ខេត្តស្ទឹងត្រែង ៖ កន្លងមកថ្មីៗនេះ កម្លាំងកងរាជអាវុធហត្ថប្រចាំនៅតំបន់វារីអគ្គិសនីសេសានក្រោមពីរ បានចុះបង្ក្រាបអ្នកនេសាទ ដែលចូលទៅនេសាទនៅតំបន់ហាមឃាត់ (ជិតទូប៊ិនភ្លើង) ក្រោមទំនប់វ៉ារីអគ្គិសនីសេសានក្រោមពីរចំនួន៦ទូកប្រគល់ទៅឱ្យផ្នែកជំនាញជលផលធ្វើការអប់រំបន្ថែម ។ លោក…
ខេត្តស្ទឹងត្រែង ៖ កន្លងមកថ្មីៗនេះ កម្លាំងកងរាជអាវុធហត្ថប្រចាំនៅតំបន់វារីអគ្គិសនីសេសានក្រោមពីរ បានចុះបង្ក្រាបអ្នកនេសាទ ដែលចូលទៅនេសាទនៅតំបន់ហាមឃាត់ (ជិតទូប៊ិនភ្លើង) ក្រោមទំនប់វ៉ារីអគ្គិសនីសេសានក្រោមពីរចំនួន៦ទូកប្រគល់ទៅឱ្យផ្នែកជំនាញជលផលធ្វើការអប់រំបន្ថែម ។
លោក វង្ស សាវឿន នាយរងខណ្ឌជលផលខេត្តស្ទឹងត្រែង បានបញ្ជាក់នៅថ្ងៃទី៦ តុលានេះថា បន្ទាប់កម្លាំងកងរាជអាវុធហត្ថបានប្រគល់អ្នកនេសាទ និងឧបករណ៍មក ក្រុមការងារខណ្ឌរដ្ឋបាលជលផលតម្រូវឱ្យប្រជាអ្នកនេសាទទាំង៦គ្រួសារធ្វើកិច្ចសន្យាបញ្ឈប់ការលួចចូលទៅនេសាទក្រោមតំបន់ទំបន់វ៉ារីនេះទៀត ព្រោះវាជាតំបន់ហាមឃាត់ ។
លោកបានបន្តថា តំបន់នេះប្រឈមនឹងបញ្ហាគ្រោះថ្នាក់ព្រោះទឹកមានលំហូរខ្លាំង ដូច្នេះចូរបងប្អូនស្តាប់តាមការណែនាំ ដើម្បីការពារអាយុជីវិតទាំងអស់គ្នា ចៀសផុតពីការរងគ្រោះដល់អាយុជីវិតដោយសារការលិចទូក ព្រោះកន្លងមកធ្លាប់មានអ្នកនេសាទចំនួន២នាក់បានបាត់បង់ជីវិតរួចទៅហើយ។
សូមបញ្ជាក់ថា ជាមួយនឹងការធ្វើកិច្ចសន្យា មន្ត្រីជំនាញក៍បានដកហូតសម្ភារៈមួយចំនួនដូចជាទូកម៉ាស៊ីនចំនួន៦គ្រឿង (ទូកឈើ៥គ្រឿង និងទូកស្មាច់១គ្រឿង) មងដាក់ចំនួន៣ក្បាលប្រវែង៥០០ម៉ែត្រ ស្បៃមុងសម្រាប់អូសយកកូនត្រីចំនួន៣ដុំប្រវែង១០ម៉ែត្រ និងមនុស្សចំនួន១៨នាក់ ស្ត្រី៧នាក់ ណែនាំឱ្យត្រឡប់ទៅមូលដ្ឋានវិញ៕ (កែសម្រួលដោយ ៖ ធីតា)
ចែករំលែកព័តមាននេះ