ខេត្តកំពង់ធំ ៖ ក្រោយពីមានអ្នកនេសាទបានក្រពើជាញឹកញាប់ធ្វើឲ្យពលរដ្ឋមានការព្រួយបារម្ភពីសុវត្ថិភាពផ្ទាល់ខ្លួន និងកូនចៅ ។ ប្រភពបានឲ្យដឹងថា បឹងភេ គឺជាបឹងធម្មជាតិមួយដែលមានអាយុកាលរាប់រយឆ្នាំមកហើយ ដែលមានទីតាំងនៅស្របតាមបណ្តោយផ្លូវជាតិលេខ៦ ស្ថិតក្នុងភូមិកំពង់ក្របៅ…
ខេត្តកំពង់ធំ ៖ ក្រោយពីមានអ្នកនេសាទបានក្រពើជាញឹកញាប់ធ្វើឲ្យពលរដ្ឋមានការព្រួយបារម្ភពីសុវត្ថិភាពផ្ទាល់ខ្លួន និងកូនចៅ ។ ប្រភពបានឲ្យដឹងថា បឹងភេ គឺជាបឹងធម្មជាតិមួយដែលមានអាយុកាលរាប់រយឆ្នាំមកហើយ ដែលមានទីតាំងនៅស្របតាមបណ្តោយផ្លូវជាតិលេខ៦ ស្ថិតក្នុងភូមិកំពង់ក្របៅ សង្កាត់កំពង់ក្របៅ ក្រុងស្ទឹងសែន ខេត្តកំពង់ធំ។
បឹងធម្មជាតិមួយនេះបានផ្តល់នូវអត្ថប្រយោជន៍ដ៏មានសារៈសំខាន់ដល់បងប្អូនប្រជាពលរដ្ឋមួយចំនួននៅក្នុងក្រុងស្ទឹងសែន ដែលមានជីវភាពមិនសូវធូរធារនោះ គឺបឹងនេះផ្តល់ទឹក ផ្តល់ត្រី ផ្តល់ស្មៅដល់សត្វគោក្របី ហើយពួកលោកតែងតែនាំគ្នាទៅប្រកបមុករបរដូចជា ដាក់លប ដាក់មង ចងសន្ទូច បេះផ្កាឈូក ស្លឹកឈូក ផ្លែឈូក នឹងដកព្រលឹតរំចង់លក់ជាដើម…ល ដើម្បីដោះស្រាយជីវភាពគ្រួសារ ។
ប្រភពបានឲ្យដឹងទៀតថា កាលដើមឡើយបឹងភេមានទំហំធំធេង ដែលមានផ្ទៃបឹងទំហំមិនក្រោម៥០ហិចតានោះទេ លុះក្រោយៗមករហូតមកដល់បច្ចុប្បន្ននេះ ដោយសារតែមានឃុបឃិតគ្នាជាចង្កោមរវាងប្រជាពលរដ្ឋមួយចំនួនតូចជាមួយ និងអាជ្ញាធរពាក់ព័ន្ធបាននាំគ្នារំលោភយកផ្ទៃបឹងធម្មជាតិខាងលើនេះធ្វើជាកម្មសិទ្ធផ្ទាល់ខ្លួនរាងៗខ្លួន ដែលជាហេតុធ្វើឲ្យផ្ទៃបឹងទាំងមូលមានការរួមតូច ។
ពាក់ព័ន្ធនឹងបឹងភេខាងលើនេះ លោក ចាន់ ប៊ុន ចៅសង្កាត់កំពង់ក្របៅ ប្រាប់ថា ផ្ទៃបឹងភេបច្ចុប្បន្ននេះមានទំហំស្មើនឹង២៩ហិតា ត្រូវបានរាជរដ្ឋាភិបាលចេញ ស.ជ.ណ ប្រគល់ឲ្យក្រុមហ៊ុនមួយនៅភ្នំពេញធ្វើការអភិវឌ្ឍ តែរហូតមកដល់ពេលនេះ លោកក៏មិនបានដឹងថាយ៉ាងណាទៅវិញនោះដែរ រឿងបឹងភេនេះ ។
ចំណែកករណីថា បឹងភេសម្បូរទៅដោយសត្វក្រពើខាងលើនេះក៏មានបងប្អូនប្រជាពលរដ្ឋមួយចំនួន ពួកលោកនិយាយថា យូរៗម្តងនៅរដូវវស្សា ពួកគាត់ធ្លាប់ឃើញក្រពើធំៗផុសបង្ហាញខ្លួននៅក្នុងទឹកបឹងខាងក្រោយផ្ទះរបស់ពួកគាត់ តែពួកលោកមិនដែលឃើញសត្វក្រពើទាំងនោះបង្កគ្រោះថ្នាក់ដល់មនុស្សម្តងណានោះឡើយ ។
ជុំវិញបញ្ហាថា បឹងភេសម្បូរសត្វក្រពើខាងលើនេះ លោក ឆាយ រក្សា ជាប្រជាពលរដ្ឋម្នាក់រស់នៅក្នុងភូមិកំពង់ក្របៅ សង្កាត់កំពង់ក្របៅប្រាប់ថា បឹងភេ គឺជាបឹងធម្មជាតិពិតមែន ហើយក៏ជាបឹងដែលសម្បូរទៅដោយសត្វក្រពើរស់នៅផងដែរ ។
ជាក់ស្តែង កាលពីថ្ងៃទី០៥ ខែតុលា ឆ្នាំ២០២០ លោកបានដាក់លបនៅជាយមាត់បឹងភេខាងក្រោយផ្ទះរបស់លោក បានកូនក្រពើមួយក្បាលទម្ងន់ប្រហែលជា១គីឡូក្រាម លុះដល់ព្រឹកថ្ងៃទី០៧ ខែតុលា លោកដាក់លបបានក្រពើមួយក្បាលទៀត ទម្ងន់ប្រហែលជា៣គីឡូ នេះសបញ្ជាក់ថា បឹងភេខាងលើនេះពិតជាមានសត្វក្រពើរស់នៅពិប្រាកដមែន ។
ចំណែកលោក ហម ហ៊ុន នាយខ័ណជលផលកំពង់ធំបានឲ្យកោះសន្តិភាពដឹងតាមទូរស័ព្ទនៅព្រឹកថ្ងៃទី០៧ ខែតុលានេះថា បឹងភេដែលជាបឹងធម្មជាតិខាងលើនេះ ពិតជាមានសត្វក្រពើធម្មជាតិរស់នៅពិប្រាកដមែន មិនមែនជាសត្វក្រពើដែលគេចិញ្ចឹមនៅក្នុងអាងក្បែរទីនោះរួចនោះទេ ពីព្រោះតាមការពិនិត្យមើលអាក្រពើដែលពលរដ្ឋចិញ្ចឹមជាប់ទីតាំងបឹងភេនោះ គេធ្វើអាងខ្ពស់ហើយរឹងមាំណាស់ ក្រពើមិនអាចចេញបានឡើយ ។
ដំណឹងនេះក៏ជាការជូនដំណឹងដល់បងប្អូនប្រជាពលរដ្ឋដែលរស់នៅក្បែរបឹងភេ សូមមានការប្រុងប្រយ័ត្ន ដើម្បីសុវត្ថិភាពកូនចៅរបស់ខ្លួន ដូចពាក្យចាស់លោកពោលថា កុំទុកចិត្តក្រពើណា ៕
ចែករំលែកព័តមាននេះ