រាជធានីភ្នំពេញ ៖ ធ្លាប់តែដឹងពីការត្រៀមខ្លួនរបស់កីឡាករដែលមានកាយសម្បទាពេញលេញ បង្ហាញពីការចាប់អារម្មណ៍ចំពោះព្រឹត្តិការណ៍ស៊ីហ្គេមឆ្នាំ២០២៣ ។ ពេលនេះ យើងងាកមកដឹងពីការត្រៀមខ្លួនរបស់កីឡាករកីឡាការិនីជាជនពិការវិញម្ដង ថាតើពួកគាត់ បង្ហាញពីការចាប់អារម្មណ៍ចំពោះព្រឹត្តិការណ៍់ស៊ីហ្គេមឆ្នាំ២០២៣ កម្រិតណា…
រាជធានីភ្នំពេញ ៖ ធ្លាប់តែដឹងពីការត្រៀមខ្លួនរបស់កីឡាករដែលមានកាយសម្បទាពេញលេញ បង្ហាញពីការចាប់អារម្មណ៍ចំពោះព្រឹត្តិការណ៍ស៊ីហ្គេមឆ្នាំ២០២៣ ។ ពេលនេះ យើងងាកមកដឹងពីការត្រៀមខ្លួនរបស់កីឡាករកីឡាការិនីជាជនពិការវិញម្ដង ថាតើពួកគាត់ បង្ហាញពីការចាប់អារម្មណ៍ចំពោះព្រឹត្តិការណ៍់ស៊ីហ្គេមឆ្នាំ២០២៣ កម្រិតណា ខណៈពេលនេះ ក្រុមកីឡាជាជនពិការទាំងនេះ ក៏ប្រកាសស្វាគមន៍កីឡាអាស៊ានប៉ារ៉ាហ្គេម លើកទី១១ នៅប្រទេសវៀតណាម ដែលនឹងធ្វើនៅខែធ្នូ ឆ្នាំ២០២១ផងដែរ។
ថ្លែងក្រោយបញ្ចប់ការប្រកួតជើងឯកបាល់ទះអង្គុយជនពិការ ឆ្នាំ២០២០ កាលពីពេលថ្មីៗលោក យី វាសនា អគ្គលេខាធិការគណៈកម្មាធិការជាតិប៉ារ៉ាឡាំពិកកម្ពុជាមានប្រសាសន៍ថា ប្រភេទកីឡាជនពិការកម្ពុជា រង់ចាំការបើកបញ្ជីទទួលចុះឈ្មោះរបស់ម្ចាស់ផ្ទះ វៀតណាម នាខែធ្នូ ឆ្នាំ២០២០ សម្រាប់ព្រឹត្តិការណ៍កីឡា អាស៊ានប៉ារ៉ាហ្គេម លើកទី១១ នាឆ្នាំ២០២១ ជាជំហានដំបូងសិន ដើម្បីដឹងថា តើប្រភេទកីឡាណាខ្លះត្រូវទៅប្រកួត ដើម្បីរៀបចំឈ្មោះបញ្ជូនចេញផង ។
បន្ទាប់មកទើបឈានដល់ការកំណត់លើប្រភេទកីឡាដែលត្រូវចេញប្រកួតនៅស៊ីហ្គេមដែលកម្ពុជាធ្វើជាម្ចាស់ផ្ទះ ខណៈដែលការងារមួយនេះ គឺប៉ារ៉ាឡាំពិកកម្ពុជា យកចិត្តទុកដាក់យ៉ាងខ្លាំងមកទល់នឹងពេលនេះ។
លោកអគ្គលេខាធិការបន្ថែមថា ចំពោះប្រភេទកីឡាបាល់ទះអង្គុយរបស់កម្ពុជា មិនសូវអាក់ខានទេក្នុងការចូលរួមប្រកួតប្រជែងក្នុងអាស៊ានប៉ារ៉ាហ្គេមកន្លងទៅ ហើយសម្រាប់អាស៊ានប៉ារ៉ាហ្គេម លើកទី១០ នៅប្រទេសហ្វីលីពីន ដែលត្រូវបានលុបចោលដោយសារបញ្ហាវិបត្តិជំងឺកូវីដ-១៩ ដោយពេលនោះមាន៤ប្រទេសបានចុះឈ្មោះចូលរួម គឺកម្ពុជា ម៉ាឡេស៊ី មីយ៉ាន់ម៉ា និងប្រទេសថៃ មានតែ៤ប្រទេស មិនអាចបើកប្រកួតគ្នាបាន តែសម្រាប់ព្រឹត្តិការណ៍កីឡាអាស៊ានប៉ារ៉ាហ្គេម លើកទី១១ នៅប្រទេសវៀតណាម នាឆ្នាំ២០២១ខាងមុខនេះ គឺកម្ពុជាបានត្រៀមរួចរាល់ ដោយលោករំពឹងថា កីឡាជនពិការក្នុងបណ្ដាប្រទេសអាស៊ាន នឹងដាក់ពាក្យចូលប្រកួតលើសពី៤ប្រទេស ដើម្បីអាចដំណើរការបាន ។
លោក យី វាសនា បានលើកឡើងថា សម្រាប់ការត្រៀមរបស់ប្រភេទកីឡាជនពិការរបស់គណៈកម្មាធិការជាតិប៉ារ៉ាឡាំពិកកម្ពុជា គឺទាំងគ្រូបង្វឹក និង កីឡាករពិការទាំងអស់សុទ្ធតែប្តេជ្ញាចិត្តខ្ពស់ ជាពិសេសគឺគ្រូបង្វឹក គឺនឹងប្រើសមត្ថភាពឱ្យអស់ពីលទ្ធភាពដើម្បីជួយកីឡាករពិការគ្រប់ប្រភេទ ជាពិសេសគឺកីឡាជនពិការលើប្រភេទកីឡាបាល់ទះអង្គុយ ឱ្យមានការរីកចម្រើន ។
គ្រូបង្វឹក និង កីឡាករភាគច្រើន បានទាំងសន្យាថា នឹងដណ្តើមមេដាយមាសឲ្យបាន ក្នុងការប្រកួតអាស៊ានប៉ារ៉ាហ្គេម លើកទី១១ នៅប្រទេសវៀតណាម នាឆ្នាំ២០២១ខាងមុខនេះនោះផង ។ ដកស្រង់សម្ដីនាពេលនោះ លោកថ្លែងបញ្ជាក់ថា«ខ្ញុំសែនរីករាយនៅត្រង់នេះ ដែលពួកគាត់មានឆន្ទៈខ្ពស់ ការលះបង់គ្រប់បែបយ៉ាងរបស់បងប្អូនជាជនពិការទាំងអស់ប្តេជ្ញាដណ្តើមយកមេដាយមាសមកជូនជាតិ»។
អគ្គលេខាធិការរូបនេះបានលើកឡើងទៀតថា«តាមស្តង់ដារបច្ចេកទេសអន្តរជាតិ បាល់ទះអង្គុយនេះ ១ក្រុមមាន១៤នាក់ ក្នុងនោះមានគ្រូបង្វឹក២នាក់ គឺគ្រូបង្គោល និងគ្រូជំនួយ ហើយតាមរយៈការប្រកួតនេះ យើងនឹងសម្រិតសម្រាំងកីឡាករឆ្នើមៗសម្រាប់ការប្រកួតអាស៊ានប៉ារ៉ាហ្គេម ឆ្នាំ២០២១ផង និងបន្តជ្រើសរើសយុវជនមានពិការភាពពីគ្រប់មជ្ឈដ្ឋានទូទាំងប្រទេស ដើម្បីបើកឱកាសជូនដល់ពួកគាត់ ឲ្យចូលរួមក្នុងវិស័យកីឡាជនពិការ ដើម្បីជាតិយើង ដើម្បីកិត្តិយសជនពិការយើង ដើម្បីត្រៀមលក្ខណៈឲ្យកាន់តែរឹងមាំ ក្នុងដំណើរបាញ់ឆ្ពោះទៅទទួលរៀបចំព្រឹត្តិការណ៍កីឡា អាស៊ានប៉ារ៉ាហ្គេម លើកទី១២ ឆ្នាំ២០២៣ នៅព្រះរាជាណាចក្រកម្ពុជា ដោយព្រឹត្តិការណ៍កីឡាជនពិការនេះ នឹងប្រារព្ធធ្វើឡើង ក្រោយបញ្ចប់ការប្រកួតកីឡាស៊ីហ្គេម លើកទី៣២ ឆ្នាំ២០២៣ ប្រមាណពីរសប្តាហ៍»។
អគ្គលេខាធិការនៃគណៈកម្មាធិការជាតិប៉ារ៉ាឡាំពិកកម្ពុជា(NPCC) លោក យី វាសនា បន្តថា កីឡាច្រើនផ្នែកកំពុងរៀបចំជើងព្រួលរួចស្រេចសម្រាប់ប៉ារ៉ាហ្គេម ដែលកម្ពុជាធ្វើជាម្ចាស់ផ្ទះនៅឆ្នាំ២០២៣ ។ លោកក៏រំពឹងថា កីឡាជនពិការបស់កម្ពុជា នឹងដណ្ដើមបានមេដាយគួរជាទីមោទនៈ នាពេលនោះផង ។
លោកបានទាំងចាត់ទុកថា ប៉ារ៉ាហ្គេមដែលធ្វើឡើងនៅវៀតណាមនៅឆ្នាំក្រោយ នឹងក្លាយជាការធ្វើតេស្តសាកកម្លាំងដ៏សំខាន់ សម្រាប់កីឡាករជនពិការលើគ្រប់វិញ្ញាសានោះផង ។ លោកបន្តថា ជនពិការ ចលករខួរក្បាល ឬពិការកម្រិតធ្ងន់ ក៏ អាចលេងកីឡាបានដូចជនពិការកម្រិតស្រាល និងមនុស្សធម្មតាដែរ ។ ដូច្នេះវាច្បាស់ណាស់ថា កីឡាករជនពិការគ្រប់រូបកំពុងត្រៀមខ្លួនច្បាស់លាស់ ដោយក្នុងនោះក៏មានរៀបរយវិញ្ញាសាទាំងអស់ និងត្រៀមបញ្ជូនធនធានល្អឱ្យចេញហ្វឹកហាត់នៅតាមបណ្ដាប្រទេសមួយចំនួន ដើម្បីរៀបជើងព្រួលផងដែរ៕
ចែករំលែកព័តមាននេះ