អ្នកស្រុកថ្លាន់១០០ សូមសម្តេចតេជោជួយផង !
- កំពត
ខេត្តកំពត ៖ បានឃើញពាក្យបណ្តឹងមួយរបស់ប្រជាពលរដ្ឋ២២៦គ្រួសារចោទក្រុមហ៊ុនឧកញ៉ា សូ ងួន ដោយសូមសម្តេចតេជោជួយរកយុត្តិធម៌ ។ ក្នុងពាក្យបណ្តឹងអន្តរាគមន៍បានចែងថា ខ្ញុំបាទឈ្មោះ យូ…
ខេត្តកំពត ៖ បានឃើញពាក្យបណ្តឹងមួយរបស់ប្រជាពលរដ្ឋ២២៦គ្រួសារចោទក្រុមហ៊ុនឧកញ៉ា សូ ងួន ដោយសូមសម្តេចតេជោជួយរកយុត្តិធម៌ ។
ក្នុងពាក្យបណ្តឹងអន្តរាគមន៍បានចែងថា ខ្ញុំបាទឈ្មោះ យូ ស៊ីឈាង, កឹម ចាន់, យ៉ែម ឈឿន, ហ៊ីង ស៊ីន ជាអ្នកតំណាងអោយប្រជាពលរដ្ឋ២២៦គ្រួសារ មានទីតាំងស្ថិតនៅភូមិសាស្ត្រថ្លាន់១០០នៃភូមិព្រៃពាយ ភូមិដុំផ្តៅ ឃុំត្រពាំងភ្លាំង ស្រុកឈូក ខេត្តកំពត (ដីទំហំ ១១៨៣,៩៦ហិកតា) មានមេធាវីតំណាងដោយអាណត្តិមេធាវី ងួន មករា ។ សូមគោរពជូន សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា សូមទានជ្រាបដ៏ខ្ពង់ខ្ពស់បំផុត។
កម្មវត្ថុ៖ ១-សុំជួយអន្តរាគមន៍ទប់ស្កាត់ និងផ្អាកនូវសកម្មភាពកម្លាំងរបស់ក្រុមហ៊ុនលោកឧកញ៉ា ដែលបានធ្វើសកម្មភាពកាប់រានបំផ្លាញផលដំណាំ និងកម្ទេចផ្ទះសម្បែងប្រជាពលរដ្ឋ២២៦គ្រួសារ មានទីតាំងស្ថិតនៅភូមិសាស្ត្រថ្លាន់១០០នៃភូមិព្រៃពាយ ភូមិដុំផ្តៅ ឃុំត្រពាំងភ្លាំង ស្រុកឈូក ខេត្តកំពត លើទីតាំងដីទំហំជាង២០០ហិចតា នៃទំហំដីសរុប១១៨៣,៩៦ហិកតា និងសុំដកចេញកុងត្រូលហាមឃាត់ការចេញ-ចូលរបស់ប្រជាពលរដ្ឋលើផ្លូវសាធារណៈរបស់រដ្ឋ និង២-សុំជួយអន្តរាគមន៍ចុះមកពិនិត្យវាស់វែង និងជួយដោះស្រាយទំនាស់វិវាទដីធ្លីរបស់ប្រជាជន២២៦គ្រួសារ ជាមួយនិងក្រុមហ៊ុន ។
យោងឧបសម្ព័ន្ធឯកសារយោង តបតាមកម្មវត្ថុ និងយោងខាងលើខ្ញុំបាទ សូមជម្រាបជូន មេត្តាជ្រាបថា៖ កាលពីថ្ងៃទី០២ តុលា ឆ្នាំ២០២០ រហូតមកដល់ថ្ងៃនេះ ខាងភាគីក្រុមហ៊ុន បានដឹកនាំកម្លាំងឈុតខ្មៅរាប់រយនាក់មកកាប់បំផ្លាញផលដំណាំ និងបំផ្លាញ់ផ្ទះសម្បែងរបស់ប្រជាជន២២៦គ្រួសារ ដែលមានទីតាំងស្ថិតនៅភូមិសាស្ត្រថ្លាន់១០០ នៃភូមិព្រៃពាយ ភូមិដុំផ្តៅ ឃុំ ត្រពាំង ភ្លាំង ស្រុកឈូក ខេត្តកំពត ដោយ ក្រុមហ៊ុនចោទថា ប្រជាជនធើ្វដំណាំជាន់លើដី ក្រសួងកសិកម្ម ដែលក្រុមហ៊ុនជួលពីរដ្ឋ ដែលដីវិវាទ មានជាង៣០០ម៉ែត្រ (ប្រហែលជាង២០០ហិចតា) ។
សកម្មភាពកាប់បំផ្លាញនេះ គឺបានធ្វើដោយគ្មានការជូនដំណឹងជាមុនឡើយ បច្ចុប្បន្នប្រជាជនចំនួនជាង៣០០នាក់ កំពុងតែជួបគ្រោះទុរគត អត់អាហារ អត់បាយទឹក ដោយសារ ក្រុមហ៊ុនដាក់កុងត្រូលលើផ្លូវសារធារណៈ និងដាក់កំលាំងជាច្រើននាក់ បង្ខាំងប្រជាជននៅក្នុងទីតាំងដីរបស់ខ្លួន មិនអោយចេញចូលទិញម្ហូបអាហារបាន និងបានធ្វើអោយប្រជាជនគ្មានទីជម្រក ។
ព្រោះពួកគាត់ជាប្រជាជនស្លួតត្រង់ ដែលដី១២០០ហិចតានេះ ប្រជាជនបានមកពីឯកឧត្តម ហ៊ុន សាន បានប្រគល់អោយប្រជាជន២២៦គ្រួសារនេះ តាំងពីឆ្នាំ ២០១១ ក្រោយពេលប្រគល់ប្រជាជនបានចូលកាប់ស្ការព្រៃ ដើម្បីបង្កបង្កើនផល សង់ផ្ទះនៅជាដើម រហូតមកដល់ពេលបច្ចុប្បន្ននេះ ដោយគ្មានក្រុមហ៊ុននេះមកប្តឹងតវ៉ា ឬហាមឃាត់ឡើយ។ ហេតុនេះ ប្រជាជនសូមអោយ សម្តេចតេជោ នាយករដ្ឋមន្ត្រី មេត្តាជួយអន្តរាគមន៍ ដើម្បីរក្សាសុវត្ថិភាព និងជីវិតរបស់ប្រជាជនជាច្រើនគ្រួសារ ដោយក្តីមេត្តាអនុគ្រោះបំផុត ។
ថ្ងៃពុធ ៥ រោច ខែអស្សុជ ឆ្នាំជូត ទោស័ក ព.ស ២៥៦៤ ខេត្តកំពត, ថ្ងៃទី០៧ ខែតុលា ឆ្នាំ២០២០ ស្នាមមេដៃស្តាំ ។
ម្សិលមិញមិនអាចសុំការបំភ្លឺពីភាគីតំណាងក្រុមហ៊ុនឧកញ៉ា សូ ងូន បាននៅឡើយទេ ដោយទរស័ព្ទមិនអាចទាក់ទងបាន ។ ប៉ុន្តែកោះសន្តិភាពបានចាត់ភ្នាក់ងារយកព័ត៌មានប្រចាំខេត្តកំពត ចុះទៅដល់កន្លែងកើតហេតុយកព័ត៌មានជាក់ស្តែងបន្ថែមទៀត និងចុះផ្សាយនៅពេលក្រោយ ។
ប៉ុន្តែប្រភពមួយពីខេត្តកំពតបានប្រាប់ដោយខ្លីថា មានប្រជាជនច្រើននាក់បានទៅរំលោភលើដីសម្បទានសេដ្ឋកិច្ចរបស់ក្រុមហ៊ុនឧកញ៉ា សូ ងួន មិនអាចដោះស្រាយបាន ទើបក្រុមហ៊ុនកំទេចខ្ទមចាំដីនោះចោលទៅ ។ រឿងនេះ គឺវាអីចឹងទេ ៕
ចែករំលែកព័តមាននេះ