ប្រទេសអាស៊ែបៃហ្សង់និងអាមេនី ៖ ប្រទេសបារាំង រុស្ស៊ី និងសហរដ្ឋអាមេរិកជាសហប្រធាននៃក្រុមប្រទេសហៅក្រុមមីនស្ក៍ កាលពីថ្ងៃទី៥តុលា បានបរិហារចំពោះការប្រយុទ្ធគ្នា នៅតំបន់បំបែកខ្លួនណាហ្គ័រនីការ៉ាបាក់ ដែលពេលនេះហាក់សំដៅជាពិសេស លើបណ្ដាជនស៊ីវិលថា ជាការគំរាមកំហែងមួយមិនអាចទទួលយកបាន សម្រាប់ស្ថេរភាពរបស់តំបន់។
ក្នុងសេចក្ដីប្រកាសមួយ រដ្ឋមន្ត្រីការបរទេស របស់ប្រទេសទាំង៣គូសបញ្ជាក់ដោយភាសាខ្លាំងៗថា ការវាយប្រហារទាំងឡាយនាពេលថ្មីៗនេះ ដែលសំដៅលើបណ្ដាទីតាំងស៊ីវិល ទាំងក្នុងតំបន់មានជម្លោះ ទាំងនៅកន្លែងផ្សេងៗទៀតនៃប្រទេសអាមេនីនិងអាស៊ែបៃហ្សង់ ព្រមទាំងលក្ខណៈមិនសមស្រប នៃការវាយប្រហារទាំងនោះ គឹជាការគំរាមកំហែងមួយមិនអាចទទួលយកបានសម្រាប់ស្ថេរភាពតំបន់។
រដ្ឋមន្ត្រីការបរទេសទាំង៣រូប លោកJEAN YVES LE DRIAN លោក MIKE POMPEO និងលោកស័រហ្គេយឡាវរ៉ូវ បានថោ្កលទោសយ៉ាងម៉ឺងម៉ាត់បំផុត ចំពោះការកើនឡើងនៃអំពើហិង្សាដែលកើតមាននៅខាងក្រៅតំបន់មានជម្លោះ។ លោកទាំង៣អំពាវនាវជាថ្មីឲ្យមានបទឈប់បាញ់គ្នាជាបន្ទាន់ និងដោយគ្មានលក្ខខណ្ឌ និងស្នើដល់ក្រុងបាគូនិងក្រុងអ៊ីរីវ៉ានឲ្យសន្យា ចាប់ពីពេលនេះទៅឲ្យ ចាប់ផ្ដើមឡើងវិញដំណើរការនៃការដោះស្រាយជម្លោះ ដោយផ្អែកលើបណ្ដាគោលការណ៍ ដែលអាចអនុវត្តទៅបាននិងផ្អែកលើច្បាប់អន្តរជាតិ។
កងកម្លាំងបំបែកខ្លួននិយមជនជាតិអាមេនីគាំទ្រដោយក្រុងអេរីវ៉ាន និងកងទ័ពអាស៊ែបៃហ្សង់ បានបន្តការប្រយុទ្ធគ្នាមិនព្រមផ្អាកដោយកំណត់ជាពិសេស តាមរយៈការបាញ់ផ្លោងនិងការទម្លាក់គ្រាប់បែក លើបណ្ដាតំបន់ទីក្រុងដែលនាំឲ្យមានការបារម្ភចំពោះជនរងគ្រោះជាជនស៊ីវិលកាន់តែច្រើន។ មានការបាញ់គ្រាប់រ៉ុក្កែតយ៉ាងខ្លាំងក្លាសំដៅរដ្ឋធានីរបស់ពួកបំបែកខ្លួន ដែលជាទីក្រុងមានប្រជាជនប្រមាណជា៥០.០០០នាក់។
មុននេះអាស៊ែបៃហ្សង់រាយការណ៍៍ ពីការវាយប្រហារបណ្ដាតំបន់ជនស៊ីវិល ពីសំណាក់កងទ័ពអាមេនី ពិសេសការវាយប្រហារដោយគ្រាប់រ៉ុក្កែត លើទីក្រុងGANDJA ជាទីក្រុងធំទី២របស់ប្រទេសស្ថិតនៅចម្ងាយ ៦០គីឡូម៉ែត្រពីខ្សែរណសិរ្សឬទីក្រុងBEYLAGAN ។ ជនស៊ីវិលអាមេនី១៩នាក់និងជនស៊ីវិលអាស៊ែបៃហ្សង់៤៤នាក់បានត្រូវស្លាប់។ តុល្យការយោធាខាងអាស៊ែបៃហ្សង់ថាពុំមានបាត់បង់ទាហានណាម្នាកឡើយ តែខាងពួកបំបែកខ្លួនថាទាហានរបស់ខ្លួន ដល់ទៅ២១៩នាក់បានត្រូវស្លាប់៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ