រាជធានីភ្នំពេញ ៖ មេឃភ្លៀងទឹកលិចជង្ហុកតាមផ្លូវ លុះមើលអត់ឃើញ ស្រាប់តែរថយន្តមួយគ្រឿងដឹកកញ្ចក់បើកធ្លាក់ជង្ហុកនោះ បណ្តាលឱ្យក្រឡាប់ផ្ងារជើងឡើងលើ តែមិនមានមនុស្សណាម្នាក់រងគ្រោះថ្នាក់នោះទេ ។
ហេតុការណ៍ខាងលើនេះបង្កឲ្យមានការភ្ញាក់ផ្អើលកាលពីវេលាម៉ោង៧យប់ថ្ងៃទី៦ ខែតុលា ឆ្នាំ២០២០ នៅតាមបណ្តាញផ្លូវបេតុង ភូមិព្រៃបឹង ទល់មុខវត្តកំបូល សង្កាត់កន្ទោក ខណ្ឌកំបូល រាជធានីភ្នំពេញ ។
រថយន្តមួយគ្រឿងជួបគ្រោះថ្នាក់ខាងលើម៉ាកហ៊ីយាន់ដាយ ពណ៌ស ពាក់ស្លាកលេខ ភ្នំពេញ 3B-8184 អ្នកបើកបរមិនស្គាល់អត្តសញ្ញាណ ។
តាមប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុ រថយន្តដឹកកញ្ចក់មួយគ្រឿងខាងលើបើកបរក្នុងទិសដៅពីត្បូងទៅជើងក្នុងល្បឿនតិចៗ លុះមកដល់ចំណុចកើតហេតុ ដោយសារផ្លូវលិចទឹកមើលមិនឃើញជង្ហុក ស្រាប់តែធ្លាក់ជង្ហុកបណ្តាលឱ្យក្រឡាប់ផ្ងារជើងឡើងលើ និងរងការខូចខាតសំភារៈអស់ជាច្រើនដូចជាកញ្ចក់ត្រូវបែកខ្ទេចអស់ ចំណែករថយន្តវិញរងការខូចខាតខូចទ្រង់ទ្រាយ រីឯអ្នកបើកបរវិញមិនមានរងរបួសឡើយ។
ភ្លាមៗនោះក៏មានកំលាំងសមត្ថកិច្ចនគរបាលប៉ុស្តិ៍កន្ទោកបានចុះមកអន្តរាគមន៍ភ្លាមៗដោយបញ្ជៀសចរាចរណ៍ដើម្បីកុំអោយមានគ្រោះថ្នាក់កើតឡើងជាបន្តទៀត។
ក្រោយពេលកើតហេតុ ដោយសាររថយន្តក្រឡាប់មិនមានប៉ះពាល់ដល់ប្រជាពលរដ្ឋដែលជាអ្នកដំណើរ ទើបសមត្ថកិច្ចឲ្យម្ចាស់ស្ទូចរថយន្តខាងលើយកទៅធ្វើការជួសជុលខ្លួនឯង៕ (កែសម្រួលដោយ ៖ ធីតា)
ចែករំលែកព័តមាននេះ