មហោស្រពសិល្បៈជាតិល្ខោនយីកេនឹងបង្ហាញខ្លួននៅខេត្តតាកែវ
- តាកែវ
ខេត្តតាកែវ ៖ មហោស្រពសិល្បៈជាតិ ល្ខោនយីកេ លើកទី១ នឹងរៀបចំនៅខេត្តតាកែវ នាថ្ងៃទី១៩-២០ ខែតុលា ឆ្នាំ២០២០ នៅសាលមហោស្រពខេត្ត…
ខេត្តតាកែវ ៖ មហោស្រពសិល្បៈជាតិ ល្ខោនយីកេ លើកទី១ នឹងរៀបចំនៅខេត្តតាកែវ នាថ្ងៃទី១៩-២០ ខែតុលា ឆ្នាំ២០២០ នៅសាលមហោស្រពខេត្ត ។
មន្ទីរវប្បធម៌ និងវិចិត្រសិល្បៈខេត្តតាកែវ បានប្រកាសជូនដំណឹងដល់សាធារណជន សិល្បករ សិល្បការិនី មន្ត្រីរាជការ យុវជន សិស្ស និស្សិត ឱ្យបានដឹងថា ដើម្បីអភិរក្ស និងអភិវឌ្ឍ លើកស្ទួយថែរក្សាតម្លៃសិល្បៈវប្បធម៌ ផ្នែកល្ខោនយីកេ ឱ្យបានជ្រាបថ្កុំថ្កើង ស្ថិតស្ថិរគង់វង្ស នៅក្នុងបេះដូងខ្មែរ មន្ទីរវប្បធម៌និងវិចិត្រសិល្បៈខេត្តតាកែវ បានសហការជាមួយនាយកដ្ឋានសិល្បៈទស្សនីយភាពនៃក្រសួងវប្បធម៌ និងវិចិត្រសិល្បៈ រៀបចំមហោស្រពសិល្បៈជាតិល្ខោនយីកេ លើកទី១ នៅខេត្តតាកែវ ។
មហោស្រពនេះចំនួន២ថ្ងៃប្រព្រឹត្តទៅនៅថ្ងៃចន្ទ និងថ្ងៃអង្គារ ទី១៩-២០ ខែតុលា ឆ្នាំ២០២០ វេលាម៉ោង៨នាទីព្រឹក តទៅ នៅសាលមហោស្រពខេត្តតាកែវ ។
មន្ទីរវប្បធម៌ និងវិចិត្រសិល្បៈខេត្តតាកែវ ស្នើឲ្យឯកឧត្តម លោកជំទាវ លោក លោកស្រី អ្នកនាង កញ្ញា សិស្ស និស្សិត យុវជន ប្រជាពលរដ្ឋ អាជីវករ សិល្បករទាំងអស់ ចូលរួមទស្សនាកម្សាន្ត ដោយក្តីរីករាយ និងឥតគិតថ្លៃ ។
ខេត្តតាកែវជាជង្រុកសិល្បៈយីកេ និងកិត្តិនាមសិល្បៈបុរាណមួយនេះល្បីល្បាញ រហូតមកដល់បច្ចុប្បន្ន ។ ជាក់ស្ដែងទូរទស្សន៍ជាតិបានថតយីកេខេត្តតាកែវផ្សព្វផ្សាយជូនទស្សនិកជនទស្សនា ដូចជារឿងព្រះថោងនាងនាគ រឿងកាកី រឿងព្រះវិធុរបណ្ឌិត រឿងសុវណ្ណសាម ជាដើម ។
លើសពីនេះបើតាមលោកប្រាក់ ប៊ន អតីតប្រធានមន្ទីរវប្បធម៌ និងវិចិត្រសិល្បៈខេត្តតាកែវ ឲ្យដឹងថា យីកេខេត្តតាកែវ ធ្លាប់សម្តែងស្ទើរតែគ្រប់មហោស្រពទូទាំងប្រទេស ក្នុងពិធី ធំៗ ដូចជាពិធីឆ្លងសហស្សវត្សរ៍ មហោស្រពអង្គរ និងចូលរួមមហោស្រពថ្នាក់ជាតិ ធំៗ ។ ធ្លាប់ទទួលបានពានរង្វាន់លេខ១ពីសម្តេចអគ្គមហាសេនាបតីតេជោហ៊ុន សែន ធ្លាប់ទទួលពីក្រសួងវប្បធម៌ ជាក់ស្តែងយីកេរឿងព្រះថោងនាងនាគទទួលបានចំណាត់ថ្នាក់លេខ១ពីមហោស្រពប្រឡងសិល្បៈបុរាណថ្នាក់ជាតិទូទាំងប្រទេស ។
លោកប្រាក់ ប៊ន ថ្លែងថាមិនដែលសម្តែងកន្លែងណាហើយយីកេតាកែវធ្លាក់អន់ថយនោះឡើយ ។
អ្នកសិល្បៈបុរាណ និងមហាជនមួយចំនួនពេលទទួលដំណឹងពីការរៀបចំមហោស្រពសិល្បៈជាតិ ល្ខោនយីកេ លើកទី១នៅខេត្តតាកែវ បានសម្ដែងការអបអរសាទរ និងចាត់ទុកថាជាសកម្មភាពដ៏ល្អក្នុងការលើកតម្កើង និងអភិរក្សសិល្បៈបុរាណជាតិ ។ ម្យ៉ាងសក្ដិសមនឹងខេត្តតាកែវដែលមានឫសគល់ និងល្បីល្បាញដោយសិល្បៈយីកេនេះ ៕
ចែករំលែកព័តមាននេះ