ខេត្តស្វាយរៀង ៖ ជនសង្ស័យ៤នាក់ក្នុងនោះមានស្ត្រីម្នាក់ បានត្រូវសមត្ថកិច្ចបង្ក្រាបជាបន្តបន្ទាប់ និងដកហូតវត្ថុតាងរួមមានគ្រឿងញៀនប្រភេទមេតំហ្វេតាមីន (ម៉ាទឹកកកឬICE) ចំនួន៣៣កញ្ចប់(ធំ៣កញ្ចប់) ម៉ូតូ១គ្រឿង ជញ្ជីងថ្លឹងគ្រឿងញៀន១ ទូរស័ព្ទដៃ៤គ្រឿង…
ខេត្តស្វាយរៀង ៖ ជនសង្ស័យ៤នាក់ក្នុងនោះមានស្ត្រីម្នាក់ បានត្រូវសមត្ថកិច្ចបង្ក្រាបជាបន្តបន្ទាប់ និងដកហូតវត្ថុតាងរួមមានគ្រឿងញៀនប្រភេទមេតំហ្វេតាមីន (ម៉ាទឹកកកឬICE) ចំនួន៣៣កញ្ចប់(ធំ៣កញ្ចប់) ម៉ូតូ១គ្រឿង ជញ្ជីងថ្លឹងគ្រឿងញៀន១ ទូរស័ព្ទដៃ៤គ្រឿង ឧបករណ៍
ប្រើប្រាស់គ្រឿងញៀន និងសម្ភារវេចខ្ចប់គ្រឿងញៀនមួយចំនួនទៀត ។
បើតាមសមត្ថកិច្ចបានឲ្យដឹងថា ករណីទី១-សមត្ថកិច្ចចាប់ខ្លួនជនសង្ស័យម្នាក់ឈ្មោះ ជាសុវណ្ណរត្ន័ ហៅវិត ភេទប្រុស អាយុ២៩ឆ្នាំ មុខរបរមិនពិតប្រាកដ មានទីលំនៅក្នុងភូមិពោធិ៍តាហោ សង្កាត់ពោធិ៍តាហោ ក្រុងស្វាយរៀង នៅថ្ងៃទី៣ ខែតុលា ឆ្នាំ២០២០ នៅនឹងផ្ទះជនសង្ស័យតែម្តង ។ ជាមួយនឹងការចាប់ឃាត់ខ្លួននេះ សមត្ថកិច្ចដកហូតបានវត្ថុតាងគ្រឿងញៀន៦កញ្ចប់ និងទូរស័ព្ទដៃ១គ្រឿង ។ ជននេះធ្លាប់ជាប់ពន្ធនាគារ និងទើបតែចេញបាន១ខែមិនរាងចាលត្រូវចាប់ខ្លួនម្តងទៀត ។
ករណីទី២-នៅថ្ងៃទី៥ ខែតុលា ឆ្នាំ២០២០ វេលាម៉ោង១១ព្រឹក កម្លាំងនគរបាលការិយាល័យប្រឆាំងគ្រឿងញៀនខេត្ត ទទួលព័ត៌មានពីភ្នាក់ងាររាយការណ៍មកថា មានមុខសញ្ញាជួញដូរគ្រឿងញៀនចំនួន២នាក់ យកថ្នាំញៀនពីភ្នំពេញមកលក់ចែកចាយនៅខេត្តស្វាយរៀង ហើយ
កំពុងជិះម៉ូតូ១គ្រឿងមកដល់ស្រុកស្វាយជ្រំ ។
ក្រោយពីទទួលបានព័ត៌មាននេះ កម្លាំងការិយាល័យសហការជាមួយកម្លាំងនគរបាលក្រុងស្វាយរៀង និងកម្លាំងនគរបាលស្រុកស្វាយជ្រំ បានចេញពួនស្ទាក់លើផ្លូវជាតិលេខ១ត្រង់ចំណុចភូមិថ្ម.ស ឃុំតាសួស ស្រុកស្វាយជ្រំក៏ឃើញមុខសញ្ញាសង្ស័យទាំង២នាក់ជិះម៉ូតូមកដល់ ។ ពេលនោះ កម្លាំងសមត្ថកិច្ចបានឃាត់ម៉ូតូឱ្យឈប់និងឃាត់ខ្លួនមុខសញ្ញាទាំង២នាក់ ដែលម្នាក់ឈ្មោះ សុខ វី ភេទប្រុស អាយុ២៧ឆ្នាំ ជាកម្មកររោងចក្រ មានទីលំនៅក្នុងភូមិបាវិតកណ្តាល សង្កាត់បាវិត ក្រុងបាវិត និងម្នាក់ទៀតឈ្មោះ សំ ថាបូទី ភេទប្រុស អាយុ២៥ឆ្នាំ ជាកម្មកររោងចក្រដូចគ្នា មានទីលំនៅក្នុងភូមិបន្ទាយ ឃុំកណ្តៀងរាយ ស្រុកស្វាយទាប ។
ជាមួយនឹងការចាប់ឃាត់ខ្លួននេះ សមត្ថកិច្ចក៏បានដកហូតវត្ថុតាងមាន ម្សៅក្រាមពណ៌សសង្ស័យជាថ្នាំញៀនចំនួន១១កញ្ចប់(ធំ១កញ្ចប់)ម៉ូតូ១គ្រឿង និងទូរស័ព្ទ២គ្រឿង ហើយជនសង្ស័យត្រូវបាននាំមកកាន់ការិយាល័យជំនាញដើម្បីសាកសួរ ។
តាមចម្លើយសារភាពរបស់មុខសញ្ញាទាំង២នាក់ថា ខ្លួនទិញតពីស្ត្រីម្នាក់នៅរាជធានីភ្នំពេញទើបលោកឧត្តមសេនីយ៍ត្រី កែវ សុថា ស្នងការរងនគរបាលខេត្ត ទទូលផែនប្រឆាំងគ្រឿងញៀន និងក្រោមការសម្របសម្រូលនីតីវិធីពីសំណាក់ឯកឧត្តម ខាំ សុផារី ព្រះរាជអាជ្ញាអមសាលាដំបូងខេត្តស្វាយរៀង និងឯកឧត្តម សុខ កែវបណ្ឌិត ព្រះរាជអាជ្ញាអមសាលាដំបូងរាជធានីភ្នំពេញ និងកម្លាំងស្នងការដ្ឋាននគរបាលរាជធានីភ្នំពេញ បានពន្លាតសមត្ថកិច្ចដែនដីបន្តស្រាវជ្រាវនិងឃាត់ខ្លួនមុខសញ្ញាជួញដូរគ្រឿងញៀនម្នាក់់បន្ថែមទៀតឈ្មោះ ម៉ី ស៊ីណាហេង ភេទស្រី អាយុ៣២ឆ្នាំ មុខរបរមិនពិតប្រាកដ ស្នាក់នៅផ្ទះជួលក្នុងភូមិប៉ប្រកខាងជើង សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ ។
ជាមួយនឹងការចាប់ឃាត់ខ្លួននេះដែរ សមត្ថកិច្ចក៏ដកហូតសម្ភារវត្ថុតាងរួមមាន ម្សៅក្រាមពណ៌សថ្លាសង្ស័យជាថ្នាំញៀនចំនួន១៦កញ្ចប់(ធំ២កញ្ចប់) ជញ្ជីងថ្លឹងថ្នាំញៀន១ សម្ភារវេចខ្ចប់និងឧបករណ៍ប្រើប្រាស់គ្រឿងញៀនមួយចំនួនទៀត ។
ជាលទ្ធផល ឃាត់ខ្លួនជនសង្ស័យបាន៣នាក់(ស្រី១នាក់) ដកហូតវត្ថុតាងមានគ្រឿងញៀនប្រភេទមេតំហ្វេតាមីនចំនួន២៧កញ្ចប់(ធំ៣កញ្ចប់)ជញ្ជីងថ្លឹងថ្នាំញៀន១ ទូរស័ព្ទដៃ៣គ្រឿង រួមជាមួយឧបករណ៍ប្រើប្រាស់គ្រឿងញៀននិងសម្ភារវេចខ្ចប់មួយចំនួនទៀត ។
នៅថ្ងៃទី៧ ខែតុលា ឆ្នាំ២០២០ វេលាម៉ោង៨ព្រឹក សមត្ថកិច្ចបានកសាងសំណុំរឿងបញ្ជូនជនសង្ស័យរួមទាំងវត្ថុតាងទៅអយ្យការអមសាលាដំបូងខេត្ត ។
សរុបទាំង២ករណី ឃាត់ខ្លួន៤នាក់ ដកហូតគ្រឿងញៀនបាន៣៣កញ្ចប់(ធំ៣កញ្ចប់) ជញ្ជីងថ្លឹងគ្រឿងញៀន១ ទូរស័ព្ទដៃ៤គ្រឿង ម៉ូតូ១គ្រឿង ឧបករណ៍ជក់គ្រឿងញៀន និងសម្ភារវេចខ្ចប់គ្រឿងញៀនមួយចំនួនទៀត ៕
ចែករំលែកព័តមាននេះ