រាជធានីភ្នំពេញ ៖ បុរសម្នាក់ជិះម៉ូតូចេញពីកន្លែងធ្វើការក្នុងគោលបំណងធ្វើដំណើរទៅផ្ទះ ស្រាប់តែមានរថយន្តស៊េរីទំនើបមួយគ្រឿងបត់ចូលផ្ទះក្នុងល្បឿនលឿនក៏ជ្រុលបុកម៉ូតូចំពីមុខយ៉ាងពេញទំហឹង បណ្តាលឱ្យអ្នកបើកបរម៉ូតូដួលបោកក្បាលបាត់បង់ជីវិតភ្លាមៗនៅនឹងកន្លែងកើតហេតុ រីឯអ្នកបើកបររថយន្តត្រូវបានសមត្ថកិច្ចធ្វើការឃាត់ខ្លួនយកទៅប៉ុស្តិ៍ដើម្បីធ្វើការសួរនាំ ។
ហេតុការណ៍ខាងលើនេះបានកើតឡើងកាលពីវេលាម៉ោង៧និង៣០នាទីយប់ថ្ងៃទី៨ ខែតុលា ឆ្នាំ២០២០ តាមបណ្តោយផ្លូវGS នៅចំណុចក្នុងបុរីអ័រគីដេ ស្ថិតនៅក្នុងភូមិខ្ទរ សង្កាត់ព្រែកលៀប ខណ្ឌជ្រោយចង្វារ ។
ជនរងគ្រោះដែលបាត់បង់ជីវិតឈ្មោះ ខន សុភួន ភេទប្រុស អាយុ២៤ឆ្នាំ មានស្រុកកំណើតនៅភូមិបឹងក្អែក ស្រុកពាមជរ៍ ខេត្តព្រៃវែង ជាអ្នកបើកបរម៉ូតូមួយគ្រឿងម៉ាកហុងដាឌ្រីម ពណ៌ខ្មៅ ពាក់ស្លាកលេខ ព្រៃវែង 1P-1443 ។ ចំណែករថយន្តមួយគ្រឿងខាងលើម៉ាក OD Q7 ពណ៌ខ្មៅ ពាក់ស្លាកលេខ ភ្នំពេញ 2A-Q0805 បើកបរដោយឈ្មោះហ្វា ណូតអីម៉ា ភេទស្រី អាយុ២០ឆ្នាំ ជាខ្មែរអ៊ីស្លាម ស្នាក់នៅផ្ទះលេខ86 ភូមិខ្ទរ សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ ។
សាក្សីដែលឃើញហេតុការណ៍បានអោយដឹងថា មុនពេលកើតហេតុខាងលើនេះ គេបានឃើញជនរងគ្រោះជិះម៉ូតូមួយគ្រឿង ធ្វើដំណើរតាមបណ្តោយផ្លូវGSក្នុងទិសដៅពីលិចទៅកើត លុះពេលមកដល់ចំណុចកើតហេតុខាងលើនេះ ស្រាប់តែមានរថយន្តមួយគ្រឿង បើកបរតាមបណ្តោយផ្លូវGS ក្នុងទិសដៅពីកើតទៅលិច ក្នុងគោលបំនងបត់ឆ្វេងចូលក្នុងផ្ទះ ។
តាមប្រភពដដែលបានបន្តថា ខណៈពេលរថយន្តកំពុងតែបត់មិនបានប្រយ័ត្នចាប់ហ្វ្រាំងមិនទាន់ក៏ជ្រុលទៅបុកចំពីមុខម៉ូតូរបស់ខាងរងគ្រោះយ៉ាងពេញទំហឹង បណ្តាលអោយអ្នកបើកបរម៉ូតូដួលបោកក្បាលបាត់បង់ជីវិតភ្លាមៗនៅនឹងកន្លែងកើតហេតុ ចំនែកឯម៉ូតូវិញគឺត្រូវរថយន្តម៉ាកODនោះបុកកិនអូសពី5ទៅ6ម៉ែត្រ បង្កអោយមានការភ្ញាក់ផ្អើលទៅដល់សមត្ថកិច្ចមូលដ្ឋាន និងប្រជាពលរដ្ឋនាំគ្នាចោមរោមមើល រីឯនារីជាម្ចាស់រថយន្តត្រូវបានសមត្ថកិច្ចធ្វើការឃាត់ខ្លួនភ្លាមៗយកទៅកាន់ប៉ុស្តិ៍រដ្ឋបាលនគរបាលព្រែកលៀបដើម្បីធ្វើការសួរនាំ ចំណែកសពជនរងគ្រោះវិញត្រូវបានសមត្ថកិច្ចយកទៅ
តម្កល់ទុកនៅឯវត្តទឹកថ្លាជាបណ្តោះអាសន្ន។
ក្រោយពេលកើតហេតុ រថយន្តនិងម៉ូតូត្រូវបានសមត្ថកិច្ចធ្វើការវាស់វែងយកទៅរក្សាទុកនៅការិយាល័យចរាចរណ៍ផ្លូវគោកដើម្បីធ្វើការដោះស្រាយគ្នានៅពេលក្រោយជាបន្តទៅទៀត ៕ (កែសម្រួលដោយ ៖ ធីតា)
ចែករំលែកព័តមាននេះ