រាជធានីភ្នំពេញ ៖ មកទល់ពេលនេះ ឯកសារស្នើសុំឡើងប្រកួតរបស់កីឡាករ ឈុត សេរីវ៉ាន់ថង ទៅកាន់ស្ថាប័នប្រដាល់ដាក់ទ្រុង One Championship ត្រូវបានប្រភពផ្លូវការប្រកាសថា គណៈកម្មការរៀបចំការប្រកួតប្រដាល់ដាក់ទ្រុងដ៏មានប្រជាប្រិយមួយនេះ បានទទួលរួចហើយ ដោយរង់ចាំតែកូវីដ-១៩ ស្ងប់ស្ងាត់ គឺនឹងឱ្យកីឡាករកម្ពុជាឡើងរេញជាផ្លូវការហើយ ។ ដូច្នេះហើយទើបកីឡាករ ឈុត សេរីវ៉ាន់ថង ទន្ទឹងរង់ចាំការប្រកួតមួយនេះ ដើម្បីមានឱកាសបានបង្ហាញមុខនៅក្នុងកម្មវិធីធំមួយនេះទៅតាមក្ដីស្រមៃរបស់ខ្លួន។
យោងតាមបញ្ជាក់របស់ប្រធានដឹកនាំកីឡាករគុនខ្មែរប្រកួតនៅក្រៅប្រទេស លោក ជា រិទ្ធី បានអះអាងថា ឈ្មោះរបស់កីឡាករ ឈុត សេរីវ៉ាន់ថង ត្រូវបានលោកដាក់បញ្ជូនឈ្មោះទៅកាន់គណៈកម្មការប្រកួត One Championship រួចរាល់អស់ហើយ ។ លោកបានថ្លែងជាសាធារណៈមុននេះថា អ្វីៗរង់ចាំតែពេលវេលាអាចប្រកួតបានប៉ុណ្ណោះ គឺឈុត សេរីវ៉ាន់ថង នឹងឡើងប្រកួតបានដូចអ្នកអាជីពហើយ។ ដូច្នេះហើយទើបមួយរយៈនេះ គេឃើញកីឡាករវ័យក្មេងរូបនេះ សកម្មនឹងការហ្វឹកហាត់ក្បាច់គុនចម្រុះ ជាពិសេសគឺបង្វឹកផ្នែកប្រដាល់ដាក់ទ្រុងតែម្ដង ។
យ៉ាងណាមិញ លោក ជា រិទ្ធិ នៅតែមិនទាន់ដឹងថា តើឈុត សេរីវ៉ាន់ថង នឹងអាចឡើងប្រកួតបានជាផ្លូវការនៅក្នុងពេលណានោះទេ ក្នុងពេលដែលព្រឹត្តិការណ៍ធំៗបែបនេះគឺមិនទាន់អាចអនុញ្ញាតបាននៅឡើយក្នុងពេលនេះ ។ លោកបានត្រឹមតែទទូចឱ្យឈុត សេរីវ៉ាន់ថង យកចិត្តទុកដាក់ក្នុងការហ្វឹកហាត់បង្កើនសមត្ថភាពឱ្យបានល្អប៉ុណ្ណោះ ដោយសារតែភាពជាក់ស្ដែង គឺការប្រកួត One Championship អាចកើតមានឆាប់ៗក៏ថាបាន ប្រសិនបើការបើកប្រកួត អាចសុំច្បាប់រៀបចំបាន។
ងាកទៅកីឡាករ ឈុត សេរីវ៉ាន់ថង លោកបានប្រកាសថា ដោយសារកូវីដ-១៩ ធ្វើឱ្យលោកមានការប៉ះពាល់យ៉ាងខ្លាំង ទាំងការប្រកួតក្នុងស្រុក និងគម្រោងត្រូវប្រកួតនៅ One Championship។ លោកថា បើស្ថានភាពនេះស្ងប់ស្ងាត់ មិនមែនគ្រាន់តែព្រឹត្តិការណ៍ដែលបានរៀបរាប់នេះទេ ដែលលោកត្រូវប្រកួត ពោលគឺការប្រកួតនៅអន្តរជាតិជាច្រើនទៀត ក៏នឹងត្រូវមានឈ្មោះឡើងប្រកួតផងដែរ ។
លោកសម្ដែងអារម្មណ៍សោកស្ដាយ និងបន់ឱ្យកូវីដឆាប់រលាយ ដើម្បីបានបង្ហាញសមត្ថភាពនៅលើសង្វៀនប្រដាល់ដាក់ទ្រុង ដែលជាក្ដីស្រមៃរបស់លោក។ ក្នុងនោះប្រសិនបើកូវីដស្ងប់ស្ងាត់ ការប្រកួតធំៗក្នុងស្រុកជាច្រើនផ្សេងទៀត ក៏ពិតជាសំបូរធ្វើឱ្យលោកទទួលបានចំណូលច្រើនផងដែរ។
គួរបញ្ជាក់ផងដែរថា ឈុត សេរីវ៉ាន់ថង គឺជាកីឡាករវ័យក្មេង និងជាជើងខ្លាំងមួយរូបប្រចាំនៅក្លិបរាហូកីឡាខេត្តបាត់ដំបង ។ លោកជាកីឡាករជួរមុខផ្នែកប្រដាល់សេរីក្នុងប្រភេទទម្ងន់៦០គីឡូក្រាមមួយរូប ដោយពេលកន្លងមកលោកក៏ធ្លាប់ឈ្នះពាន ISI និងមេដាយប្រាក់ពីព្រឹត្តិការណ៍កីឡាជាតិផងដែរ ។ នៅលើសង្វៀនលោកសំបូរការផ្គូផ្គងឱ្យឡើងរេញ តែមកពីពិបាករកដៃគូប្រកួតទើបស្ងាត់មួយរយៈតាំងពីកីឡាករថៃលែងមកប្រកួតកើត ទើបធ្វើឱ្យលោកបាត់បង់ភាពលេចធ្លោគួរសម បើធៀបនឹងពេលឡើងកូដ ៕
ចែករំលែកព័តមាននេះ