លោកមហាសេដ្ឋី ម៉ាក ឃ្យូបេន (Mark Cuban) ដែលជាសហគ្រិននិងវិនិយោគិនដ៏ល្បីឈ្មោះម្នាក់ប្រចាំកម្មវិធី Shark Tank បានវិនិយោគលើក្រុមហ៊ុនជាច្រើនមកដល់បច្ចុប្បន្ននេះ។ នៅខ្ទង់ឆ្នាំ ១៩៩០ លោកបានបង្កើត និងលក់ក្រុមហ៊ុនជាច្រើនដែលបានកសាងទ្រព្យសម្បត្តិរបស់លោកមកស្មើរាប់ប៊ីលានដុល្លារ។ប៉ុន្តែយោងទៅតាមមហាសេដ្ឋីម្នាក់នេះ ការវិនិយោគដែលល្អបំផុតក្នុងជីវិតរបស់លោកគឺការវិនិយោគលើខ្លួនឯង។
ទោះជាលោកសម្រេចបាននូវភាពជោគជ័យជាច្រើនពិតមែនក្តី លោកធ្លាប់រស់នៅក្នុងជីវភាពក្រីក្រពេលដែលលោកមានអាយុប្រមាណ ២០ឆ្នាំ។ លោកធ្លាប់គេងលើឥដ្ឋអាផាតមិនដែលលោកចែករំលែកជាមួយមនុស្សចំនួន ៦ នាក់ទៀត។
លោកបាននិយាយក្នុងបទសម្ភាសន៍នាពេលថ្មីៗនេះថា «ពេលដែលអ្នកចាប់ផ្តើមដំបូង អ្នកអាចមាន ឬមិនមានការងារ។ អ្នកប្រហែលជាមិនមានលុយទេ។ អ្នកក៏មិនប្រាកដប្រជាពីអាជីពរបស់អ្នកដែរ។ ប៉ុន្តែអ្វីដែលខ្ញុំបានរៀនតាំងពីនៅក្មេងគឺប្រសិនបើខ្ញុំខិតខំប្រឹងប្រែង ខ្ញុំអាចរៀនបានអ្វីៗស្ទើរតែទាំងអស់។»
លោកបានចែករំលែកទៀតថា លោកបានខិតខំប្រឹងប្រែងរៀនយ៉ាងយូរមុននឹងចេះសរសេរកូដសម្រាប់ Program ។ លោកបានចាប់ផ្តើមការរៀនពេលដែលលោកចូលធ្វើការក្នុងក្រុមហ៊ុនកុំព្យូទ័រមួយទោះពេលនោះលោកមិនមានបទពិសោធន៍ការងារដែលទាក់ទិនពិតមែនក្តី។
លោកបានប្រាប់មកថា លោកបានយកសៀវភៅណែនាំពី Software ខុសៗគ្នាជាច្រើនទៅផ្ទះអានដោយខ្លួនឯងជារៀងរាល់យប់។ លោកបានបន្តថា “ជារៀងរាល់យប់ ខ្ញុំអានខ្លះបន្ទាប់ពីមកដល់ផ្ទះមិនថាយប់ជ្រៅប៉ុនណាទេ។ ខ្ញុំក៏បានចំណាយពេលប្រើកុំព្យូទ័រនៅកន្លែងការងារដើម្បីរៀនពីការបញ្ចូល រកបញ្ហា និងដំណើរការ Software ផងដែរ។” មិនយូរប៉ុន្មាន មនុស្សដែលធ្វើការជាមួយលោកចាប់ផ្តើមគិតថាលោកពិតជាយល់ពីកុំព្យូទ័រពិតមែន។
ការរៀនសរសេរកូដ និងរៀនពី Software បានជួយឲ្យលោករក្សាការងារ និងបានអនុញ្ញាតឲ្យលោកប្រទះឃើញថាលោកស្រលាញ់ការធ្វើការជាមួយកុំព្យូទ័រផងដែរ។ ប៉ុន្តែលោកត្រូវបានបណ្តេញចេញពីការងាររបស់លោកមុនយូរប៉ុន្មានព្រោះលោកបានធ្វើការសម្រេចចិត្តដោយមិនទាន់បានទទួលការយល់ស្របពីនាយកប្រតិបត្តិរបស់ក្រុមហ៊ុនជាមុនសិន។ តែលោកមិនបានបោះបង់ទេ និងបានចាប់ផ្តើមក្រុមហ៊ុនមួយដោយខ្លួនឯងឈ្មោះថា MicroSolutions ដែលបានធ្វើឲ្យលោកក្លាយជាសេដ្ឋីមានទ្រព្យសម្បត្តិរាប់លានដុល្លារ។
លោកបានបន្ថែមទៀតថា «ការដែលខ្ញុំទទួលស្គាល់ថាការរៀនពិតជាជំនាញមួយមែន និងការដែលបន្តរៀនមកដល់ថ្ងៃនេះ ខ្ញុំអាចប្រកួតប្រជែង និងអាចដើរតាមទាន់ និងដើរមុខមនុស្សភាគច្រើន។ ការពិតជាក់ស្តែង មនុស្សភាគច្រើនមិនចំណាយពេលក្នុងការដើរឲ្យទាន់អ្នកដទៃនិងរៀនសូត្របន្ថែមទេ។ ហើយចំណុចនេះតែងតែអនុញ្ញាតឲ្យខ្ញុំឈានមុខអ្នកដទៃ។»
ចែករំលែកព័តមាននេះ