ញូវយ៉ក ៖ ជាថ្មីម្តងទៀត នៅថ្ងៃអង្គារទី៦ តុលានេះ ក្រុមហ៊ុនប្រព័ន្ធផ្សព្វផ្សាយសង្គមធំៗនៅលើពិភពលោក គឺហ្វេសប៊ុក Facebook និងធ្វីតទ័រ Twitter បានចាត់វិធានការលុបសារ របស់ប្រធានាធិបតីអាមេរិកលោក ដូណាល់ ត្រាំ ដែលបង្ហោះថា «កូវីដ-១៩ គឺដូចជាជំងឺផ្តាសាយ» ដែលក្រុមហ៊ុនទាំង២នេះ បង្ហាញថា ជាព័ត៌មានមិនត្រឹមត្រូវ ដែលរំលោភលើច្បាប់របស់ពួកគេ នេះបើយោងតាម CNA ។
អ្នកនាំពាក្យក្រុមហ៊ុនហ្វេសប៊ុក បានប្រាប់ទីភ្នាក់ងារសារព័ត៌មាន រ៉យទ័រ ថា “យើងដកចេញនូវមតិកាមិនត្រឹមត្រូវ ស្តីពី វីរុសកូវីដ-១៩” ។
ធ្វីតទ័រ ក៏បានបិទ សារ ស្រដៀងគ្នារបស់លោក ដូណាល់ ត្រាំ កាលពីថ្ងៃអង្គារ ហើយបានបន្ថែមស្លាកព្រមានមួយ ដែលនិយាយថា អ្នកបានបំពានច្បាប់របស់ក្រុមហ៊ុនស្តីពី “ការផ្សព្វផ្សាយព័ត៌មាន ដែលអាចបំភាន់ ទាក់ទងនឹងមេរោគកូវីដ-១៩” ។ ធ្វីតទ័រ បានប្រាប់ រ៉យទ័រ ថា បច្ចុប្បន្ន ក្រុមហ៊ុនកំពុងព្យាយាមឆ្លើយតបឲ្យបានលឿន និងរហ័ស ។
នេះមិនមែនជាលើកទីមួយទេ ដែលហ្វេសប៊ុក និងធ្វីតទ័រ បានលុបសាររបស់ប្រធានាធិបតីអាមេរិក ដូណាល់ ត្រាំ លើបណ្ដាញសង្គមរបស់ពួកគេ កន្លងមក ក្រុមហ៊ុនយក្សទាំង២នេះ ធ្លាប់បានលុបចោលការប្រកាសរបស់លោក ត្រាំ សម្រាប់ព័ត៌មានមិនត្រឹមត្រូវ នៃវីរុសកូវីដ-១៩ ជាលើកដំបូង នៅខែសីហា រួមទាំងវីដេអូមួយ ដែលប្រធានាធិបតី បានអះអាងដោយមិនពិតថា កុមារទាំងអស់ស្ទើរតែមានប្រព័ន្ធភាពស៊ាំទៅនឹងកូវីដ-១៩ ៕
ចែករំលែកព័តមាននេះ