ថៃ ៖ កម្លាំងប៉ូលិសបង្ក្រាបគ្រឿងញៀន នៃប្រទេសថៃ រួមជាមួយកម្លាំងចម្រុះក្នុងមូលដ្ឋាន សហការគ្នា ចាប់បានជនសង្ស័យមួយក្រុម ជាជនជាតិជប៉ុន ចំនួន០៥នាក់ រួមមានទី១-ឈ្មោះ…
ថៃ ៖ កម្លាំងប៉ូលិសបង្ក្រាបគ្រឿងញៀន នៃប្រទេសថៃ រួមជាមួយកម្លាំងចម្រុះក្នុងមូលដ្ឋាន សហការគ្នា ចាប់បានជនសង្ស័យមួយក្រុម ជាជនជាតិជប៉ុន ចំនួន០៥នាក់ រួមមានទី១-ឈ្មោះ Katsuhisa komiya អាយុ៤១ឆ្នាំ, ទី២-ឈ្មោះ Prasit Silpai អាយុ៤០ឆ្នាំ, ទី៣-ឈ្មោះ Chumphae Koh Kaew អាយុ៣០ឆ្នាំ, ទី៤-ឈ្មោះ Midaokamsom អាយុ៤៧ឆ្នាំ និងទី៥-ឈ្មោះ Pichet Kraikamol អាយុ១៨ឆ្នាំ ។
ប៉ូលិសថៃ រកឃើញ កញ្ឆាក្រៀមស្ងួត, ដើមកញ្ឆាដុះពន្លក, ជ័រកញ្ឆាឬក្រមួនគ្រាប់, ប្រេងកញ្ឆា និងម៉ាស៊ីនចម្រាញ់ចំនួន ៣គ្រឿង នៅក្នុងផ្ទះមួយកន្លែង ស្ថិតក្នុងភូមិវ៉ាងតាន់ ស្រុកសានផាកវ៉ាន់ ក្នុងខេត្តឈៀងម៉ៃ ប្រទេសថៃ កាលពីថ្ងៃទី០៣ ខែតុលា ឆ្នាំ២០២០ ។
ប្រតិបត្តិការបង្ក្រាបដំណាំកញ្ឆានេះ ធ្វើឡើងដោយក្រុមល្បាតបង្ក្រាបគ្រឿងញៀន និងកម្លាំងពិសេស(១៩១) បានទទួលពាក្យបណ្តឹងថា មានក្រុមជនជាតិជប៉ុន រត់ពន្ធ និងលក់កញ្ឆាក្រៀម ដែលដាំដុះដោយសរីរាង្គ មានគុណភាពខ្ពស់ និងផលិតផលសម្រេចដែលធ្វើចេញពីកញ្ឆាជាច្រើនមុខទៀត ហើយក៏បានបញ្ចុះបញ្ចូលជនបរទេស និងប្រជាជនថៃផងដែរ ឲ្យលក់ដូរកញ្ឆាទាំងនេះ ដោយអះអាងថា ពួកគេត្រូវបានអាជ្ញាធរថៃអនុញ្ញាតឲ្យដាំ និងផលិតដោយស្របច្បាប់ ។ ភាគច្រើនផលិតផលកញ្ឆា ទាំងនេះ គឺនាំចេញទៅបរទេស ។ បន្ទាប់ពីតាមដានដឹងអំពីបញ្ហានេះ កម្លាំងប៉ូលិសបានស្នើសុំដីកា ដើម្បីចាប់ខ្លួន ។
ជនជាប់ចោទ Katsuhisa បានសារភាពថា គាត់បានចូលប្រទេសថៃ ដោយទទួលបានទិដ្ឋាការ និស្សិតថ្នាក់អនុបណ្ឌិត នៅមហាវិទ្យាល័យកសិកម្ម ដោយធ្វើការស្រាវជ្រាវលើការដាំដុះដំណាំ ។ បន្ទាប់មក ក្រុមរបស់គាត់បានទៅសាកលវិទ្យាល័យមួយ នៅខេត្តឈៀងម៉ៃ ហើយបានស្នាក់នៅប្រទេសថៃ អស់រយៈពេល៣-៤ឆ្នាំ ហើយមានចំណាប់អារម្មណ៍ចង់ដាំកញ្ឆា ដោយទិញគ្រាប់ពូជកញ្ឆាពីអឺរ៉ុប ដើម្បីដាំនៅក្នុងបន្ទប់ ដែលមានសីតុណ្ហភាពត្រជាក់ល្មម ហើយទទួលផល តែពីរបីខែប៉ុណ្ណោះ ដើម្បីយកផ្កា គ្រាប់ពូជ ចម្រាញ់យកប្រេងកញ្ឆា ។
ជនជាប់ចោទ បានសារភាពបន្តទៀតថា គាត់មានបំណងដាំ ១០០គីឡូក្រាម ក្នុងរយៈពេល១ឆ្នាំ ហើយបញ្ជូនទៅសហរដ្ឋអាមេរិក លក់ក្នុងតម្លៃ ៤០០,០០០បាត(12,810$) ក្នុងមួយគីឡូក្រាម ដោយដាក់លក់តាមរយៈបណ្តាញសង្គមធ្វីតទ័រ Twitter ភាគច្រើនប្រើភាសាជប៉ុន ៕
ចែករំលែកព័តមាននេះ