ប្រទេសកូរ៉េ ៖ អ្នកនាង ស្រួង ភាវី ជាកីឡាការិនីស្នូកឃ័រកូរ៉េ ដែលមានដើមកំណើតមកពីកម្ពុជា។ ឆ្នាំនេះអ្នកនាងមានអាយុ៣០ឆ្នាំ អ្នកនាងមានស្រុកកំណើតនៅភូមិជនបទមួយ ក្នុងខេត្តត្បូងឃ្មុំ…
ប្រទេសកូរ៉េ ៖ អ្នកនាង ស្រួង ភាវី ជាកីឡាការិនីស្នូកឃ័រកូរ៉េ ដែលមានដើមកំណើតមកពីកម្ពុជា។ ឆ្នាំនេះអ្នកនាងមានអាយុ៣០ឆ្នាំ អ្នកនាងមានស្រុកកំណើតនៅភូមិជនបទមួយ ក្នុងខេត្តត្បូងឃ្មុំ ហើយប្រហែលជាជាង១០ឆ្នាំមុនអ្នកនាងបានមកប្រទេសកូរ៉េ ដើម្បីរៀបអាពាហ៍ពិពាហ៍ជាមួយនឹងស្វាមី ដែលមានទីលំនៅនៅទីក្រុងឆងជូនៃខេត្តឈុងឆងប៊ុគដូ។
ក្រោយពីបានស្វែងរកឃើញភាពប៉ិនប្រសព្វ ក្នុងវិស័យកីឡានេះ ក្នុងកំឡុងពេលអ្នកនាងនិង ស្វាមីបានទៅកម្សាន្តនៅទីតាំងលេងកីឡាស្នូកឃ័រមួយកន្លែង និងក្រោយពីបានចាប់ផ្តើមធ្វើការហ្វឹកហាត់ក្នុងកំឡុងរយៈពេល២ឆ្នាំនោះ នៅឆ្នាំ២០១៣អ្នកនាងទទួលបានជ័យលាភីលេខ២ ក្នុងការប្រកួតសម្រាប់ កីឡាករថ្មីក្នុងប្រទេស។ នៅខែមិថុនា ឆ្នាំ២០១៨ អ្នកនាងទទួលបានមេដាយសំរឹទ្ធក្នុងកម្មវិធី 3 cushion championship កម្រិតពិភពលោក សម្រាប់នារី នៅប្រទេសតួគី ។ ជាងនេះទៅទៀត នៅខែតុលាឆ្នាំ២០១៩ អ្នកនាងទទួលបានមេដាយសំរឹទ្ធក្នុងកម្មវិធី 3 cushion championship កម្រិតពិភពលោក សម្រាប់នារីនៅប្រទេសអេស្ប៉ាញផងដែរ ។
ថ្មីៗនេះកីឡាការិនី ស្រួង ភាវី បានផ្តល់បទសម្ភាសន៍ជាមួយសារព័ត៌មានរៀបរាប់អំពីប្រវត្តិជោគជ័យរបស់ខ្លួនក្រោយទៅរស់នៅប្រទេសកូរ៉េខាងត្បូង ដោយក្នុងនោះអ្នកនាងបានបង្ហាញការយល់ឃើញថាការអប់រំគឺជាកត្តាសំខាន់ជាងគេដើម្បីអភិវឌ្ឍប្រទេសកម្ពុជា ហើយបច្ចុប្បន្នអ្នកនាងបានធ្វើការបរិច្ចាក និងសកម្មភាពសប្បុរសជាច្រើននៅក្នុងប្រទេសកំណើតរបស់ខ្លួនផងដែរ។
កីឡាការិនី ស្រួង ភាវី ដែលមានសម្បុរស ស្រស់ស្អាត មានស្រុកកំណើតនៅភូមិថ្មពេជ្រ៣ ឃុំថ្មពេជ្រ ស្រុកត្បូងឃ្មុំ ខេត្តត្បូងឃ្មុំ បានប្រាប់ពីមូលហេតុនៃការចាកចេញពីកម្ពុជាទៅរស់នៅប្រទេសកូរ៉ខាងត្បូងថា «ដោយសារជីវភាពជាកសិករមិនសូវធូរធារ ទើបនាងខ្ញុំសម្រេចចិត្តរៀបការនៅអាយុ១៩ឆ្នាំ ជាមួយស្វាមីជនជាតិកូរ៉េខាងត្បូង ដោយសង្ឃឹមថានឹងជួយយិតយោងគ្រួសារបានល្អជាងមុន ។ តែក្រោយពីបានមកដល់កូរ៉េ និងបានចូលប្រឡូកក្នុងវិស័យកីឡាស្នូកឃ័រ ការរស់នៅរបស់នាងខ្ញុំបាន ប្រែប្រួលទាំងស្រុង ហើយបច្ចុប្បន្ននេះ នាងខ្ញុំកំពុងធ្វើការប្រឡូកក្នុងវិស័យនេះក្នុងនាមជាកីឡាការិនីអាជីព» ។
ជាមួយគ្នានោះផងដែរ នៅពេលសាកសួរថាតើអ្នកនាងមានអារម្មណ៍យ៉ាងណាដែរពេល ដែលទទួលបានជ័យលាភីកីឡាការីមេដាយសំរឹទ្ធក្នុងការប្រកួតស្នូកឃ័រលំដាប់ពិភពលោក នៅទីក្រុងវ៉ា ឡេនសៀ ប្រទេសអេស្ប៉ាញកន្លងមកនោះ កីឡាការនី ស្រួង ភាវី បានពោលឲ្យដឹងថា «ការទទួលបានជ័យជម្នះនៅអេស្ប៉ាញនោះ គឺជួយឲ្យគេបានស្គាល់កម្ពុជាយើងកាន់តែច្រើនឡើងលើឆាកអន្តរជាតិ ខ្ញុំរំភើបរីករាយដោយខ្ញុំបានធ្វើរឿងល្អសម្រាប់កម្ពុជា» ។
ភាពជោគជ័យរបស់កីឡាការនី ស្រួង ភាវី គឺមិនមែនជារឿងដាច់ដោយឡែកផ្ទាល់ខ្លួនរបស់នាងនោះទេ ព្រោះតែមានដើមកំណើតជាកូនខ្មែរមួយរូប នាងត្រូវបានមហាជនកម្ពុជាចាត់ទុកជានិម្មិតរូបនៃមិត្តភាពរវាងកម្ពុជានិងកូរ៉េផងដែរ ព្រោះភាពជោគជ័យរបស់នាងគឺជាភាពជោគជ័យនិងមុខមាត់របស់ប្រទេសកម្ពុជាលើឆាកអន្តរជាតិ ។
ឆ្លើយតបនឹងសំណួរចោទសួរថា តើអ្នកនាងមានចំណាប់អារម្មណ៍យ៉ាងណាដែរ ពេលបានក្លាយ ជានិមិត្តរូបនៃមិត្តភាពរវាងកម្ពុជានិងកូរ៉េ ក៏ដូចជាត្រូវបានអញ្ជើញចូលរួមក្នុងកម្មវិធីវេទិការធុរកិច្ចជាដើម ក្នុងកំឡុងពេលទស្សនកិច្ចផ្លូវរដ្ឋនៅកម្ពុជារបស់ឯកឧត្តមប្រធានាធិបតីសាធារណរដ្ឋកូរ៉េ មូន ចេអ៊ីន កាលពីខែមីនា ឆ្នាំ២០១៩ នោះ កីឡាការិនី ស្រួង ភាវី បានពោលទាំងមោទនភាពថា «នាងខ្ញុំពិតជាមានកិត្តិយសយ៉ាងខ្លាំងដែលត្រូវបានទទួលការអញ្ជើញឲ្យចូលរូមក្នុងកម្មវិធីដែលមានការចូលរួមពីសំណាក់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា និងប្រធានាធិបតីកូរ៉េខាងត្បូងឯកឧត្តម មូន ចេអ៊ីន។
ខ្ញុំយល់ថាទាំងនេះក៏ដោយសារតែប្រជាជនកូរ៉េ ស្រលាញ់និងគាំទ្ររូបនាងខ្ញុំ ហើយខ្ញុំក៏នឹងខិតខំប្រឹងប្រែងបន្ថែមទៀតក្នុងការជួយភ្ជាប់ចំណងទំនាក់ទំនងរវាងប្រទេសទាំង២បន្ថែមទៀត។ សម្រាប់រូបនាងខ្ញុំផ្ទាល់ នាងខ្ញុំបានខិតខំប្រឹងប្រែងសិក្សាភាសាកូរ៉េ ហើយរាល់ពេលបានឱកាសនាងខ្ញុំតែងបានណែនាំពីវប្បធម៌កម្ពុជាជូនប្រជាជនកូរ៉េ។ មិនត្រឹមតែប៉ុណ្ណោះ នាងខ្ញុំក៏តែង តែបន្តការហ្វឹកហាត់កីឡាស្នូកឃ័រជាប់ជានិច្ចផងដែរ»។
នៅពេលសាកសួរថាតើអ្នកនាងមានពាក្យពេជន៍អ្វីខ្លះសម្រាប់ផ្តាំផ្ញើទៅកាន់យុវជនយុវតី ដើម្បីទទួលបានជោគជ័យ និងសំរេចក្តីសុបិនរបស់ខ្លួនដូចរូបអ្នកនាង ? កីឡាការិនី ស្រួង ភាវី បានលើកឡើងថា «យុវជនយុវតី ជាទំពាំងស្នងឫស្សី មានតួនាទីយ៉ាងសំខាន់ ក្នុងកិច្ចការសង្គម ដូច្នេះពេលទំនេរ គួរឆ្លៀតចូលរួមលេងកីឡាទៅតាមចំណូលចិត្តរបស់ខ្លួនដើម្បីឲ្យមានសុខភាពល្អ ។
ហើយនាងខ្ញុំសូមសំណូមពរដល់ប្អូនៗ យុវជន យុវតីកម្ពុជាយើង ទំនេរពីការរៀនសូត្រនៅសាលា ត្រូវជៀសវាង គ្រឿងញៀន គ្រឿងស្រវឹង ល្បែងស៊ីសងពិសេសសេពគប់បាបមិត្ត ដែលនាំយើងទៅរកផ្លូវមិនល្អ នាំឱ្យខូចអនាគតខ្លួន។ សំខាន់ជាងនេះទៅទៀត គឺគួរទម្លាប់ឆ្លៀតពេលអានសៀវភៅឱ្យបានច្រើនជារឿយៗ ព្រោះសៀវភៅគឺជាឃ្លាំងគំនិតជាសេចក្តីពិតជាផ្លូវនាំយើងឆ្ពោះទៅរកក្តីសុខសាន្តស្ងប់ក្នុងចិត្តចេះបត់បែនស្របតាមកាលៈទេសៈ»៕
ចែករំលែកព័តមាននេះ