រាជធានីភ្នំពេញ ៖ បុគ្គលិកក្រុមហ៊ុន ស៊ីន ទ្រី នឹងចូលធ្វើការប្រមូលសំរាមឡើងវិញ នៅរសៀលថ្ងៃទី០៧ ខែតុលា ឆ្នាំ២០២០នេះ ក្រោយពួកគេទទួលបានដំណោះស្រាយពីសាលារាជធានីភ្នំពេញ…
រាជធានីភ្នំពេញ ៖ បុគ្គលិកក្រុមហ៊ុន ស៊ីន ទ្រី នឹងចូលធ្វើការប្រមូលសំរាមឡើងវិញ នៅរសៀលថ្ងៃទី០៧ ខែតុលា ឆ្នាំ២០២០នេះ ក្រោយពួកគេទទួលបានដំណោះស្រាយពីសាលារាជធានីភ្នំពេញ ។
បើយោងតាមកំណត់ហេតុ ជាលទ្ធផល នៃការចរចារភាគីទាំងអស់បានព្រមព្រៀងគ្នាដូចខាងក្រោម ៖
ទី១ ៖ ចំពោះសំណើរបស់កម្មករនិយោជិតទាមទារឲ្យក្រុមហ៊ុនដោះស្រាយពេលបញ្ចប់កិច្ចសន្យា ក្រុមហ៊ុនទទួលដោះស្រាយតាមច្បាប់ស្ដីពីការងារ ហើយរដ្ឋបាលរាជធានីភ្នំពេញ ជាអ្នកធានាខុសត្រូវ
ទី២ ៖ ចំពោះការងាររបស់កម្មករនិយោជិត ទៅថ្ងៃខាងមុខ រដ្ឋបាលរាជធានីភ្នំពេញ ធានាមិនបាត់បង់ឡើយ ទោះបីក្រុមហ៊ុនស៉ិនទ្រី ដេញថ្លៃជាប់ ឬមិនជាប់ក៏ដោយ
ទី៣ ៖ សូមឲ្យកម្មករនិយោជិតទាំងអស់នាំគ្នាចូលធ្វើការងារជាធម្មតាវិញ ចាប់ពីរសៀលថ្ងៃទី០៧ ខែតុលា ឆ្នាំ២០២០នេះតទៅ ។
សូមជម្រាបថា អ្នកភ្នំពេញកំពុងរំខានដោយសំរាម ដោយសារកម្មករប្រមូលសំរាម ក្រុមហ៊ុន ស៊ីនទ្រី បាននាំគ្នាធ្វើកូដកម្ម ទាមទារឲ្យអាជ្ញាធរចូលរួមដោះស្រាយ ចំពោះលក្ខខណ្ឌដែលពួកគេបានទាមទារ ចាប់តាំងពីថ្ងៃទី០២ ខែតុលា ឆ្នាំ២០២០ ធ្វើឲ្យគំនរសំរាមបានបង្កការរំខានដល់ប្រជាពលរដ្ឋ និងសោភ័ណភាពទីក្រុង ជាក់ស្តែងនៅមុខផ្ទះប្រជាពលរដ្ឋ នៅតាមចិញ្ចើមផ្លូវសំរាមបានគរពោលពាស និងមានក្លិនមិនល្អទៀត ។ នៅម្តុំទួលគោក ដែលជាតំបន់មានភាពសកម្មភាពសេដ្ឋកិច្ច នៅជាប់ចិញ្ចើមផ្លូវជាច្រើនគេឃើញមានគំនរសំរាមធំៗ ។ ពលរដ្ឋនៅទីនោះឲ្យដឹងថា រយៈពេល៥ថ្ងៃហើយគេពុំឃើញមានក្រុមហ៊ុនប្រមូលសំរាម មកយកសំរាមដូចរៀងរាល់ពេលនោះឡើយ ៕
ចែករំលែកព័តមាននេះ