាំងអស់លើសកលលោកសុទ្ធតែមានផលប៉ះពាល់ពីកូវីដ១៩ ក៏ប៉ុន្តែសម្រាប់វិស័យមួយចំនួននៅក្នុងប្រទេសកម្ពុជា បានបានកាត់បន្ថយនូវការប៉ះពាល់មួយចំនួន ដោយសាតែមានវិធានការរបស់រាជរដ្ឋាភិបាលក្នុងការជួយវិស័យទាំងនោះ ។
លោកបានបន្តថា « សម្រាប់វិស័យធនាគារ រដ្ឋាភិបាលតាមរយៈធនាគារជាតិនៃកម្ពុជា បានចេញប្រកាស និងសារាចរណ៍ណែនាំច្រើន ដើម្បីអោយធនាគារអាចបន្តបម្រើអតិថិជនរបស់ខ្លួនឯងបានដោយមិនមានផលប៉ះពាល់ច្រើន ដូចជាអនុបាតទាក់ទងជាមួយនឹងទុនបម្រុង និងច្បាប់ទាក់ទងជាមួយនឹងពន្ធកាត់ទុកជាដើម » ។
លោកបានបន្ថែមទៀតថា ដោយសារតែប្រកាសនិងសារាចរណ៍ជាច្រើនរបស់រដ្ឋាភិបាល បានធ្វើអោយផលប៉ះពាល់មានតិច ទាំងស្ថាប័នអោយខ្ចីនិងអតិថិជនរបស់ស្ថាប័ន ។ ម្យ៉ាងទៀតធនាគារនៃកម្ពុជា ដែលជាសេនាធិការរបស់រាជរដ្ឋាភិបាលក៏បានជំរុញអោយធនាគាររៀបចំឥណទានឡើងវិញ ដែលធ្វើអោយអតិថិជនដែលខ្ចីប្រាក់អាចមានលទ្ធភាពក្នុងការសងត្រលប់មកកាន់ធនាគារដែលខ្លួនខ្ចីនោះវិញ ។ គិតត្រឹមខែសីហា ឆ្នាំ ២០២០ ធនាគារនៅកម្ពុជាទាំងអស់បានរៀបចំឥណទានឡើងវិញតាមសំណើររបស់អតិថិជនមានចំនួន២៧ម៉ឺនអតិថិជន គិតជាទឹកប្រាក់៣៦០០លានដុល្លារអាមេរិក ឬស្មើនឹង១២ភាគរយនៃសមតុល្យឥណទាន ។
លោកបណ្ឌិតអ៊ិន ចាន់នីបានបន្ថែមថា ទោះបីជាកម្ពុជាជួបនឹងវិបត្តិយ៉ាងនេះក្ដី សម្រាប់បណ្ដាធនាគារទាំងអស់នៅកម្ពុជានៅតែទទួលបានប្រាក់ចំនេញរបស់ខ្លួនដដែល ក៏ប៉ុន្តែទំហំនៃការប៉ះពាល់ទៅលើប្រាក់ចំណេញនៅតែមានសម្រាប់បណ្ដាធនាគារនានាក្នុងប្រទេសកម្ពុជាដូចជាលើពិភពលោកទាំងមូលផងដែរ ។
បើតាមក្រសួងសេដ្ឋកិច្ចនិងហិរញ្ញវត្ថុ បានអោយដឹងថា រហូតមកដល់ពេលនេះ រាជរដ្ឋាភិបាលបានដាក់ចេញនូវវិធានការជុំទី៦ហើយ ក្នុងគោលបំណង បន្តទ្រទ្រង់និងស្ដារអាជីវកកម្ម និងធុរកិច្ចអោយងើបឡើង ។
យោងតាមរបាយការណ៍របស់ធនាគារពិភពលោក ប្រចាំកម្ពុជា កាលពីពេលថ្មីៗនេះ បានកោតសរសើរដល់កម្ពុជា ក្នុងការដាក់ចេញវិធានការទប់ស្កាត់និងជួយដល់វិស័យឯកជន និងប្រជាពលរដ្ឋរបស់ខ្លួន ដែលការណ៍នេះ បានជួយដល់កម្ពុជា ក្នុងការទប់ស្កាត់បាននូវវិបត្តិសេដ្ឋកិច្ចធ្ងន់ធ្ងរក្នុងនោះ ។
ដោយឡែកធនាគារអភិវឌ្ឍន៍អាស៊ីក៏បានព្យាករពីកំណើនសេដ្ឋកិច្ចកម្ពុជាក្នុងឆ្នាំ ២០២០នេះផងដែរ ។កាលពីអំឡុងពាក់កណ្ដាលឆ្នាំ ធនាគារនេះបានព្យាករថាសេដ្ឋកិច្ចអាចធ្លាក់ចុះជាអវិជ្ជមានរហូតដល់ដក៥,៥ភាគរយ ហើយថ្មីៗនេះបានព្យាករឡើងវិញមកនៅត្រឹមដក៤ភាគរយប៉ុណ្ណោះ ។
យ៉ាងណាក្ដីស្ថាប័នធនាគារអន្តរជាតិទាំងពីរ ក៏មានសុទិដ្ឋនិយមចំពោះសេដ្ឋកិច្ចកម្ពុជាក្នុងឆ្នាំ ២០២១ ដោយរំពឹងថានឹងមានកំណើនជាវិជ្ជមានឡើងវិញ ៕
ចែករំលែកព័តមាននេះ