រាជធានីភ្នំពេញ ៖ បុរស២នាក់ និងស្ត្រីម្នាក់កំពុងបើករថយន្តមួយគ្រឿង រួចក៏ខឹងនឹងរថយន្តដឹកដែកមិនឲ្យព្រមឲ្យវ៉ាជែងទៅមុន លុះពេលមកដល់ចំណុចស្តុបក៏ចុះពីលើរថយន្តទៅសួរនាំបង្កឱ្យមានហិង្សាវាយតប់គ្នារងរបួសទាំងសងខាងតែម្តង បង្កឲ្យមានការភ្ញាក់ផ្អើលកាលពីម៉ោង10និង30នាទីយប់ ថ្ងៃទី7 ខែតុលា ឆ្នាំ2020…
រាជធានីភ្នំពេញ ៖ បុរស២នាក់ និងស្ត្រីម្នាក់កំពុងបើករថយន្តមួយគ្រឿង រួចក៏ខឹងនឹងរថយន្តដឹកដែកមិនឲ្យព្រមឲ្យវ៉ាជែងទៅមុន លុះពេលមកដល់ចំណុចស្តុបក៏ចុះពីលើរថយន្តទៅសួរនាំបង្កឱ្យមានហិង្សាវាយតប់គ្នារងរបួសទាំងសងខាងតែម្តង បង្កឲ្យមានការភ្ញាក់ផ្អើលកាលពីម៉ោង10និង30នាទីយប់ ថ្ងៃទី7 ខែតុលា ឆ្នាំ2020 តាមបណ្តោយផ្លូវហាណូយកែងផ្លូវម៉ុងរិទ្ធី ចំណុចស្តុប24ម៉ោង ស្ថិតនៅក្នុងសង្កាត់ភ្នំពេញថ្មី ខណ្ឌសែនសុខ ។
បើតាមសាក្សីឃើញហេតុការណ៍បានឱ្យដឹងថា មុនពេលកើតហេតុ គឺខាងរថយន្តដឹកដែក ម៉ាកហ៊ីយ៉ាន់ដាយ ពណ៌ស ពាក់ស្លាកលេខភ្នំពេញ 3E5755 ជិះគ្នា2នាក់ គឺតៃកុងម្នាក់ និងព្រូម្នាក់ បានបើកបរតាមបណ្តោយផ្លូវហាណូយ ពីត្បូងទៅជើង ចំណែករថយន្តមួយគ្រឿងទៀតម៉ាកហ៊ីយ៉ាន់ដាយ ពណ៌ស ពាក់ស្លាកលេខភ្នំពេញ 2AX5632 ជិះ៣នាក់ ក្នុងនោះប្រុស២នាក់ និងស្ត្រីម្នាក់ បានបើកបរតាមបណ្តោយផ្លូវម៉ុងរិទ្ធីពីកើតទៅលិច ក្នុងគោលបំណងបើកទៅផ្ទះនៅម្តុំភ្នំពេញថ្មី ។
សាក្សីខាងលើបន្តថា ខណៈមកដល់ចំណុចកើតហេតុ រថយន្តដឹកដែកបានឈប់ស្តុប ហើយខាងរថយន្តហ៊ីយ៉ាន់ដាយ ក៏បានបើកទៅឈប់ក្បែររថយន្តដឹកដែកដែរ ក្រោយមកស្រាប់តែខាងរថយន្តហ៊ីយ៉ាន់ដាយ ចុះពីរថយន្តរួចទៅគោះទ្វាររថយន្តដឹកដែក ហើយវ៉ៃគ្នាជាមួយនឹងរថយន្តដឹកដែកតែម្តង បណ្តាលឱ្យផ្អើលពេញផ្លូវ និងឱ្យមានអ្នកបើករថយន្តហ៊ីយ៉ាន់ដាយមានរបួសឈាមច្រមុះ។ ភ្លាមៗនោះដែរ សមត្ថកិច្ចមូលដ្ឋានក៏ ចុះមកអន្តរាគមន៍ រួចឃាត់យកទៅប៉ុស្តិ៍ភ្នំពេញថ្មី ដើម្បីរកខុសត្រូវរៀងៗខ្លួន ។
បើតាមសំដីស្ត្រីជាប្រពន្ធរបស់អ្នកបើករថយន្តហ៊ីយ៉ាន់ដាយវិញ បាននិយាយថា គាត់ចេញមកពីកម្មវិធីជប់លាងវិញ ក្នុងគោលបំណងទៅផ្ទះ ហើយក៏បានធ្វើដំណើរមកដល់ចំណុចកើតហេតុ ស្រាប់តែរថយន្តដឹកដែកនោះ គឺមានបំណងមិនឱ្យគាត់វ៉ាជែងទៅមុននោះទេ ហើយមួយណាទៀត ពេលដែលបត់ឆ្លងផ្លូវក៏មិនឱ្យគាត់បត់ទៀត ទើបប្តីរបស់គាត់បានដើរទៅសួរនាំ ក៏ត្រូវបានខាងតៃកុងរថយន្តដឹកដែកវាយតែម្តងទៅ ។
ចំណែកសំដីរបស់ខាងតៃកុងរថយន្តដឹកដែកវិញបាននិយាយថា ខ្លួនបើករថយន្តសុខៗស្រាប់តែខាងរថយន្តហ៊ីយ៉ាន់ដាយ មកគោះទ្វារ និងបើកទាញទ្វារ រួចវាយគាត់យកៗ រហូតរងរបួសមុខមាត់តិចតួចទាំង២នាក់ ទើបគាត់វាយវិញតែម្តង ។
ក្រោយពេលកើតហេតុខាងលើនេះ ភាគីទាំងសងខាងសុខចិត្តស្មើគ្នា រួចបញ្ចប់រឿងនៅនឹងកន្លែងកើតហេតុតែម្តង ៕
ចែករំលែកព័តមាននេះ